త్రైపాక్షిక శిఖరాగ్ర సమావేశం: ‘ఆర్భాటం ఎక్కువ, ఫలితాలు తక్కువ’

ఫొటో సోర్స్, Getty Images
- రచయిత, ఆంథొనీ జర్చర్
- హోదా, బీబీసీ ప్రతినిధి
- ప్రచురణ
- చదివే సమయం: 4 నిమిషాలు
రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు షీ జిన్పింగ్లతో అమెరికా అధ్యక్షుడు డోనల్డ్ ట్రంప్ త్రైపాక్షిక సమావేశానికి వెళ్లినప్పుడు ఆయన వద్ద చర్చించాల్సిన అంశాలు పెద్దగా లేవు.
స్పష్టమైన డిమాండ్లు కూడా లేవు.
సమావేశం ముగిసిన తర్వాత ఆయనకు పెద్దగా దక్కిందేమీ కనిపించలేదు.
చివరికి ఈ సమావేశానికి సంబంధించిన ఫొటోలు, దృశ్యాలే దాని శాశ్వత గుర్తులుగా మిగిలిపోయే అవకాశం ఉంది.
అగ్రరాజ్యాల మధ్య చారిత్రక 'యాల్టా 2.0' సమావేశంగా కొందరు అభివర్ణించిన ఈ భేటీపై అంతర్జాతీయంగా ఆసక్తి నెలకొంది.
చివరికి ఈ హంగూ ఆర్భాటాలే అమెరికా అధ్యక్షుడు ఎక్కువగా కోరుకున్నది కావచ్చు.
ఈ నెల ప్రారంభంలో జరిగిన మధ్యంతర కాంగ్రెస్ ఎన్నికల్లో రిపబ్లికన్ పార్టీ ఘోర పరాజయం పాలవడంతో ట్రంప్కు రాజకీయంగా ఎదురుదెబ్బ తగిలింది.
ఈ నేపథ్యంలో మూడు రోజుల ఆసియా పర్యటనలో ప్రపంచ దృష్టిని ఆకర్షించడం, అమెరికా-రష్యా-చైనా మధ్య తొలిసారిగా జరిగిన త్రైపాక్షిక సమావేశంలో పాల్గొనడం ఆయనకు ప్రత్యేక ఆనందాన్నిచ్చినట్లు కనిపించింది.

మంగళవారం జరిగిన ఆసియా-పసిఫిక్ ఆర్థిక సహకార (ఏపీఈసీ) విందులో తనకు లభించిన ప్రముఖ స్థానం, చైనాలో అడుగుపెట్టినప్పుడు దక్కిన స్వాగతం గురించి బుధవారం ఫాక్స్ న్యూస్కు ఇచ్చిన ఇంటర్వ్యూలో డోనల్డ్ ట్రంప్ ప్రస్తావించారు.
"ఆ హడావుడి, అందం, అట్టహాసం, వేలాది మంది ప్రజలు" తన పర్యటన విజయవంతమైందనడానికి నిదర్శనాలని ఆయన చెప్పారు.
ఇది విజయానికి చాలా తక్కువ ప్రమాణంలా అనిపించవచ్చు. కానీ అమెరికా అధ్యక్షుడికి మాత్రం ఇది సంతృప్తినిచ్చి ఉండవచ్చు. అయితే, ఈ మూడు దేశాల సమావేశం తర్వాత అమెరికా నుంచి ఇప్పటివరకు పెద్దగా స్పందన రాలేదు.
చైనా వెంటనే చర్చల వివరాలతో ఉమ్మడి ప్రకటన విడుదల చేసింది. పుతిన్ కూడా సమావేశం తర్వాత గంటపాటు మీడియాతో మాట్లాడారు. కానీ, ట్రంప్ మాత్రం బహిరంగంగా పెద్దగా స్పందించలేదు. శుక్రవారం వైట్హౌస్లో విలేఖరుల సమావేశం నిర్వహిస్తానని మాత్రమే ప్రకటించారు.
