'મને ખ્યાલ નહોતો કે મારો પાર્ટનર સૂતી વખતે મારા પર બળાત્કાર કરતો હતો', 13 વર્ષથી જેની સાથે રહેતા તેની હકીકત કેવી રીતે સામે આવી

"મારા મતે, તે મારા જીવનનો શ્રેષ્ઠ સંબંધ હતો. કદાચ તે દિવસથી એક દિવસ અગાઉ સુધી જ્યારે તેણે પોતાના કૃત્યની કબૂલાત કરી."

એડેલ ઓવરટનને તેમના બૉયફ્રેન્ડ રહી ચૂકેલા, સ્ટીવન યુડેન એક પરફેક્ટ પાર્ટનર લાગતા હતા. બંને 13 વર્ષ સુધી રિલેશનશિપમાં રહ્યાં.

બંને એક ઝૉમ્બી ફિલ્મના સેટ પર મળ્યાં હતાં. બંનેની ઘણી સમાન બાબતોમાં રુચિ હતી.

ઓવરટન કહે છે કે ઉડેન ખૂબ જ દયાળુ અને પ્રેમાળ હતો. જ્યારે ઓવરટન બીમાર પડ્યાં ત્યારે સ્ટીવે તેમની સંભાળ રાખવા માટે કામ પણ મૂકી દીધું હતું.

ડર્બીમાં પોતાના ઘરે સોફા પર બેઠેલાં ઓવરટન કહે છે, "તે અદ્ભુત હતો. હું તેને ખૂબ પ્રેમ કરતી હતી, અને મને લાગે છે કે હું હજુ પણ તેને થોડો-ઘણો પ્રેમ કરું છું."

ઓવરટનને યુડેન પર સંપૂર્ણ વિશ્વાસ હતો, પરંતુ જ્યારે યુડેને પોતે ઓવરટન સાથે બળાત્કાર કરતો હોવાની કબૂલાત કરી ત્યારે આ વિશ્વાસ તૂટી ગયો.

ઓવરટન કહે છે, "મને તરત જ વિશ્વાસઘાત થયો હોવાનું લાગ્યું."

"મેં પહેલાં ક્યારેય કોઈ સંબંધમાં આટલું સુરક્ષિત અનુભવ્યું નહોતું."

યુડેન સ્તન કૅન્સરની સારવાર દરમિયાન ઓવરટનની સંભાળ રાખતો હતો, પરંતુ બાદમાં તેણે પોલીસને જણાવ્યું કે જ્યારે તેઓ દવાના નશામાં હતાં ત્યારે યુડેને ઓવરટન પર બળાત્કાર કર્યો હતો.

ઓવરટન કહે છે, "મને લાગ્યું કે હું તેને ઓળખું છું, પણ હવે મને ખબર નથી કે તે કોણ હતો. તે મને અજાણ્યો લાગવા માંડ્યો."

"તે 13 વર્ષથી મારી સાથે રહેતો હતો. તેણે મારાં બાળકોને ઉછેરવામાં પણ મદદ કરી."

"મને લાગ્યું કે હું સુરક્ષિત છું, પણ હું સુરક્ષિત નહોતી."

યુડેન હવે જેલમાં છે. ઓવરટને જે બન્યું તે વિશે વાત કરવાનો નિર્ણય કર્યો છે. તેમને આશા છે કે આનાથી બીજાને મદદ મળશે.

ઓવરટન અને યુડેન 2009માં નોટિંગહામમાં એક ઝોમ્બી ફિલ્મના શૂટિંગ દરમિયાન મળ્યાં હતાં, ત્યારે ઓવરટન 29 વર્ષનાં હતાં અને યુડેન 27 નો.

યુડેન મૅકઅપ અને ઍક્ટિંગ કરતો, અને ઓવરટન એક કલાકાર હતાં. બંનેના પોતપોતાના સંબંધો હતા, પરંતુ તેઓ મિત્રો તરીકે એકમેકના સંપર્કમાં રહ્યાં.

