కెప్టెన్సీ నుంచి వైదొలగిన హర్మన్‌ప్రీత్ కౌర్: ఫాస్ట్ బౌలర్‌ నుంచి కెప్టెన్ వరకు ఆమె ప్రయాణం ఎలా సాగిందంటే..
ఫొటో సోర్స్, Getty Images
భారత మహిళల క్రికెట్ జట్టు స్టార్ ప్లేయర్ హర్మన్‌ప్రీత్ కౌర్ అన్ని ఫార్మాట్ల కెప్టెన్సీ నుంచి తప్పుకున్నారు.
మంగళవారం ఆమె తన ఇన్స్టాగ్రామ్ ఖాతాలో పెట్టిన పోస్టులో "ఈ రోజు నేను అన్ని ఫార్మాట్లలో భారత మహిళల క్రికెట్ జట్టు కెప్టెన్ పదవి నుంచి తప్పుకుంటున్నాను. ఈ నిర్ణయం తీసుకోవడం సులభమేమీ కాదు. ఇందులో ఎన్నో ఏళ్ల జ్ఞాపకాలు, భావోద్వేగాలు, త్యాగాలు, జీవితాంతం నాతో నిలిచిపోయే క్షణాలు ఇమిడి ఉన్నాయి" అని తెలిపారు.
"నేను ఈ జట్టు కోసం, భారత మహిళల క్రికెట్ కోసం నా సర్వస్వాన్ని ధారపోశాను. దీని కోసం నా రక్తాన్ని, చెమటను, సమయాన్ని ఇచ్చారు. నా వ్యక్తిగత కలలను కూడా త్యాగం చేశాను. ఎన్నోసార్లు నా వ్యక్తిగత విజయాలను, పురోగతిని, కోరికలను పక్కన పెట్టవలసి వచ్చింది. ఎందుకంటే, నా మొదటి ప్రాధాన్యత ఎప్పుడూ జట్టుకే" అని రాశారు.
"కెప్టెన్‌గా, నేను ఎన్నో కష్టమైన నిర్ణయాలు తీసుకోవలసి వచ్చింది. ఆ నిర్ణయాలు ఎల్లప్పుడూ ఇతరులకు అర్థం కాలేదు, అవి అంత సులభంగా తీసుకోలేదు. వాటికి నేను మూల్యం చెల్లించుకోవలసి వచ్చింది. కానీ, నేను ఒక సదుద్దేశంతోనే ప్రతి నిర్ణయం తీసుకున్నాను. జట్టును మెరుగుపరచడానికి, ముందుకు వచ్చే ఇతర ఆటగాళ్లకు తమపై తాము నమ్మకం ఉంచి, అత్యుత్తమంగా రాణించే అవకాశాన్ని ఇవ్వడానికి ఆ నిర్ణయాలు" అని తెలిపారు.
"నేను అన్నీ చూశాను. కష్ట సమయాలను, ఓటమి బాధ, విమర్శలు, ప్రశ్నలను, నాకు అనుకూలంగా ఏదీ జరగడం లేదనిపించిన రోజులను చూశాను. కానీ, నేను అత్యుత్తమ క్షణాలను కూడా అనుభవించాను. దేశానికి ప్రాతినిధ్యం వహించడంలో దక్కిన విజయం, ఆనందం, గర్వం, చేసిన ప్రతి త్యాగం సార్థకమనిపించే క్షణాలను కూడా చూశాను" అని తెలిపారు.
తాను కెప్టెన్సీ నుంచి తప్పుకుంటున్నప్పటికీ, ప్రస్తుతం జట్టు మంచి స్థితిలో ఉండటం పట్ల సంతృప్తిగా ఉన్నానని హర్మన్‌ప్రీత్ అన్నారు.
హర్మన్‌ప్రీత్ కౌర్ ఇప్పటివరకు సాగించిన ప్రయాణం గురించి తెలుసుకుందాం.
ఫొటో సోర్స్, Hartaj Singh Sodhi
కోచ్ మోగా మైదానంలో చూసినప్పుడు..
హర్మన్‌ప్రీత్ కౌర్‌ది పంజాబ్‌లోని మోగా నగరం. అక్కడి మైదానంలో హర్మన్‌ప్రీత్ ఆడుతున్నప్పుడు కోచ్ కమల్దీష్ సింగ్ సోధి ఆమె ప్రతిభను గుర్తించారు.
ఆయన్ని కలుసుకోవడం.. క్రీడాకారిణి కావాలనే హర్మన్‌ప్రీత్ కౌర్ కలకు కొత్త ఉత్సాహాన్నిచ్చింది.
ఆ రోజుల గురించి హర్మన్‌ప్రీత్ తొలి కోచ్ కమల్దీష్ సింగ్ బీబీసీతో ప్రత్యేకంగా మాట్లాడారు.
