స్మిత్ మచ్చర్: విమానంలో తనకు ప్రాథమిక చికిత్స అందించిన డాక్టర్‌తో ఏం చెప్పారు?

ఇజ్రాయెల్‌కు వెళుతున్న ఫ్లై దుబయి విమానాన్ని కూలిపోకుండా కాపాడిన భారతీయ పైలట్ స్మిత్ మచ్చర్‌పై ప్రస్తుతం ప్రశంసల వర్షం కురుస్తోంది.

స్మిత్ మచ్చర్‌కు చిన్నప్పటి నుంచి విమానయాన రంగంపై పెద్దగా ఆసక్తి లేదని రాయిటర్స్ తన కథనంలో పేర్కొంది.

‘‘మచ్చర్‌ 19 ఏళ్ల వయసులో ఉండగా విమానాలు నడపడంపై ఆసక్తి పెంచుకున్నారు. ఆయన తల్లికి ఈ విషయం నచ్చలేదు. అప్పటిదాకా ఆయన తన కుటుంబానికి చెందిన వస్త్రవ్యాపారాన్నే చూసుకుంటారని భావించారు.

ప్రస్తుతం వేల గంటలపాటు విమానాలు నడిపిన అనుభవం ఉన్నప్పటికీ, విమానాలను నడపడంపై తనకున్న ప్రేమను ఆయన కాక్‌పిట్‌కే పరిమితం చేస్తారు. డ్యూటీలో లేని సమయంలో ఆ విషయాలను ప్రజలతో మాట్లాడటానికి కూడా మచ్చర్ పెద్దగా ఇష్టపడరు’’ అని రాయిటర్స్ తన కథనంలో తెలిపింది.

స్మిత్ మచ్చర్ నడుపుతున్న విమానాన్ని బుధవారం సౌదీ అరేబియాలోని తబూక్‌కు మళ్లించారు. విమానం గాల్లో ఉన్నప్పుడు కో-పైలట్ ఒక్కసారిగా దాడి చేసి 174 మంది ప్రయాణికులున్న ఆ విమానాన్ని కూల్చేందుకు ప్రయత్నించాడని ఇజ్రాయెల్ అధికారులు తెలిపారు.

"ఇజ్రాయెల్ అధికారులు తెలిపిన వివరాల ప్రకారం ముంబయికి చెందిన మచ్చర్ కాక్‌పిట్ ఫ్లోర్‌పై రక్తపు మడుగులో పడి ఉన్నారు. అయినా ఎలాగో కాక్‌పిట్ తలుపు తెరుచుకోవడానికి వీలుగా రిలీజ్ సిస్టమ్‌ను యాక్టివేట్ చేయగలిగారు.

వెంటనే ప్రయాణికులు సిబ్బంది లోపలికి వచ్చి కో-పైలట్‌ను అదుపులోకి తీసుకున్నారు. అదే విమానంలో ప్రయాణిస్తున్న మరో ఇద్దరు ఫ్లైదుబయి పైలట్లు విమానాన్ని సురక్షితంగా ల్యాండ్ చేయడంలో సహాయపడ్డారు" అని రాయిటర్స్ కథనం వెల్లడించింది.

బోయింగ్ 737 విమానాలను నడపడంలో నిపుణుడైన కెప్టెన్ మచ్చర్‌కు 15 ఏళ్ల కెరీర్‌లో సుమారు 9,750 గంటలపాటు విమానాలను నడిపిన అనుభవం ఉంది. కానీ ఆయనీ రంగంలోకి ఆలస్యంగా అడుగుపెట్టారు.

‘చిన్ననాటి కల కాదు’

"ప్రస్తుత తరంలో చాలా మందిలాగా పైలట్ కావడం నా చిన్ననాటి కల కాదు. చాలా ఆలస్యంగా ఈ రంగంలోకి వచ్చాను" అని 2025లో జలక్ మెహతా యూట్యూబ్ ఛానల్‌కు ఇచ్చిన ఇంటర్వ్యూలో మచ్చర్ చెప్పారు.

స్కూల్లో చదువు పూర్తయిన తర్వాత కుటుంబ వ్యాపారాన్ని ముందుకు తీసుకెళ్లాలనే ఉద్దేశంతో ఆయన టెక్స్‌టైల్ ఇంజనీరింగ్ కోర్సులో చేరారు.

ఆ తర్వాత ముంబయిలోని వెలింగ్‌కర్ ఇన్‌స్టిట్యూట్ ఆఫ్ మేనేజ్‌మెంట్‌లో చేరారు.

19 ఏళ్ల వయసులో ఒక విమానయాన సదస్సుకు హాజరైనప్పుడు ఫ్లయింగ్ ప్రపంచం గురించి మచ్చర్‌కు తెలిసింది.