આખરે 13 જાન્યુઆરી, 2012ના રોજ બંને કપલ બન્યાં, આ તારીખ ઓવરટનને યાદ છે.

ઓવરટને કહ્યું કે યુડેન સાથે રહેવું એ તેમના અગાઉના સંબંધો કરતાં અલગ અનુભવ હતો.

તેઓ કહે છે, "તે હસમુખો અને સંભાળ રાખનાર હતો, અને મને તેનાથી પ્રેમનો અહેસાસ થયો."

બંનેની મુલાકાત અસામાન્ય રીતે થઈ, અને તેમનું એકબીજાની સાથેનું જીવન પણ અસામાન્ય હતું.

તેઓ એક કંપની માટે વ્યાવસાયિક ઝૉમ્બી તરીકે કામ કરતાં હતાં, જે ઝૉમ્બી સર્વાઇવલ હૉરર ઍક્સપીરિયન્સ ડેનું આયોજન કરતી હતી.

ઝૉમ્બીની ભૂમિકા ભજવવા માટે ઓવરટનને શારીરિક રીતે ફિટ રહેવું પડ્યું હતું, પરંતુ એહલર્સ-ડેનલોસ સિન્ડ્રોમ હોવાનું નિદાન થયા બાદ તેમણે આખરે 2017માં આ કામ છોડી દેવું પડ્યું.

આ પછી, 2018ની શરૂઆતમાં, યુડેને તેમની સંભાળ રાખવા લાગ્યો.

તેઓ કહે છે, "તેણે મારા માટે લગભગ બધું જ કર્યું."

પરંતુ જ્યારે ઓવરટન (જેમનું નિકનેમ ડેલ છે) પાછળ ફરીને જુએ છે, ત્યારે તેમને લાગે છે કે યુડેન તેમના જીવનને નિયંત્રિત કરવા લાગ્યો હતો.

તેઓ કહે છે, "તેને હું શું-શું કરી શકું છું એ વાત બધાને બતાવવામાં ઘણી મજા આવતી."

"જો કોઈ કંઈક સૂચન કરે, તો તે ખૂબ જ ઉત્સાહથી કહેતો, 'મને નથી લાગતું કે ડેલ આ કરી શકશે, ચાલો, કંઈક બીજું વિચારીએ'."

પણ ઓવરટન હવે જાણે છે કે યુડેનનું વર્તન તેની કલ્પના કરતાં પણ વધુ ભયાનક હતું.

2020માં જ્યારે પ્રથમ વખત તેઓ સ્તન કૅન્સર માટે કીમોથૅરપી કરાવી રહ્યાં હતાં ત્યારે તેમને આ વાતની શંકા ગઈ હતી.

તેઓ કહે છે, "મને ખબર નથી કે મારા શરીરમાં બેચેની હતી કે શું, પણ જ્યારે તે આવું કરી રહ્યો હતો ત્યારે હું જાગી ગઈ."

"તેણે ઘણાં બહાનાં બનાવ્યાં જેમ કે, 'મને લાગ્યું કે તું જાગી ગઈ છે, અને તને ખબર હતી કે શું ચાલી રહ્યું છે.'

"હું અમારા બધા તણાવ વિશે વિચારી રહી હતી, અને તે કહી રહ્યો હતો કે તેણે આ ભૂલથી કર્યું."

તેથી ઓવરટને પોતાની આશંકાઓને અવગણી.

તેઓ કહે છે, "સત્ય શું હોઈ શકે તે વિશે વિચારવા કરતાં કદાચ તે જૂઠને માની લેવું સહેલું હતું."

પણ ઓવરટનને ઊંઘમાં તકલીફ થવા લાગી.

તેઓ કહે છે કે, "મને લાગે છે કે ક્યાંક, અંદરોઅંદર, હું સૂતી વખતે અસુરક્ષિત અનુભવતી હતી."

