Cyfrif Reform lleol wedi beirniadu gweinidog am drafod trasiedi deuluol

Mae tudalen Facebook Reform ar gyfer etholaeth yn y Senedd wedi beirniadu gweinidog Plaid Cymru am drafod trasiedi deuluol mewn cyfweliad â newyddiadurwraig.

Ymbellhaodd dau AS Reform o'r etholaeth o'r sylw ar y cyfryngau cymdeithasol, a gyhuddodd Siân Gwenllian o ddefnyddio ei phrofiad "er budd gwleidyddol".

Magodd y gweinidog cabinet dros lywodraeth leol, tai a chynllunio bedwar o blant fel rhiant sengl ar ôl i'w gŵr, Dafydd, farw o ganser yn 1999.

Mae Plaid Cymru wedi disgrifio'r sylw, sydd bellach wedi ei ddileu, fel un "ffiaidd" tra bod James Evans, AS o Reform, yn dweud ei fod yn "hollol annerbyniol".

Dywedodd llefarydd ar ran Reform UK: "Nid cyfrif swyddfa pencadlys Llundain na grŵp y Senedd yw hwn."

Fe wnaeth cydweithiwr Mr Evans, Iain McIntosh AS, hefyd ymbellhau ei hun o'r sylw a wnaed gan Reform UK Brycheiniog Tawe Nedd ar Facebook, a dywedodd ei fod wedi gofyn iddo gael ei ddileu.

Nid yw'n glir pwy sy'n rhedeg y cyfrif. Dywedodd Mr Evans nad oedd yn siŵr pwy oedd yn rhedeg y dudalen a'i fod yn ymchwilio i'r mater.

Mae Mr Evans a Mr McIntosh ill dau yn ASau Reform sy'n cynrychioli ardal Brycheiniog Tawe Nedd.

Wrth drafod marwolaeth ei gŵr mewn erthygl ar gyfer Walesonline, dywedodd Siân Gwenllian: "Roedd yn gyfnod anodd iawn i mi ond dysgodd gymaint i mi amdanaf fy hun.

"Dysgodd i mi gael empathi, ac fe dyfodd hynny yn aruthrol yn ystod y cyfnod hwnnw.

"Gallaf deimlo empathi â llawer o bobl mewn sefyllfaoedd bregus ond dysgodd i mi hefyd, 'os gallaf wneud hynny, gallaf wneud unrhyw beth'."

Cyhoeddwyd yr erthygl ar gyfrif Facebook Walesonline, a oedd yn tynnu sylw at y drasiedi yn y pennawd.

Yn yr adran sylwadau o dan yr erthygl, dywedodd cyfrif cangen Reform: "Rydym i gyd wedi cael trasiedïau teuluol, ond nid ydym yn ei ddefnyddio fel cerdyn er budd gwleidyddol."

Fe wnaeth hynny ysgogi AS Plaid Cymru, Beca Brown, i ateb: "Am sylw ffiaidd.

"Mae gwleidyddion ym mhob plaid - gan gynnwys eich plaid eich hun - sydd â phrofiadau personol sy'n adlewyrchu profiadau eu hetholwyr.

"Mae rhannu'r profiadau hynny'n gyhoeddus yn gwneud i eraill sydd wedi dioddef yn yr un modd deimlo'n llai unig, a gall ddod â phobl ynghyd a thaflu goleuni ar ddioddefaint eraill."

Dywedodd llefarydd ar ran Plaid Cymru wrth BBC Cymru: "Rhaid i dudalen Reform UK Brycheiniog Tawe Nedd fyfyrio ar eu sylw ffiaidd - ac fel yr AS Reform lleol, dylai James Evans gondemnio datganiad mor ffiaidd."

Dywedodd Mr Evans wrth BBC Cymru: "Mae'r sylwadau hyn yn gwbl annerbyniol."

Ychwanegodd nad oedd ef na chadeirydd ei gangen wedi bod yn ymwybodol bod y sylw wedi'i gyhoeddi, a'i fod ef a'r gangen yn lleol yn "ymbellhau'n llwyr oddi arnynt".

"Mae gennym gadeirydd cangen newydd. Dydyn ni ddim yn gwbl ymwybodol pwy yw gweinyddwr y dudalen," meddai.

"Pe baem yn gwybod pwy oedd gweinyddwr y dudalen, byddai'r sylwadau hyn yn cael eu dileu, ac rydym yn ymchwilio i'r mater.

"Mae gwleidyddion yn gywir i dynnu sylw at brofiadau personol ac nid yw'n iawn bod y sylw hwn wedi'i wneud am gyd-aelod o'r Senedd."

Dywedodd Iain McIntosh, sydd hefyd yn AS Reform dros yr un etholaeth, wrth BBC Cymru ei fod hefyd yn ymbellhau oddi wrth y sylw.

"Rwyf wedi gofyn i'r gweinyddwyr dynnu'r neges," meddai.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.