Akili mnemba na nyakati za mwisho: Kwa nini baadhi ya watu wanaamini teknolojia hii ni Mpinga Kristo?

"Akili mnemba itakuwa na jukumu kubwa katika matukio ya nyakati za mwisho." Haya si maneno ya mtaalamu mwingine wa teknolojia anayetoa tahadhari kuhusu tishio linalokaribia kwa wanadamu. Yalisemwa na mhubiri mwenye ushawishi mkubwa kutoka Atlanta, Philip Anthony Mitchell.

Kwa kauli "nyakati za mwisho," alimaanisha mwisho wa dunia. Leo, zaidi ya mwaka mmoja baada ya utabiri wa Mitchell, Wakristo wengine mashuhuri wanajadili katika majukwaa mbalimbali, kuanzia TikTok na podcast hadi machapisho, ikiwa akili bandia inaweza kuwa kichocheo cha uharibifu wa dunia.

"Je, akili mnemba inaweza kuwa sehemu ya matukio ya nyakati za mwisho?" anauliza Mchungaji Greg Lowry wa kanisa hilo kubwa. "Inawezekana kabisa," anajibu. Wakati huo huo, Mchungaji Mike Signorelli anawaambia wasikilizaji wa podcast, "Ni sehemu muhimu ya namna Mpinga Kristo atakavyojitokeza."

Wachungaji hawa wote wanakiri kuwa akili mnemba inaweza kutumika kwa manufaa. Lakini pia wanaonya kwamba Mpinga Kristo, anayechukuliwa kuwa mwakilishi wa Shetani, anaweza kuitumia kuwadanganya watu na kuwafanya wamwabudu badala ya Mungu.

Katika Ukristo, neno "nyakati za mwisho" linarejelea unabii kuhusu siku za mwisho za dunia. Mpinga Kristo anaonekana kama adui wa Mungu ambaye ataitawala dunia kabla ya kushindwa na Yesu katika vita vya mwisho. Mawazo haya kwa kiasi kikubwa yanatokana na kitabu cha mwisho cha Biblia, Kitabu cha Ufunuo.

Kitabu hiki kina taswira za kutisha na za kuvutia, ikiwemo "mnyama anayepanda kutoka baharini," mwenye vichwa saba na pembe kumi, ambaye anaaminika kumwakilisha Mpinga Kristo.

Wakristo wengi hukiona Kitabu cha Ufunuo kama maandishi yenye maana za mfano. Baadhi yao wanasema kinarejelea mateso yaliyowakabili Wakristo wa mwanzo chini ya Milki ya Roma. Wengine hukichukulia kama unabii, huku baadhi wakipendekeza kuwa akili bandia inaweza kuwa "mnyama wa pili" anayetajwa katika kitabu hicho, au "nabii wa uongo" anayewadanganya wanadamu na kuwafanya wamwabudu Mpinga Kristo, au hata kuwa Mpinga Kristo mwenyewe.

Hakuna shaka kwamba akili mnemba inabadilisha dunia, huku ikizua wasiwasi kuhusu nguvu na uwezo wake. Wasiwasi huo umeelezwa na aliyekuwa mtafiti wa Anthropic, Jacob Cookson, ambaye alipendekeza kuwa "sote tutakufa katika siku za usoni," pamoja na viongozi wa kampuni kubwa za teknolojia wanaoonya kuhusu hatari zake iwapo kasi ya maendeleo haitapunguzwa.

Profesa Noreen Herzfeld wa St. John's Theological and Seminary, ambaye ni mtaalamu wa akili bandia na maadili ya teknolojia, anasema:

"Mazungumzo kuhusu nyakati za mwisho huongezeka wakati wa mabadiliko makubwa. Huwapa watu njia ya kuelewa shinikizo la kijamii, na kuhisi kwamba yanayotokea si ya bahati mbaya, bali ni sehemu ya mpango wa Mungu."

Herzfeld analinganisha athari za akili bandia kwa ajira na zile za Mapinduzi ya Viwanda, yaliyokuwa na kiwango kikubwa cha kutokuwa na uhakika na wasiwasi.

Anasema:

"Tunaishi katika kipindi cha mabadiliko ya haraka. Tunaona teknolojia za kompyuta [zikibadilika kwa kasi kubwa kuliko wakati mwingine wowote]."

Anaongeza:

"Tunaambiwa kwamba teknolojia hii itaondoa ajira, itabadilisha kila kitu na kuleta mapinduzi katika kila kitu. Aina hii ya mabadiliko ya haraka ni ngumu sana kwa watu."

Pia kuna hisia za kupoteza udhibiti, huku akili bandia ikiwa sehemu ya karibu kila nyanja ya maisha yetu, iwe tunapenda au la. Hali hii inaambatana na tahadhari kutoka Silicon Valley kwamba "kuna uwezekano wa asilimia 10 au 15 kwamba akili bandia itatuangamiza sote."

Anasema:

"Ikiwa watu wanaweza kuhisi kwamba Mungu bado ndiye mwenye udhibiti, kwamba kuna kusudi nyuma ya yote haya, na kwamba kinachotokea kinapaswa kutokea, basi wanaweza kujiuliza: Nitaikabili vipi hali hii? Nifanye nini? Ninawezaje kuwa upande wa mema badala ya upande wa maovu?"