ઓવરટન કહે છે કે તેમને યુડેન સાથે અંતરંગ થવામાં પણ મુશ્કેલી પડી રહી હતી, પોતાની સાથે બનેલા જૂના યૌન શોષણ સાથે સંકળાયેલી ખરાબ યાદો તેમના મનમાં આવવા લાગી હતી.

"તે સમયે, મને એવું લાગ્યું કે હું તેને મારા ભૂતકાળના આઘાત સાથે જોડી રહી છું. મને લાગ્યું કે મારો ભૂતકાળનો આઘાત મને તેના પ્રત્યે અને તેના કૃત્યો પ્રત્યે વધુ કઠોર બનાવી રહ્યો છે."

"હું પોતાની જાતને દોષી માનવા માંડી અને અંદરોઅંદર પોતાની જાતને અને આના માટે મારી જાતને કોસવા લાગી."

યુડેનની કબૂલાત

યુડેને પાંચ વર્ષ પછી, 2025 માં આ વાત ન સ્વીકારી. અંતે જ્યારે તે કોલોન કૅન્સરથી પીડાતો હતો અને તેની સારવાર ચાલી રહી હતી ત્યારે તેણે આ કબૂલાત કરી.

ઓવરટન કહે છે, "મને લાગે છે કે તેના મનમાં કંઈક ચાલી રહ્યું હશે, કારણ કે હવે તે વસ્તુઓને અલગ દૃષ્ટિકોણથી જોઈ રહ્યો હતો, જેમાંથી હું પસાર થઈ રહી હતી."

"તે કહેવા લાગ્યો કે જ્યારે હું સારવાર હેઠળ હતી ત્યારે તેણે મારી યોગ્ય કાળજી લીધી ન હતી."

આ સાંભળીને, ઓવરટનને પાંચ વર્ષ પહેલાંનો એક બનાવ યાદ આવ્યો, જ્યારે તેઓ ઊંઘમાંથી જાગ્યાં અને યુડેનને પોતાની સાથે સેક્સ કરતો જોયો.

તેઓ કહે છે, "મેં તેને ધક્કો મારીને દૂર કર્યો."

મેં તેને 2025માં પૂછ્યું, 'આનો અર્થ શું છે? તારો કહેવાનો મતલબ એ છે કે તે મારી સંભાળ નહોતી રાખી? કઈ રીતે?'

ઓવરટનના જણાવ્યા મુજબ, વાતચીત બે દિવસ ચાલી, તે દરમિયાન યુડેને એક મિત્રને ફોન કર્યો અને તેમને પોતાના કૃત્ય વિશે જણાવ્યું. ત્યાર બાદ તે ઘરે પાછો ફર્યો અને ઓવરટન સામે પોતાનો ગુનો કબૂલ્યો.

ઓવરટનના મનમાં દગો થયાની અને ઘૃણાની લાગણી આવી, પરંતુ તેમણે તરત જ સંબંધનો અંત ન લાવ્યો. તેમને લાગ્યું કે પોતે યુડેન પર નિર્ભર હતાં અને તેને પ્રેમ કરતાં હતાં.

ઓવરટન પહેલાંથી જ જાતીય શોષણ સંબંધિત આઘાતનો સામનો કરવા માટે થૅરપી લઈ રહ્યાં હતાં અને તેમણે પોતાના સેશનમાં આ વાતનો ઉલ્લેખ કર્યો હતો.

તેઓ કહે છે: "એક થૅરપિસ્ટે મને આમાંથી બહાર કાઢી, કારણ કે હું સંપૂર્ણપણે ભાંગી પડી હતી, હું રડી રહી હતી અને કહી રહી હતી, 'હું શું કરું? હું તેને આવું કરવાથી કેવી રીતે રોકું?'"

