మగవాళ్లకు కనిపించని రంగులు మహిళలకు కనిపిస్తాయా?

తనకు కనిపిస్తున్న రంగులను తన విద్యార్థులు చూడలేకపోతున్నారని తెలుసుకున్న క్షణంలో నిర్ఘాంతపోయానని చిత్రకారిణి కాన్సెట్టా ఆంటికో చెప్పారు.

సాధారణంగా ప్రజలంతా నీడలో ఒకే షేడ్‌ను మాత్రమే చూస్తుంటే, తనకు నీడలో కూడా అనేక రకాల రంగులు కనిపిస్తాయని ఆమె తెలిపారు.

'ఈ విషయం నాకెందుకు ఎప్పుడూ చెప్పలేదు?' అని అడిగితే.. 'మీరు టీచర్ కదా, ఏదో ఆర్టిస్టిక్‌గా ట్రై చేస్తున్నారేమో అనుకున్నాం' అని విద్యార్థులు బదులిచ్చినట్లు ఆమె గుర్తు చేసుకున్నారు.

ఆ తర్వాత జరిపిన జెనెటిక్ పరీక్షల్లో ఆంటికోకు 'టెట్రాక్రోమసీ'కి సంబంధించిన జన్యు లక్షణాలు ఉన్నాయని తెలిసింది. టెట్రాక్రోమసీ అంటే అత్యధిక రంగులను చూడగలిగే ఒక ప్రత్యేకమైన సామర్థ్యం. దీనివల్ల ఇతరులు చూడలేని రంగులను కూడా కొందరు చూడగలుగుతారు.

ఒక అదనపు కణం

సాధారణంగా చాలామంది కళ్లలో రంగులను గుర్తించడానికి 'కోన్స్' అని పిలిచే మూడు రకాల ప్రత్యేక కణాలు ఉంటాయి.

ఈ మూడు రకాల కణాల్లో ప్రతీ కణం వేర్వేరు కాంతి తరంగధైర్ఘ్యాలకు ప్రతిస్పందిస్తుంది. ఇవి ముఖ్యంగా ఎరుపు, ఆకుపచ్చ, నీలం రంగుల సంకేతాలను మెదడుకు పంపుతాయి.

ఈ కణాలు పంపే సిగ్నల్స్‌ను బట్టే మెదడు మనం చూస్తున్నది ఏ రంగు అనేది తేలుస్తుంది.

కానీ, కొందరిలో నాలుగో రకం కణం కూడా ఉండవచ్చు. దీనివల్ల వారి మెదడుకు మిగతా వాళ్ల కంటే ఎక్కువ, భిన్నమైన సమాచారం అందుతుంది. ఫలితంగా కంటికి కనిపించే కాంతి వర్ణపటంలో చాలా సూక్ష్మమైన తేడాలను కూడా వారు స్పష్టంగా గుర్తుపట్టగలరు.

రెండు జన్యు రకాలు

ఎరుపు, ఆకుపచ్చ రంగులను గుర్తించే కోన్ కణాలకు సంబంధించిన జన్యువులు X క్రోమోజోమ్‌పై ఉంటాయి. ఒక వ్యక్తి టెట్రాక్రోమాటిక్ కావాలంటే, తనలో ఉన్న X క్రోమోజోమ్‌లలో ఎరుపు లేదా ఆకుపచ్చ జన్యువుకు చెందిన రెండు వేర్వేరు వేరియంట్లను కలిగి ఉండి, కంటిచూపును రూపొందించడంలో ఆ రెండూ సక్రియంగా భాగమవ్వాలి. అప్పుడే కంటి రెటీనాలో 3కి బదులుగా 4 రకాల కోన్ కణాలు తయారవుతాయి.

జీవశాస్త్రపరంగా మహిళలకు రెండు X క్రోమోజోమ్‌లు ఉంటాయి. కాబట్టి, ఆ రెండింటిపై రెండు వేర్వేరు రకాల జన్యువులు ఉండి పనిచేసే అవకాశం మహిళల్లోనే ఉంటుంది. అందుకే దాదాపుగా మహిళల్లో మాత్రమే ఈ సామర్థ్యం ఉండే అవకాశం ఉంది.

పురుషుల్లో సాధారణంగా X క్రోమోజోమ్‌ ఒకటే ఉంటుంది. కాబట్టి, జీవశాస్త్రపరంగా మహిళలు మాత్రమే టెట్రాక్రోమాటిక్‌గా ఉండే అవకాశం ఉంది. ఒకవేళ పురుషుల జన్యువులో మార్పు వస్తే అది కలర్ బ్లైండ్‌నెస్‌కు దారితీస్తుంది.