"అక్కడే నాకు విమానయానంపై ఆసక్తి ఏర్పడింది. నా తల్లి మొదట్లో ఈ కెరీర్ పట్ల చాలా ఆందోళన చెందారు" అని స్మిత్ గతంలో ఓ ఇంటర్వ్యూలో చెప్పారు.

"ప్రయాణం ఆలస్యం కావడం నా సమస్య కాదు. మీరు విమానం నుంచి సురక్షితంగా కిందకు దిగడమే నాకు ముఖ్యం. నేను కాక్‌పిట్ విడిచిపెట్టగానే ఎదుటివారికి నేను పైలట్‌నని తెలియడం నాకు ఇష్టం ఉండదు. యూనిఫాం వేసుకుంటే నా ధ్యాస అంతా డ్యూటీపైనే. మరే ఇతర అంశాలు నా దృష్టిలో ఉండవు. కానీ కాక్‌పిట్ నుంచి బయటకు రాగానే దాని గురించి ఆలోచించడం మానేస్తా. ఇంటికి వెళ్లాక కుటుంబంతో గడపడానికి ప్రాధాన్యమిస్తా’’అని ఆయన మరో సందర్భంలో చెప్పారు

న్యూజీలాండ్‌లోనూ విస్తృత చర్చ

"మచ్చర్ న్యూజీలాండ్‌లో 18 నెలల పాటు శిక్షణ పొందారు. నా మాజీ విద్యార్థి ఈ క్లిష్ట పరిస్థితిని ఇంత బాగా ఎదుర్కొన్నందుకు చాలా సంతోషిస్తున్నా" అని మెయిన్‌ల్యాండ్ ఎయిర్‌లో మచ్చర్ మాజీ శిక్షకుడు ఫిలిప్ కీన్ న్యూజిలాండ్ వార్తా వెబ్‌సైట్ ఆర్ఎన్‌జెడ్‌తో చెప్పారు.

"శరీరంలో కత్తి దిగినప్పటికీ , ఆయన ఆ పరిస్థితిని ఎదుర్కొన్న తీరు చదివినప్పుడు చాలా సంతోషం అనిపించింది" అని ఆయన అన్నారు.

తాను ఈ మెయిల్ ద్వారా స్మిత్‌ను సంప్రదించానని తెలిపారు.

అమెరికన్ వార్తా సంస్థ సీఎన్ఎన్‌తో మాట్లాడిన కీన్ "అతను సంతోషంగా ఉండే యువకుడు. చాలా కష్టపడి పనిచేసేవాడు" అని చెప్పారు.

"ఆయనకంటూ ప్రత్యేకమైన చిరునవ్వు ఉంది. చాలా ఆనందంగా ఉండే వ్యక్తి" అన్నారు.

విమానం సురక్షితంగా ల్యాండ్ కావడం ఒక అద్భుతమన్నారు న్యూజిలాండ్‌లో ఇజ్రాయెల్ రాయబారి అలోన్ రోత్.

"దాడి చేసిన వ్యక్తిని పక్కకు లాగిన సదరు పైలట్ కాక్‌పిట్ నియంత్రణను తన చేతుల్లోకి తీసుకుని, కేవలం ఒక్క నిమిషంలో దాదాపు 20వేల అడుగుల ఎత్తు నుంచి వేగంగా కిందకు పడిపోతున్న విమానాన్ని అడ్డుకున్నారు" అని రోత్ చెప్పారు.

"అంటే విమానం కూలిపోవడానికి కేవలం కొన్ని సెకన్ల సమయం మాత్రమే ఉంది. తీవ్రంగా గాయపడినప్పటికీ, కాక్‌పిట్ తలుపు తెరిచి ఇతరులు సహాయం చేయడానికి వీలు కల్పించిన పైలట్ స్మిత్ మచ్చర్ ధైర్యాన్ని అభినందిస్తున్నా" అన్నారు.

"కెప్టెన్, నాకు నొప్పులు వస్తున్నాయి"

ఫ్లై దుబయి ఘటనకు ముందు స్మిత్ 15 ఏళ్ల ఫ్లయింగ్ కెరీర్‌లో ఎదుర్కొన్న అసాధారణ సంఘటన ఒకటి ఉంది. ఓ మహిళ విమానంలోనే బిడ్డకు జన్మనివ్వడమే ఆ అసాధారణ సంఘటన.

విమానంలో ప్రయాణిస్తున్న ఒక మహిళకు డెలివరీ తేదీకి ముందే హఠాత్తుగా నొప్పులు ప్రారంభమయ్యాయని స్మిత్ 'బోనాఫైడ్ బాంటర్' పాడ్‌కాస్ట్‌లో చెప్పారు.

