'කොළඹ ගමනාගමනය පහසු කරන්න මෙට්‍රෝ බස්' හෙට සිට තවත් මාර්ග 5කට

කොළඹ නගරයේ තවත් බස් මාර්ග 5ක් සඳහා හෙට (සැප්: 29) සිට මෙට්‍රෝ බස් සේවා ආරම්භ කිරීමට සැලසුම් කර තිබේ.

එම නව බස් මාර්ග වන්නේ,

1. මිලේනියම් සිටි ➜ කොළඹ කොටුව (22.3 km)

2. කහතුඩුව ➜ පිටකොටුව (35.7 km)

3. දෙමටගොඩ ➜ පානදුර (28.7 km)

4. බත්තරමුල්ල ➜ ඒකල (29.9 km)

5. කොල්ලුපිටිය වටරවුම් මාර්ගය (14 km)

ඒ අනුව, එක් ගමන් මාර්ගයකට බස් රථ 25ක් යෙදවීමට නියමිත අතර, අවශ්‍යතාව අනුව බස් රථ සංඛ්‍යාව ඉහළ නැංවීමට බලාපාරොත්තු වන බව මෙට්‍රෝ ට්‍රාන්සිට් බස් සමාගමේ සභාපති යූ.පී. තිලකරත්න බීබීසී සිංහල වෙත සඳහන් කළේ ය.

කාර්ය බහුල වේලාවන් තුළ මිනිත්තු 15කට වරක් බස් රථ යෙදවීමට නියමිත බව සභාපතිවරයා සඳහන් කළේ ය.

ජනධිපති අනුර කුමාර දිසානායකගේ ප්‍රධානත්වයෙන් තලංගම මෙට්‍රො ඩිපෝවේදී හෙට (සැප්: 29) පෙරවරුවේ මෙම නව බස් සේවා ආරම්භ කිරීමට නියමිත ය.

දැනට ක්‍රියාත්මක මෙට්‍රෝ බස් සේවා දෙකත් සමග මෙට්‍රෝ බස් සේවා ක්‍රියාත්මක බස් මාර්ග සංඛ්‍යාව 7ක් දක්වා ඉහළ යනු ඇත.

මෙම මාර්ග ජාලය මගින් කොළඹ නගරයට සහ තදාසන්න ප්‍රදේශවලට වඩාත් කාර්යක්ෂම, පහසු සහ විධිමත් පොදු ප්‍රවාහන සේවාවක් ලබා දීම රජයේ අරමුණ වී තිබේ.

සමාගම සතු දැනට ඇති මෙට්‍රො බස් සංඛ්‍යාව 122කි. Urban Luxury යන කාණ්ඩය යටතේ ධාවනය වන මෙම බස් රථයක සාමාන්‍ය ගාස්තුව මෙන් දෙගුණයක ගාස්තුවක් අය කෙරෙනු ඇත.

"අපේ ප්‍රධාන පරමාර්ථය තමා තනි වාහනයකින් කොළඹට එන පුද්ගලයාව ආකර්ෂණය කර ගැනීම" සභාපතිවරයා සඳහන් කළේ ය.

බස් ප්‍රමුඛතා මන්තීරු නීතිය සක්‍රීය කිරීමට පොලිසිය එකඟ වී ඇති බවත්, ඕනෑ ම මගී බස් රථයකට එම මන්තීරුව ඔස්සේ බස් රථ ධාවනය කිරීමට පහසුකම් සැලසෙනු ඇත.

ඒ අනුව, නියමිත වේලාවට මගීන් අදාළ ගමනාන්තය වෙත යැවීමට හැකියාව ලැබෙනු ඇතැයි ද යූ.පී. තිලකරන්ත සඳහන් කළේ ය.

පෞද්ගලික තනි වාහන භාවිත කර කොළඹට පැමිණීම අඩු කිරීම මගින්, කොළඹට පැමිණෙන වාහන සංඛ්‍යාව අඩු කර ගැනීමෙන් රථවාහන තදබදය අඩු කර ගත හැකි බව ද ඔහු පැවසීය.

අදාළ බස් මාර්ගවල බස් රථ නතර කරන ස්ථාන පහත දැක්වේ.

CM01 - මාකුඹුර සිට පිටකොටුව

CM02 - මිලේනියම් සිටි සිට කොළඹ කොටුව

CM03 - කඩවත සිට මාකුඹුර

CM04 - දෙමටගොඩ සිට පානදුර දක්වා

CM05 - බත්තරමුල්ල සිට ඒකල

CM06 - කොල්ලුපිටිය වටරවුම් මාර්ගය

CM08 - කහතුඩුව සිට පිටකොටුව දක්වා