Masnachwyr yn 'dorcalonnus' wrth i farchnad boblogaidd wynebu cau

Mae masnachwyr mewn marchnad yng Nghaerdydd wedi dweud eu bod yn teimlo'n "dorcalonnus" wrth wynebu'r posibilrwydd y gallai'r safle gael ei ddymchwel i wneud lle i dai.

Mae Marchnad dan do Caerdydd, sy'n boblogaidd ymhlith prynwyr propiau teledu a chasglwyr, wedi bod ar agor ers 12 mlynedd.

Mae ymgynghoriad cyhoeddus ar gynigion i adeiladu tai fforddiadwy ar y safle ar y gweill ar hyn o bryd.

Dywedodd y datblygwr nad oedd am wneud sylw, tra dywedodd Cyngor Caerdydd na all wneud sylw ar geisiadau cynllunio byw.

Dywed masnachwyr a chwsmeriaid eu bod yn cydnabod yr angen am dai, ond yn gobeithio y gallai'r farchnad barhau mewn rhyw leoliad.

Gyda thŷ arwerthu ar un ochr i'r adeilad a marchnad ar y llall, mae'r safle yn gyrchfan boblogaidd i gasglwyr a phobl sy'n chwilio am fargen.

Dywedodd Laurie Rossiter, sy'n rhedeg y busnes gyda'i thad David, eu bod yn gweld myfyrwyr a phobl ifanc yn prynu hen ddodrefn yn aml.

Dywedodd fod poblogaeth fawr o fyfyrwyr yn yr ardal ac mai'r "awyrgylch vintage sydd wedi profi adfywiad" sy'n denu llawer ohonynt.

Ychwanegodd ei bod "bellach ychydig yn rhatach prynu eitemau cadarn" ail-law.

Dywedodd hefyd y byddai'n drist gweld y farchnad yn cau gan ei bod wedi adeiladu enw da ymhlith masnachwyr a'r gymuned ehangach.

"Mae gennym ni gwsmeriaid rheolaidd sydd yma bob penwythnos - maen nhw wedi gwneud y farchnad yn rhan o'u bywydau," meddai Laurie.

Mae'r farchnad yn denu amrywiaeth o gwsmeriaid, gan gynnwys rhai sy'n chwilio am hen grysau pêl-droed, dodrefn rhad, casglwyr brwd a phrynwyr propiau ar gyfer dramâu cyfnod sy'n cael eu ffilmio yng Nghymru.

Mae wedi gweithredu o Ystâd Ddiwydiannol Clydesmuir Road ers 2014, ond mae cynlluniau wedi'u cyflwyno i adeiladu 93 o dai fforddiadwy ar ran o'r safle.

Mae masnachwyr a chwsmeriaid yn dweud bod angen tai fforddiadwy yn y ddinas, ond byddent o leiaf yn hoffi gweld y farchnad yn parhau mewn lle arall.

Dywedodd un siopwr, Kensa Budworth ei bod yn "drist iawn" y gallai'r farchnad gau.

"Rwy'n deall bod galw am dai - ond mae'n fywoliaeth i lawer o bobl wahanol ac mae'n ychwanegu cymeriad at ardal," meddai.

Mae'r farchnad wedi'i gwasgaru ar draws tri neuadd fawr ac yn gartref i fwy na 70 o fasnachwyr annibynnol a microfusnesau.

Dywedodd Lisa Watts, sy'n gwerthu eitemau fel papur lapio a napcynau Nadolig o'r 1970au, fod ei stondin yn wynebu dyfodol ansicr, a na fyddai'n gallu fforddio safle ar y stryd fawr pe bai'r farchnad yn cau.

"Dim ond mewn marchnadoedd fel hon y gall fusnesau bach fforddio lleoedd fel hyn," meddai.

Dywedodd ei bod yn mwynhau gweld cwsmeriaid yn cael eu hatgoffa o'u plentyndod wrth ymweld â'i stondin.

"Mae meddwl am y farchnad yn mynd yn teimlo'n gwbl dorcalonnus, a dweud y gwir."

Mae cais cynllunio wedi'i gyflwyno i ddymchwel ardal tua maint dau gae rygbi er mwyn datblygu tai ar yr ystâd ddiwydiannol.

Yn ôl dogfennau cynllunio, mae'r safle yn dir llwyd ger trafnidiaeth gyhoeddus a chanolfannau cyflogaeth, ac fe allai gyfrannu at adfywio dwyrain Caerdydd.

Dywedodd y datblygwr Pegasus Developments a'i asiantau Arcadis nad oeddent am wneud sylw, tra dywedodd Cyngor Caerdydd na all wneud sylw ar geisiadau cynllunio byw.

Dywedodd gweithredwr y farchnad, David Rain, fod ganddo gynlluniau i gynnal digwyddiadau fel sioeau ceir ac ail-greu brwydrau hamesyddol, ond bod y dyfodol yn ansicr.

Dywedodd ei fod yn gobeithio y gallai'r farchnad barhau yn yr adeilad neu mewn man arall yn y ddinas, ond ei fod yn ofni y gallai'r farchnad orfod gadael Cymru'n gyfan gwbl.

Ychwanegodd ei bod yn anodd iawn i fusnesau oroesi oherwydd costau.

"Mae'n anodd iawn, iawn cadw'ch pen uwchben y dŵr - mae trethi busnes yn parhau i gynyddu, costau ynni, costau staff," meddai.

Dywedodd rhai stondinwyr y byddent yn gorfod cau'n llwyr pe bai'r farchnad yn cau, tra bod eraill yn poeni cael eu prisio allan o Gaerdydd pe bai rhenti'n cynyddu mewn lleoliadau eraill.

Mae'r ymgynghoriad cyhoeddus ar ddyfodol y safle yn rhedeg tan ddechrau mis Mai.