"અને તેણે કહ્યું, 'તું એને બહાર કાઢી મૂક અને પોલીસને બોલાવી લે.' અને તે દિવસે પાછળથી તેણે કહ્યું કે તેમની સુરક્ષા માટે બેઠક થઈ હતી, અને તેઓ આ આખી બાબત વિશે પોલીસને બોલાવશે, અને તે સમયે મને એક રીતે ખબર પડી ગઈ કે આ મામલોD મારા હાથની બહાર હતો."

આ કેસ યુકેના ડર્બીશાયર પોલીસનાં ડિટેક્ટિવ સાર્જન્ટ એલેનોર કિર્ટનને સોંપવામાં આવ્યો હતો.

તેઓ કહે છે, "મેં સૌપ્રથમ એડેલ (ઓવરટન)નો સંપર્ક કર્યો."

"સ્વાભાવિક રીતે જ તેઓ જે બન્યું તેનાથી ખૂબ જ પરેશાન હતાં."

ઓવરટનનો ઇન્ટરવ્યૂ લીધા પછી, પોલીસે યુડેનની ધરપકડ કરી.

એલેનોર કહે છે, "જ્યારે મેં તેનો ઇન્ટરવ્યૂ લીધો, ત્યારે તેણે તરત જ પોતાના કૃત્યની કબૂલાત કરી."

"તેણે તરત જ સ્વીકારી લીધું કે તેણે ઓવરટન પર બળાત્કાર કર્યો હતો. તપાસ આ દિશામાં આટલી ઝડપથી આગળ વધે તે ખૂબ જ અસામાન્ય છે."

યુડેન પર બળાત્કારના બે આરોપ મૂકવામાં આવ્યા હતા. બાદમાં તેણે કોર્ટમાં ગુનો કબૂલ્યો અને તેને છ વર્ષ અને આઠ મહિનાની જેલની સજા ફટકારવામાં આવી.

કિર્ટન કહે છે કે ઓવરટનના આ પગલાથી અન્ય મહિલાઓનું રક્ષણ કરવામાં મદદ મળી છે.

તેઓ ઉમેરે છે, "તેમની બહાદુરી અને દૃઢ નિશ્ચયને કારણે જ અમે એવા ઘણા લોકોના જીવ બચાવી શક્યા છીએ જેમની સામે આ માણસ આ ગુના કરવાનું ચાલુ રાખી શક્યો હોત."

"જો કોઈને એવું લાગે કે આ તેમની સાથે થઈ રહ્યું છે, તો હું ખરેખર તેમને અમારી પાસે આવીને તેના વિશે વાત કરવા માટે પ્રોત્સાહિત કરીશ. કારણ કે આપણે કંઈક કરી શકીએ છીએ. અને આ કેસ તેનો પુરાવો છે."

પરંતુ ઓવરટનને હજુ પણ એ સમજવું મુશ્કેલ લાગે છે કે 13 વર્ષથી તેમની સાથે રહેતા અને તેમને પ્રેમ કરતા યુડેને તેમના પર સૂતી વખતે બળાત્કાર કેમ કર્યો.

તેઓ કહે છે, "મને સમજાતું નથી કે કોઈ વ્યક્તિ પ્રતિક્રિયા વગર કેવી રીતે આનંદ માણી શકે છે. મને તે બિલકુલ સમજાતું નથી."

"મને ખબર નથી કે આને કેવી રીતે સમજવું. તેને સ્ત્રીઓ સાથે સૂવાનો શોખ હતો."

"તે ઇચ્છતો હતો કે હું સૂઈ જાઉં. તે એ પણ ઇચ્છતો એ શું કરી રહ્યો છે એની મને ખબર ન પડે."

ઓવરટનને શંકા છે કે યુડેન પોતાની દવામાં વધારો કરીને તેમને નશાની સ્થિતિમાં રાખતો હતો, આ દવાઓ પર તેનો સંપૂર્ણ નિયંત્રણ હતો.