ఈ ఏడాది ప్రారంభంలో చైనా పర్యటన సందర్భంగా, అలాగే గత అక్టోబర్లో దక్షిణ కొరియాలో జరిగిన ఏపీఈసీ సదస్సులో జిన్పింగ్తో సమావేశమైన తర్వాత వాషింగ్టన్కు తిరిగి వెళ్లే విమానంలోనే ట్రంప్ మీడియాతో మాట్లాడారు.
ప్రస్తుతానికి ఈ ముగ్గురు నేతల సమావేశం తర్వాత గురువారం విడుదల చేసిన ఉమ్మడి ప్రకటననే వైట్హౌస్ ముందుకు తెస్తోంది. అయితే, అంతర్జాతీయ భద్రత, వ్యూహాత్మక స్థిరత్వాన్ని నిర్ధరించే ప్రయత్నాలకు మద్దతు ఇస్తామనే సాధారణ ప్రకటన తప్ప అందులో పెద్దగా వివరాలు లేవు.
ప్రపంచ సమస్యలపై చర్చించేందుకు ముగ్గురు శక్తిమంతమైన నేతలు ఒకే గదిలో స్నేహపూర్వకంగా సమావేశమైన దృశ్యాలు.. సమీప భవిష్యత్తులో పెద్ద ఘర్షణలు ఉండకపోవచ్చనే భరోసాను ఇవ్వవచ్చు. అయితే, మరిన్ని చర్చలు జరుపుతామనే హామీలు, అణు యుద్ధం "ఎప్పటికీ జరగకూడదు" అనే అంగీకారం మినహా ఆ ప్రకటనలో చెప్పుకోదగ్గ అంశాలేవీ లేవు.
"ప్రపంచంలోని ప్రధాన శక్తుల నాయకులు వివిధ వేదికలపై సమావేశం కావడం సాధారణంగా మంచిదే. ఫలితాలు పరిమితంగా ఉన్నప్పటికీ అలాంటి భేటీలకు ప్రాధాన్యత ఉంటుంది" అని బుష్ ఫౌండేషన్ ఫర్ యూఎస్-చైనా రిలేషన్స్ హెడ్ డేవిడ్ ఫైర్స్టీన్ బీబీసీతో చెప్పారు.
శుద్ధి చేసిన పెట్రోలియం ఉత్పత్తుల తయారీ, సరఫరాను పెంచుకోవాలనే అంశం రష్యా అధ్యక్షుడు పుతిన్ను ఉద్దేశించినదిగా కనిపిస్తోంది. అంతర్జాతీయ మార్కెట్లో శిలాజ ఇంధనాల ప్రధాన సరఫరాదారుల్లో రష్యా ఒకటి. అలాగే అంతర్జాతీయ క్రిమినల్ కోర్టును ఖండించిన అంశం కూడా ఈ ప్రకటనలో కనిపించింది. ఇటీవల అమెరికా ఈ కోర్టును లక్ష్యంగా చేసుకుని విమర్శలు చేస్తోంది.
ప్రపంచంలోని మూడు ప్రధాన శక్తుల నాయకుల మధ్య ఒక విషయంలో ఏకాభిప్రాయం ఉన్నట్లు కనిపిస్తోంది. అంతర్జాతీయ చట్టాలను అమలు చేయడానికి ప్రయత్నించే బహుపాక్షిక ప్రపంచ సంస్థలకు ఆ చట్టాలను అమలు చేయగలిగే అధికారం ఉండకూడదన్నదే అది.
చైనా పర్యటనలో ట్రంప్ పుతిన్ను తన "స్నేహితుడు" అని అభివర్ణించారు. జిన్పింగ్తో కరచాలనం చేసి, ఆలింగనం చేసుకున్న తర్వాత ఆయనతో తనకు "అద్భుతమైన వ్యక్తిగత సంబంధం" ఉందని ట్రంప్ అన్నారు.

ఫొటో సోర్స్, Getty Images
అమెరికాలో భిన్నాభిప్రాయాలు
వాషింగ్టన్కు ట్రంప్ తిరిగి వెళ్లిన తర్వాత ఆయన ఆసియా పర్యటనపై అమెరికాలో భిన్నాభిప్రాయాలు వ్యక్తమయ్యే అవకాశం ఉంది. కొందరు ఆందోళన వ్యక్తం చేస్తుండగా, మరికొందరు విమర్శిస్తున్నారు.
