Cuirm am Barraigh airson fàilte a chur air ìomhaigh ùr an Naoimh Bàrr
Thòisich an iomairt gus an t-airgead a thogail agus an seann ìomhaigh air a dhol bhuaithe cho mòr
- Air fhoillseachadh
Bidh cuirm ann am Barraigh Dihaoine airson fàilte a chur air ìomhaigh shnaidhte ùr den Naomh Bàrr.
'S ann às a dhèidh a tha Barraigh air ainmeachadh, agus 's e an-diugh là na fèille aige, an là a dh'èug e ann an 623AD.
Tha an ìomhaigh ùr dheth a' gabhail àite na seann ìomhaigh choncreit a chuireadh suas sna 1970an air eilean beag sa Bhàgh a Tuath a chuimhneachadh air an naomh Èireannach.
Bidh an sagairt paraiste, an Canon Iain Pòl MacFhionghain, os cionn aifrinn agus beannachaidh.
Ìomhaigh an Naoimh Bàrr a' tilleadh dhan Bhàgh a Tuath
- Air fhoillseachadh14 An Lùnastal
An làthair, bidh Àrd-Chonsul na h-Èireann ann an Dùn Èideann, Jerry O'Donovan - a bhuineas do sgìre dhùthchais an Naoimh Bàrr fhèin, taobh siar Chontae Chorcaí.
Chaidh an ìomhaigh shnaidhte ùr a dhèanamh leis an t-snaidheadair Stephen Tinney an dèidh mar a thòisich iomairt airson £100,000 a thogail san Iuchar 2024.
Chaidh an t-airgead a bha a dhìth a thogail san t-Sultain an-uiridh an dèidh tabhartais de £85,000 bhon Chaiptean Iain MacNìll, a chaidh a thogail ann am Barraigh, agus a bhean Kat Heathcote NicNìll MBE.
Thug Oighreachd a' Chrùin cuideachd airgead seachad.