તેઓ કહે છે, "મારી પાસે નાનાં દવાનાં બૉક્સ હતાં. તે મને મારી તમામ દવાઓ કાઢીને આપતો."

"મને શંકા છે કે તે મને ઊંઘમાં રાખવા માટે વધુ દવાઓ આપી રહ્યો હતો."

કિર્ટને કહ્યું કે પોલીસ પ્રમાણે આ એક "અનોખો કેસ" હતો, તેથી ફૉરેન્સિક અને ટૉક્સિકોલૉજી તપાસથી એ વાત ન થઈ શકી કે આવું થયું છે કે નહીં.

આ સિવાય આ સંદર્ભમાં કોર્ટમાં કોઈ પુરાવા રજૂ કરવામાં આવ્યા નહોતા.

પરંતુ યુડેને પોલીસને જણાવ્યું હતું કે તેણે ઓવરટન પર જ્યારે તેઓ કીમોથૅરપી કરાવી રહ્યાં હતાં ત્યારે એક વખત બળાત્કાર ગુજાર્યો હતો, કીમોથૅરપીથી લોકો વધુ થાકી જાય છે.

કિર્ટન કહે છે, "મને લાગે છે કે તે સમયે તેમણે જ તેનો ઉલ્લેખ કર્યો હતો. તેમણે કહ્યું કે તેઓ કીમોથૅરપી કરાવી રહ્યાં હતાં. અને તેઓ માને છે કે જ્યારે આ ઘટના બની ત્યારે તે દવાના પ્રભાવ હેઠળ હશે."

યુડેન પર ઓવરટન પર બે વાર બળાત્કાર કરવાનો આરોપ મૂકવામાં આવ્યો હતો, પરંતુ ઓવરટન માને છે કે તેણે આ કૃત્ય ઘણી વખત કર્યું હતું.

ઓવરટન કહે છે, "તેણે મને કહ્યું કે તેણે મારી સાથે સાત કે આઠ વાર આવું કર્યું છે."

તેમની પુત્રી, શારી ઓવરટન, કહે છે કે યુડેનના ગુનાની તેમનાં માતા પર જે અસર થઈ છે, તે જોવું મુશ્કેલ રહ્યું છે.

શેરી કહે છે, "તેઓ હવે ખૂબ જ અલગ દેખાય છે. હું જોઈ શકું છું કે તેમનો આત્મવિશ્વાસ ઘણો ઓછો થઈ ગયો છે."

"મને એ વાતનો પણ ખૂબ ગર્વ છે કે તેમણે હિંમત બતાવી, પોલીસ અને કોર્ટ સામે વાત કરી અને પોતાના અધિકારો માટે ઊભાં રહ્યાં."

ઓવરટનને આશા છે કે તેમની કહાણી લોકોને બતાવશે કે તેમને તેમના કહેવાતા કેરટેકર્સના હાથે થતા દુર્વ્યવહાર સહન કરવાની જરૂર નથી.

તેઓ કહે છે, "મને લાગે છે કે મારે આ વિશે બોલવું જોઈએ, કારણ કે આના કારણે મારે એ વિચારવા માટે મજબૂર થવું પડ્યું કે કેટલા અન્ય બીમાર લોકો આવી પરિસ્થિતિમાં છે, જ્યાં અન્ય કોઈનો તેમના પર નિયંત્રણ છે."

"મને ખબર પડ્યા પછી થોડા મહિના સુધી, હું વિચારતી રહી કે કદાચ આ મારી સંભાળ રાખવા બદલે કોઈ પ્રકારની કિંમત હશે. કદાચ મારે તેને તે આત્મીયતા આપવાની હતી. પણ એવું નહોતું. અને બીજા કોઈએ પણ આવું કરવાની જરૂર નથી."

બીબીસી માટે કલેક્ટિવ ન્યૂઝરૂમનું પ્રકાશન