"నేను ప్రతిరోజూ లాగే మోగా గ్రౌండ్ చుట్టూ తిరుగుతున్నాను. అబ్బాయిలతో క్రికెట్ ఆడుతున్న ఒక అమ్మాయిని చూశాను. నేను ఆమెను క్రికెట్ ఆడతావా అని అడిగాను?" అన్నారు.
"ఆమె 'సరే' అన్నారు, ఆ తర్వాత నేను హర్మన్ తండ్రితో, చదువు నుంచి క్రీడల వరకు ఆమె ఖర్చులన్నీ నేనే భరిస్తానని, మా స్కూల్ వ్యాన్ ఆమెను తీసుకువెళ్లి తిరిగి తీసుకువస్తుందని చెప్పాను" అని వివరించారు.
మోగాకు ఇరవై కిలోమీటర్ల దూరంలో జ్ఞాన్ జ్యోతి సీనియర్ సెకండరీ స్కూల్, క్రికెట్ అకాడమీ అనే పాఠశాలను కమల్దీష్ సింగ్ నడుపుతున్నారు.
ఆయన అభ్యర్థనకు హర్మన్ తండ్రి అంగీకరించారని తెలిపారు. 2007లో హర్మన్‌ను తీసుకువచ్చి, అప్పటి నుంచి ఆమెకు శిక్షణ ఇస్తున్నట్లు కమల్దీష్ సింగ్ చెప్పారు .
ఫొటో సోర్స్, Hartaj Singh Sodhi
ఫాస్ట్ బౌలర్‌ నుంచి బ్యాటింగ్‌కు....
హర్మన్‌ప్రీత్ ప్రారంభ శిక్షణ గురించి కమల్దీష్ మాట్లాడుతూ, తాను ఆమెను అబ్బాయిలతో ప్రాక్టీస్ చేయమని అడిగేవాడినని చెప్పారు.
"హర్మన్‌కు క్రీడాకారిణి కావాలనే గొప్ప అభిరుచి ఉండేది, అందుకే ఆమె ఆ విధంగానే ప్రాక్టీస్ చేసేది. ఆమెతో వందల క్యాచ్‌లు ప్రాక్టీస్ చేయించేవాడిని. ఇక్కడి నుంచే ఆమె మొదట రాష్ట్ర స్థాయి, ఆ తర్వాత జాతీయ స్థాయి క్రికెట్ ఆడింది. ఇక్కడి నుంచే 2009లో భారత క్రికెట్ జట్టుకు కూడా ఎంపికైంది" అన్నారు.
తాను, తన కుమారుడు యాద్విందర్ సింగ్ కలిసి హర్మన్‌ప్రీత్ కౌర్‌కు క్రికెట్‌లో శిక్షణ ఇచ్చేవారని కమల్దీష్ చెప్పారు.
"నేను ఆమెను అబ్బాయిల జట్టులో ఆడనిచ్చేవాడిని. దానికి కారణం ఏంటంటే, మీ కంటే బలవంతులతో ఆడినప్పుడు మీ ఆట మరింత మెరుగుపడుతుంది" అని ఆయన చెప్పారు.
"మొదట్లో హర్మన్ నా కోసం ఫాస్ట్ బౌలింగ్ చేసేది, ఆ తర్వాత బ్యాటింగ్‌కు మారింది. కానీ ఆమె భారత జట్టులో చేరినప్పుడు, కోచ్‌లు ఆమెను స్పిన్ బౌలింగ్ కూడా చేయమని చెప్పారు " అని వెల్లడించారు.
"పాటియాలాలో జరిగిన రాష్ట్ర స్థాయి టోర్నమెంట్ ఫైనల్స్‌లో మా జట్టు ఉంది. హర్మన్ సిక్స్ కొట్టినప్పుడు, మైదానం దగ్గర ఉన్న ఒక ఇంటి అద్దం పగిలిపోయింది. ఇంటి యజమాని కోపంతో మైదానానికి వచ్చి, ఎవరు చేశారని అడగడం మొదలుపెట్టాడు. ఆ అమ్మాయి సిక్స్ కొట్టిందని తెలిశాక, అతను కూడా హర్మన్‌ను ప్రోత్సహించి వెళ్లిపోయాడు" అని నాటి ఒక ఘటనను కమల్దీష్ గుర్తు చేసుకున్నారు.
ఫొటో సోర్స్, Hartaj Singh Sodhi
అమ్మమ్మ కల ఎలా నిజమైంది?