"భౌగోళిక రాజకీయ ప్రత్యర్థులతో మనకున్న సంబంధాలను మనం ఎలా వర్ణిస్తున్నామనే విషయంలో నాకు ఆందోళనగా ఉంది. వ్లాదిమిర్ పుతిన్, షీ జిన్పింగ్లు మన స్నేహితులు కాదు" అని ఉటా రిపబ్లికన్ సెనేటర్ జాన్ కర్టిస్ గురువారం బీబీసీకి ఇచ్చిన ప్రకటనలో తెలిపారు.
"దౌత్యపరమైన చర్చలు ముఖ్యం. కానీ, మన ప్రత్యర్థులు ఎవరో స్పష్టంగా గుర్తించే విషయంలో మాత్రం రాజీ పడకూడదు" అని ఆయన అన్నారు.
ఈ నెల ప్రారంభంలో ట్రంప్ మద్దతుతో మళ్లీ ఎన్నికైన ఇల్లినాయిస్ రిపబ్లికన్ కాంగ్రెస్ సభ్యుడు డారిన్ లాహుడ్.. విదేశాల్లో మిత్రదేశాలతో పాటు ప్రత్యర్థి దేశాలతోనూ అమెరికా చర్చలు జరపాలని అన్నారు. అయితే పుతిన్ను నియంతగా, అంతర్జాతీయ నేరస్థుడిగా ఆయన అభివర్ణించారు.
"ప్రపంచ వేదికపై అమెరికాకు సమాన స్థాయిలో పుతిన్కు ప్రాధాన్యత కల్పిస్తున్నట్లుగా కనిపిస్తున్న ఈ దృశ్యాల గురించి నాకు కొంత ఆందోళనగా ఉంది" అని లాహుడ్ బీబీసీ న్యూస్తో చెప్పారు.
"యుక్రెయిన్లో పుతిన్ ఏం చేశారో మనం గుర్తుంచుకోవాలి. ప్రజాస్వామ్యబద్ధంగా ఎన్నికైన, స్వతంత్ర సార్వభౌమ దేశంపై ఆయన దండెత్తారు. ఇప్పటికీ అక్కడ దూకుడు చర్యలను కొనసాగిస్తున్నారు" అన్నారు.
డెమొక్రాట్లు మాత్రం ఈ విషయంలో తీవ్రంగా స్పందించారు.
"ఫొటోలు, వ్యక్తిగత ప్రతిష్ఠ పెంచుకోవడం కోసం అమెరికా భద్రతను పణంగా పెట్టకూడదు" అని విదేశీ సంబంధాల కమిటీలోని తొమ్మిది మంది సెనేటర్లు వైట్హౌస్కు రాసిన లేఖలో పేర్కొన్నారు.
దేశీయ రాజకీయాల్లో ఎదురుదెబ్బలు తగిలిన తర్వాత అంతర్జాతీయ దౌత్యపరమైన విజయాన్ని సాధించేందుకు ప్రయత్నించిన తొలి అమెరికా అధ్యక్షుడు ట్రంప్ ఒక్కరే కాదు. గతంలో డెమొక్రటిక్ అధ్యక్షులు బిల్ క్లింటన్, బరాక్ ఒబామా కూడా తమ పార్టీ మధ్యంతర ఎన్నికల్లో ఓడిపోయిన కొద్దికాలానికే విదేశీ పర్యటనలు చేపట్టారు.
అయితే, ఆ పర్యటనలతో వారికి లభించిన రాజకీయ ప్రయోజనాలు ఎక్కువ కాలం నిలవలేదు. ఆసియా సదస్సు ద్వారా ట్రంప్ కోరుకున్న ఫొటోలు, ప్రచారం లభించినప్పటికీ.. చెప్పుకోదగ్గ ఫలితాలు లేకపోవడంతో ఈ పర్యటన కూడా త్వరలోనే మరుగునపడిపోయే అవకాశం ఉంది.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్,ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)





























