Mam 'byth am dderbyn' ymddiheuriad gan lofrudd ei mab

Mae mam dyn ifanc gafodd ei lofruddio dros ddegawd yn ôl yn dweud na fyddai hi fyth yn derbyn ymddiheuriad ganddo.

Cafodd David Braddon, 38, ddedfryd oes yn y carchar am ladd Conner Marshall, 18, mewn ymosodiad ym Mhorthcawl yn 2015.

Mae bellach wedi ei ddedfrydu i dair blynedd a hanner ychwanegol dan glo am droseddu eto tra'i fod yn y carchar.

Mewn gwrandawiad yn Llys y Goron Caerdydd ddydd Gwener, ble roedd mam Mr Marshall yn bresennol, fe weiddodd Braddon o'r doc ei fod "yn sori, rydw i wir yn sori".

Yn gynharach eleni fe wnaeth Braddon gyfaddef iddo fod â ffôn symudol yn ei feddiant yn y carchar a'i fod wedi defnyddio'r ddyfais i roi cyfarwyddiadau i dri pherson ar sut i symud arian rhwng cyfrifon banc.

Y bobl hynny oedd ei fam Karen Graham, 57, ei gyn-bartner, Gemma Phillips, 41 a'r cyn-swyddog carchar Claire Jones, 38.

Clywodd y llys fod cyfanswm o dros £50,000 wedi cael ei symud mewn gwahanol daliadau.

Daeth y troseddu i'r amlwg pan dderbyniodd swyddog yng Ngharchar Parc neges yn gofyn iddo fynd i gyfarfod â charcharor penodol.

Gwrthod y cais wnaeth y swyddog dan sylw a chafodd y mater ei gyfeirio at awdurdodau'r carchar a'r heddlu.

Fe ddaeth Nadine Marshall, mam Conner, i wybod am droseddau diweddaraf Braddon drwy ddarllen erthygl ar y we.

Cafodd Ms Marshall ganiatâd i ddarllen datganiad dioddefwr gan y barnwr, er nad oedd hi'n ddioddefwr uniongyrchol yn yr achos dan sylw.

"Roedd fy mol i'n troi a ro'n i'n teimlo'n sâl [pan welodd hi'r newyddion], yn gweld lluniau o fy mab wedi ei anafu yn fy mhen unwaith eto," meddai.

"Dwi'n meddwl fy mod i wedi teimlo bob emosiwn posib; sioc, gofid, pryder a dicter."

Mewn cyfweliad gyda'r BBC wedi'r gwrandawiad, dywedodd Ms Marshall nad oedd hi'n fodlon gyda dedfryd ychwanegol Braddon a bod yr achos wedi "creu mwy o gwestiynau yn hytrach nac atebion".

"Y ffaith bod David Braddon wedi cael cyfle i droseddu eto tra bod e yn y carchar, a'r ffaith bod e 'di cael cyfle i ennill lot o arian - mae'n hollol annerbyniol."

Yn y gwrandawiad fe weiddodd David Braddon o'r doc: "Dwi'n sori, rydw i wir yn sori. Mi ydw i."

Mynnodd Ms Marshall na fyddai hi fyth yn derbyn ei ymddiheuriad.

Cafodd Braddon ei ddedfrydu i dair blynedd a saith mis am fod a ffôn yn ei feddiant a'r defnydd o eiddo anghyfreithlon ac fe gadarnhaodd y barnwr y byddai'n cael ei ychwanegu at yr isafswm o 20 mlynedd yr oedd eisoes yn gorfod ei dreulio dan glo.

Cafodd Claire Jones a Gemma Griffiths eu dedfrydu i ddwy flynedd a naw mis o garchar tra bod Karen Graham wedi cael dedfryd o flwyddyn a chwe mis o garchar wedi ei ohirio am ddwy flynedd.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.