Kwa mujibu wa utafiti wa Pew Research Center wa mwaka 2022, karibu asilimia 40 ya watu wazima nchini Marekani wanaamini kuwa wanaishi katika nyakati za mwisho. Idadi hiyo inaongezeka hadi asilimia 47 miongoni mwa Wakristo.

Wataalamu wanasema wazo hili hurudiwa kizazi baada ya kizazi, huku hofu za wakati huo zikihusishwa na taswira ya Mpinga Kristo.

Profesa Jeffrey C. Pugh wa Chuo Kikuu cha Elon, North Carolina, anasema:

"Bibi yangu aliamini kwamba Franklin Delano Roosevelt alikuwa Mpinga Kristo."

Rais Roosevelt aliingia madarakani wakati wa Mdororo Mkuu wa Uchumi, kipindi kilichokuwa na hali kubwa ya kutokuwa na uhakika na umaskini. Suluhisho lake, lililojulikana kama "New Deal," lilionekana kuwa la kimapinduzi.

Pew inasema mtazamo wa bibi yake "unaonyesha kutokuwa na mantiki kwa kujaribu kuhusisha matukio ya sasa na simulizi maalumu la Biblia."

Lakini ingawa mazungumzo kuhusu nyakati za mwisho yameendelea kuwa mada inayojirudia nchini Marekani, yalipata nguvu zaidi katika miaka ya 1960.

"Kilikuwa kipindi maalumu cha misukosuko ya kijamii," anasema Pew. "Tulishuhudia kuuawa kwa viongozi wawili wa kisiasa, au watatu ukimjumuisha Martin Luther King Jr. Miji ilikuwa ikichomwa moto kutokana na hasira za watu weusi kuhusu ukandamizaji wa watu weupe. Na vijana walianza kujieleza kwa njia ambazo hawakuwahi kufanya hapo awali," kuanzia maandamano ya kupinga vita hadi utamaduni wa vijana uliokwenda kinyume na mfumo uliokuwepo.

"Teknolojia za kutisha"

Miaka ya 1970 ilishuhudia kusambaa kwa kitabu The Late Great Planet Earth, ambacho kiliunganisha moja kwa moja unabii wa nyakati za mwisho na matukio ya wakati huo pamoja na siasa za kimataifa.

"Kuanzia wakati huo, kila msukosuko wa kijamii umehusishwa na wazo la nyakati za mwisho," anasema Pew.

Wakati wa Vita Baridi, Umoja wa Kisovieti na ukomunisti vilichukuliwa kuwa Mpinga Kristo. Baada ya mashambulizi ya Septemba 11, baadhi ya Wakristo waliuona Uislamu kama Mpinga Kristo.

Dkt. Pew anaongeza:

"Hofu za kila zama huwa zinajitokeza katika simulizi hizi za nyakati za mwisho."

Mchungaji wa Australia Stephen Driscoll, mwandishi wa kitabu "Made in Our Image: God, Artificial Intelligence and You," anasema hajui kwa hakika Mpinga Kristo ni nani au ni nini.

Anaamini kuwa akili mnemba, "mojawapo ya teknolojia za kutisha zaidi ambazo tumewahi kuunda," ni "mgombea anayewezekana" wa nafasi hiyo. Hata hivyo, anaona kwamba kutumia Biblia kujaribu kutabiri yajayo si jambo lenye msaada mkubwa.

Driscoll anasema:

"Biblia inatoa mengi zaidi ya makisio tu kuhusu utambulisho wa Mpinga Kristo." Ina "hutuandaa kwa mabadiliko, hutupatia mtazamo wa kitheolojia kuhusu hatua za kuchukua, na zana za kutusaidia kukabiliana kwa uhalisia na kuunganishwa kwa akili bandia katika maisha yetu."

"Mtii Mungu"

Agano la Kale linazungumzia "ubunifu wa kiteknolojia katika kilimo, kama vile mbao za kupuria na mambo mengine mbalimbali... na linasema kwamba yote haya yanatoka kwa Bwana."

Anaongeza:

"Mungu ndiye Mungu wa hekima ya kiteknolojia," na ana udhibiti kamili "juu ya kila zama za kiteknolojia, kuanzia zama za mawe hadi shaba na chuma, kisha chuma cha pua, zama za nyuklia, hadi akili bandia."

Driscoll anasema nabii Danieli, katika Agano la Kale, aliishi uhamishoni chini ya utawala wa falme kadhaa zilizotumia teknolojia tofauti.

Alikuwa "hawezi kudhibiti nyakati wala kuzuia falme zilizokuwa zikija, hata kama zingeleta maafa."

"Lakini aliweza kubaki mwaminifu na mwenye matumaini, kuishi maisha mema, kuwapenda watu na kumtii Mungu popote alipokuwa."

"Hawezi kudhibiti wakati, lakini anaweza kuishi maisha mema."

Kwa hiyo, iwe tunakabiliwa na mwisho wa dunia au la, mambo hatimaye yatakuwa mazuri.

Driscoll anasema:

"Si kila kinachotokea ni kizuri," lakini anasisitiza kwamba jambo muhimu zaidi ni kwamba "Mungu ni mwema, na ndiye mwenye udhibiti wa kila kitu."