హర్మన్‌ప్రీత్ కౌర్ క్రికెటర్ కావాలనుకుంది, కానీ ఆమె నాన్నమ్మకు కూడా ఒక కల ఉండేది. కలర్స్ సినీప్లెక్స్‌కు ఇచ్చిన ఒక ఇంటర్వ్యూలో హర్మన్ మాట్లాడుతూ, "నీలిరంగు జెర్సీ నా కల, కానీ మా నాన్నమ్మ నన్ను పోలీస్ యూనిఫాంలో చూడాలనుకుంది"
2018లో, హర్మన్‌ప్రీత్ భారత క్రికెట్ జట్టుకు ఆడుతున్నప్పుడు, అప్పటి ప్రభుత్వం ఆమె క్రీడా విజయాలకు గాను ఒక ప్రత్యేక పదవితో సత్కరించారు. అప్పుడు ముఖ్యమంత్రిగా కెప్టెన్ అమరీందర్ సింగ్ ఉన్నారు.
ఒకరోజు కెప్టెన్ అమరీందర్ సింగ్ పీఏ నుంచి తనకు ఫోన్ వచ్చిందని, కెప్టెన్ సాహెబ్ మాట్లాడాలనుకున్నారని చెప్పారని కమల్దీష్ సింగ్ గుర్తుచేసుకున్నారు.
ఆ సంఘటన గురించి కమల్దీష్ మాట్లాడుతూ "ఆ సమయంలో కెప్టెన్ అమరీందర్ సింగ్ నుంచి ఫోన్ కాల్ రావడం చాలా ఆశ్చర్యం కలిగించింది. నేను ఆయనతో ఫోన్‌లో మాట్లాడినప్పుడు, 'మీరు హర్మన్ కోచ్ కదా?' అని అన్నారు. నేను సరే అన్నాను, అప్పుడు ఆయన, 'మీరు హర్మన్‌ను, ఆమె కుటుంబాన్ని మా ఇంటికి తీసుకురండి. మేం ఆమెను డీఎస్పీగా నియమిస్తున్నాం' అన్నారు" అని తెలిపారు. వెల్లడించారు.
ఆ రోజు హర్మన్‌ప్రీత్ కౌర్‌కు కెప్టెన్ అమరీందర్ సింగ్ పంజాబ్ పోలీసు విభాగంలో డీఎస్పీ పదవిని ఇచ్చారని కమల్దీష్ చెప్పారు.
ఫొటో సోర్స్, Hartaj Singh Sodhi
కెప్టెన్, బ్యాటర్‌గా ఒత్తిడి లేకుండా...
"హర్మన్‌తో కలిసి పనిచేసినప్పుడు నాకు బాగా గుర్తుండిపోయిన విషయం ఏంటంటే, ఆమె ఎల్లప్పుడూ జట్టు కోసం ఏదో ఒకటి చేయడానికి ప్రయత్నించేది" అని భారత మాజీ ప్రధాన కోచ్ డబ్ల్యూవీ రామన్ బీబీసీతో అన్నారు.
2017 మహిళల ప్రపంచకప్‌లో ఆస్ట్రేలియాపై 171 పరుగులు చేసి హర్మన్‌ప్రీత్ కౌర్ అందరినీ ఆశ్చర్యపరిచింది. ఈ మ్యాచ్ కారణంగానే భారత మహిళల క్రికెట్ జట్టు మరోసారి ప్రపంచ దృష్టిని ఆకర్షించింది.
హర్మన్‌ప్రీత్ 160 వన్డేలలో 7 సెంచరీలతో సహా 4,300కు పైగా పరుగులు సాధించింది. దీంతోపాటు, ఆమె టీ20 అంతర్జాతీయ మ్యాచ్‌లలో 3600కు పైగా పరుగులు చేసింది.
"విరాట్ కోహ్లీ తన ఆటపై ఎలా మనసు పెట్టాడో, హర్మన్ కూడా అలాగే చేసింది. ఆమె బ్యాట్ దూకుడు పెంచితే, తన ముందు ఎవరూ నిలబడలేరు. హర్మన్ పూర్తి ఉత్సాహంతో ఆడుతుంది. ఆమెకు పెద్ద షాట్లు ఆడే సామర్థ్యం ఉంది" అని కమల్దీష్ సింగ్ సోధి అన్నారు,
మొదట్లో హర్మన్ కొంచెం ఒత్తిడికి గురైనప్పటికీ, ఆ తర్వాత తనను తాను నియంత్రించుకుందని అన్నారాయన.
హర్మన్ నాయకత్వంలో, తోటి క్రీడాకారులు ఒత్తిడికి లోను కాకుండా కలిసి ఆడతారని కమల్దీష్ చెప్పారు. క్రీడలో హర్మన్‌ప్రీత్ సాధించిన విజయాల తర్వాత మహిళల క్రికెట్‌కు ప్రజాదరణ పెరిగిందని ఆయన అభిప్రాయపడ్డారు.
(బీబీసీ కోసం కలెక్టివ్ న్యూస్‌రూమ్ ప్రచురణ)
(బీబీసీ తెలుగును వాట్సాప్,ఫేస్‌బుక్, ఇన్స్టాగ్రామ్, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)