ఇలా నాలుగో రకం కోన్ కణాన్ని కలిగి ఉండటాన్ని 'రెటినల్ టెట్రాక్రోమసీ' అంటారు.

జన్యు పరీక్షల ద్వారా 'రెటినల్ టెట్రాక్రోమసీ' ఉన్నవారిని గుర్తించవచ్చు.

యూకేలోని న్యూక్యాజిల్ యూనివర్సిటీకి చెందిన 'టెట్రాక్రోమసీ ప్రాజెక్ట్' ప్రకారం, దాదాపు 12% మంది మహిళల్లో ఈ జన్యు సామర్థ్యం ఉండే అవకాశం ఉందని భావిస్తున్నారు. అయితే జనాభాను బట్టి ఈ సంఖ్య మారొచ్చని పరిశోధనలు చెబుతున్నాయి.

అయితే అదనపు కోన్ కణం ఉన్నంత మాత్రాన అందరికీ రంగులు బాగా కనిపిస్తాయని చెప్పలేం.

అమెరికాలోని యూసీ ఇర్విన్ బ్రన్సన్ సెంటర్ ఫర్ ట్రాన్స్‌లేషనల్ విజన్ రీసెర్చ్‌కి చెందిన డాక్టర్ కింబర్లీ ఎ జేమ్సన్ ప్రకారం, ఇలా మెరుగైన రంగులు కనిపించడాన్ని 'ఫంక్షనల్ టెట్రాక్రోమసీ' అంటారు. దీనిని నిరూపించడం చాలా కష్టమని జేమ్సన్ అన్నారు.

నిరూపించడం కష్టమైనప్పటికీ, ఇలా కనిపించే అవకాశముందని నమ్మడానికి కొన్ని ఆధారాలు ఉన్నాయని కింబర్లీ చెప్పారు.

జేమ్సన్ చేసిన ఒక అధ్యయనంలో, నాలుగు రకాల కోన్ కణాలు ఉన్న మహిళలు రంగుల్లోని అతిసూక్ష్మమైన షేడ్స్‌ను కూడా గుర్తించగలిగారని తేలింది. సాధారణ మూడు రకాల కోన్ కణాలు ఉన్నవారికంటే (ట్రైక్రోమాట్స్) వీరు రంగుల రూపాంతరాలను మరింత స్పష్టంగా గుర్తించగలరని ఆ అధ్యయనం సూచిస్తుంది.

అయితే ఇది ఆచరణలో ఎలా కనిపిస్తుందనే దానిపై భిన్నాభిప్రాయాలు ఉన్నాయి.

'వర్ణించలేని రంగులు'

టెట్రాక్రోమాట్స్ ఎలాంటి రంగులను చూస్తారో అనే దానిపై పేపర్ రాసిన అడిలైడ్ యూనివర్సిటీ ఫిలాసఫర్, డాక్టర్ మైఖేల్ న్యూవెల్ రెండు అభిప్రాయాలను చెప్పారు.

'కలర్ బ్లైండ్‌నెస్ ఉన్నవాళ్లకు ఎరుపు, ఆకుపచ్చ రంగులను వివరించలేనట్లే.. వీరు కూడా ఇతరుల ఊహకు అందని, మాటల్లో చెప్పలేని కొత్త రంగులను చూడొచ్చు. లేదా, మనం చూసే సాధారణ రంగుల్లోనే అతి సూక్ష్మమైన తేడాలను ఇంకా స్పష్టంగా చూసే అవకాశం కూడా ఉంది' అని డాక్టర్ మైఖేల్ పేర్కొన్నారు.

నిజానికి ఒక వ్యక్తి మనసులో రంగుల అనుభూతి ఎలా ఉందో శాస్త్రీయంగా అంచనా వేయడం అసాధ్యమని డాక్టర్ బోస్టెన్ అంటున్నారు.

టెట్రాక్రోమాట్‌ను ఎలా గుర్తించాలి?

ఇంటర్నెట్‌లో వెతికితే ఆన్‌లైన్‌లో టెట్రాక్రోమసీ పరీక్షలను ఆఫర్ చేసే అనేక సైట్లు కనిపిస్తాయి. అయితే ఆ పరీక్షల ద్వారా టెట్రాక్రోమాట్‌ను గుర్తించడం అసాధ్యమని నిపుణులు అంటున్నారు.

ఎందుకంటే మన స్క్రీన్‌లలో ఎరుపు, ఆకుపచ్చ, నీలం అనే మూడే రంగుల ఛానెల్స్ ఉంటాయి. కాబట్టి ఒకవేళ టెట్రాక్రోమాట్స్ కొత్త రంగులను చూడగలిగినా, వారు వాటిని స్క్రీన్‌పై అంత బాగా చూడలేరు.