‘‘కెప్టెన్... ఇంకో పదినిమిషాల్లోపే బిడ్డ పుట్టేలా ఉన్నాడు’’ అని చెప్పడాన్ని మచ్చర్ ఆ పాడ్‌కాస్ట్‌లో గుర్తుచేసుకున్నారు.

వెంటనే తాను, ఫస్ట్ ఆఫీసర్ సమీపంలో సురక్షిత ల్యాండింగ్ కోసం ఉన్న పరిస్థితుల గురించి సమాచారాన్ని సేకరించడం ప్రారంభించామని మచ్చర్ చెప్పారు.

అన్ని ఎయిర్‌ఫీల్డ్స్‌లో వాతావరణ పరిస్థితులను తనిఖీ చేసి ఏది సాధ్యమవుతుందో నిర్ణయించుకున్నామని తమకు కేవలం ఆరు లేదా ఏడు నిమిషాల సమయం మాత్రమే ఉందని చెప్పారు.

ఈ లోగానే ‘విమానంలో బిడ్డ పుట్టాడు’ అంటూ కాక్‌పిట్‌లోకి కాల్ వచ్చిందని స్మిత్ వివరించారు.

ఆ సమయంలో తల్లి, బిడ్డ ఇద్దరూ క్షేమంగా ఉన్నారని ఆయన తెలిపారు.

విమానంలో స్మిత్‌కు చికిత్స

స్మిత్ చాలా రక్తాన్ని కోల్పోయారని తీవ్రంగా గాయపడ్డారని ఫ్లై దుబయ్ విమానంలో ప్రయాణికుడిగా ఉన్న డెంటిస్ట్ షోటా ముసేవ్ చెప్పారు. షోటా ముసేవ్ స్మిత్‌కు ప్రాథమిక చికిత్స చేశారు.

"కొన్ని క్షణాలు ఆలస్యమైతే మనం ఆయన్ని కోల్పోయేవాళ్లం అనిపించింది. ఆయన బీపీ చాలా వేగంగా పడిపోయింది. ఆయన అకస్మాత్తుగా స్పృహ తప్పారు. అక్కడంతా రక్తం కనిపించింది" అని ఆయన చెప్పారు.

వారి ధైర్యం "9/11 లాంటి పెద్ద విపత్తును నివారించడంలో సహాయపడిందని" ఇజ్రాయెల్ ప్రధానమంత్రి నెతన్యాహు చెప్పారు.

"కాక్‌పిట్ పూర్తిగా రక్తంతో నిండిపోయింది. స్మిత్ మెడ, చేతులకు గాయాలయ్యాయి. కో-పైలట్ దాడి కారణంగా కెప్టెన్ ఎడమ చేయి దాదాపు రెండు ముక్కలైంది. స్మిత్ నాడి బలహీనపడి స్పృహ తప్పడం ప్రారంభించినప్పుడు విమానాన్ని వీలైనంత త్వరగా ల్యాండ్ చేయాలని మేము రిజర్వ్ పైలట్లను కోరాం. అప్పటికే ఆ పైలట్లు విమానాన్ని తమ నియంత్రణలోకి తీసుకున్నారు. విమానం వాయువ్య సౌదీ అరేబియాలోని తబుక్ నగరంలో ల్యాండ్ అయింది" అని షోటా ముసేవ్ ఇజ్రాయెల్ ఆర్మీ రేడియోతో చెప్పారు.

"ఆయన ఇజ్రాయెల్ వరకు ప్రయాణాన్ని కొనసాగించగలిగే స్థితిలో లేరని అనుకున్నాను. ఆయన బతకాలనుకున్నారు . ఒకవేళ తాను బతకకపోతే తన పిల్లలకు సందేశం పంపమని కెప్టెన్ నాతో చెప్పారు. నేను వారితో దేవుడు మీతో ఉన్నాడు. ప్రార్థించండి. అంతా మంచి జరుగుతుంది. మేం మీతో ఉన్నామని చెప్పాను" అని డెంటిస్ట్ ముసేవ్ తెలిపారు.

కో-పైలట్ ఒమన్ పౌరుడు. సౌదీ అధికారులు అతనిని విచారిస్తారని నెతన్యాహు చెప్పారు.

"ఆ కో-పైలట్ బహుశా ఉగ్రవాది అయి ఉండవచ్చు లేదా పిచ్చివాడు అయి ఉండవచ్చు, అందుకే అతను పైలట్‌పై దాడి చేశాడు" అని అమెరికా అధ్యక్షుడు డొనల్డ్ ట్రంప్ ఓవల్ ఆఫీస్‌లో విలేకరులతో అన్నారు.

అయితే, ఒమన్ అధికారులు ఈ ఘటనపై ఇంకా ఎలాంటి వ్యాఖ్యలు చేయలేదు.

కో-పైలట్ దాడి వెనుక కారణం ఇప్పటికీ స్పష్టం కాలేదు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)