అయితే ఒక వ్యక్తి టెట్రాక్రోమాట్ కావచ్చు అనడానికి కొన్ని ముఖ్యమైన సంకేతాలు ఉన్నాయని న్యూవెల్ అంటున్నారు.

ఇలాంటి వ్యక్తులు.. నిజ జీవితంలో చూసే రంగులకు, ఫోన్ లేదా టీవీ స్క్రీన్‌పై చూసే రంగులకు మధ్య స్పష్టమైన తేడాలను గమనిస్తుంటారని ఆయన చెప్పారు.

ఇతరుల కంటే తమ రంగుల గ్రహణ శక్తి మరింత తీక్షణంగా, సున్నితంగా ఉందనే విషయం వీళ్లకు చిన్నతనం నుంచే అర్థమవుతూ ఉంటుందని జేమ్సన్ అన్నారు.

ఒక వ్యక్తి టెట్రాక్రోమాట్ అని సూచించే మరొక ఆసక్తికరమైన విషయం ఏంటంటే, వార్మర్ షేడ్స్‌ లైట్స్‌తో పోలిస్తే ఎల్‌ఈడీ లైట్లు, లేదా ఫ్లోరోసెంట్ ట్యూబ్స్ వెలుతురును వీరు తట్టుకోలేరు అని జేమ్సన్ చెప్పారు.

ఒకవేళ తండ్రులకు స్వల్పంగానైనా కలర్ డెఫిషియెన్సీ ఉంటే వాళ్ల కూతుర్లకు టెట్రాక్రోమాటిక్ లక్షణాలు ఉండే అవకాశం ఉందని నిపుణులు చెబుతున్నారు.

అయితే ఒక వ్యక్తి నిజంగా టెట్రాక్రోమాటా కాదా అని కచ్చితంగా చెప్పడానికి జెనెటిక్ టెస్ట్, ల్యాబ్‌లో చేసే అధ్యయనాలు మాత్రమే నమ్మదగినవి.

రెటినల్ నుంచి ఫంక్షనల్‌కి

రెటినల్ టెట్రాక్రోమసీ అనేది ఫంక్షనల్ టెట్రాక్రోమసీగా ఎలా మారుతుందనేది పరిశోధకులకు ఇంకా పూర్తిగా అర్థం కావట్లేదు.

" వాళ్లకు ప్రత్యేకమైన కోన్ కణం ఉండాలా? లేక కన్ను పంపే సంకేతాలను మెదడు ఎలా ఉపయోగించుకోవాలో నేర్చుకునే విధానంలో ఏమైనా ఉందా?" అని డాక్టర్ బోస్టెన్ ప్రశ్నిస్తున్నారు.

కంటి చూపుకు సంబంధించిన ఇతర వ్యవస్థలపై కూడా ఇది ఆధారపడి ఉండవచ్చని అభిప్రాయపడ్డారు.

"ఇంకో మార్గం ఏంటంటే.. ఆ రంగుల సంకేతాలను గుర్తించే నైపుణ్యాన్ని పెంచుకోవడానికి, వారు తమ జీవితంలో రంగులకు సంబంధించి ఏదో ఒక పనిని నిరంతరం చేయాల్సి ఉండొచ్చు" అని బోస్టెన్ అన్నారు.

పెయింటర్ ఆంటికో తనకు సరిగ్గా అలాగే జరిగిందని నమ్ముతున్నారు.

"నేను రంగులను చూసే సామర్థ్యాన్ని పెంచుకున్నాను. నేను చిన్నప్పటి నుంచి పెయింటర్‌ని. కాబట్టి రంగులు కలపడంలో నేను 1,00,000 గంటలు గడిపి ఉంటాను. నేను రోజూ, ఎప్పుడూ అదే పని చేస్తుంటాను'' అని ఆమె అన్నారు.

పెద్ద చర్చ

ఫంక్షనల్ టెట్రాక్రోమసీ నిజంగానే ఉందా లేదా అనే దానిపై ఇప్పటికీ చర్చ నడుస్తూనే ఉంది.

ఆంటికో మాత్రం ఇతరుల అనుమానాలను పట్టించుకోరు. తనకు ఈ జన్యు పరివర్తనం ఉన్నందుకు తనను తాను "అదృష్టవంతురాలిగా" భావిస్తారు.

"ఇతరులు చూడలేని రంగులను నేను చూడగలగడం చాలా వింతగా, ఆశ్చర్యంగా అనిపిస్తుంది. ఇది నా జీవితాన్ని అద్భుతంగా మార్చింది" అని ఆమె అన్నారు.

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)