Spòrs

Tùs an deilbh, Cupa Amaitearach na Gàidhealtachd

Tha am Bac ag amas air àite sa chairteal-chuairt dheireannaich de Chupa Amaitearach na Gàidhealtachd Disathairne is iad a' dol an aghaidh Golspie Stafford.

Bidh an geama ann am Baile Eòghainn aig 1f is bidh an sgioba a nì a' chùis an aghaidh Stromness Athletic san ochd mu dheireadh.

'S iad am Bac an aon sgioba às na h-Eileanan an Iar a tha air fhàgail san fharpais.

Tha Malaig fhathast ann cuideachd - bidh iadsan a' cluich Wick Groats an ath-sheachdain.

Ann an Cupa MalCivils Disathairne thèid Aths an aghaidh Saints an Ìochdair aig Pàirc Chnoc nan Gobhar aig 11:30m.

Tha Barraigh, an Taobh Siar is am Bac mar-thà san iar-chuairt dheireannaich den fharpais.

Ann an Lìog Uibhist is Bharraigh bidh Uibhist a Tuath an aghaidh Beinn na Faoghla oidhche Haoine agus Disathairne thèid Southend an aghaidh Bharraigh.

San Eilean Sgitheanach bidh Cupa Cuillin Competitions ann Disathairne aig Pàirc an Rìgh Seòras V.

Tòsichidh an fharpais aig 10:00m le dùil gum bi a' chuairt dheireannach ann aig 4f.

Tha geamaichean mòra ann an iomain nam ban air an deireadh-sheachdain agus sgiobaidhean ag amas air àite ann an cuairtean deireannach dà fharpais ùr.

'S e leasachadh mòr a tha an Cupa na Prìomh Lìge 'son iomain nam ban is dusan cluicheadair air gach sgioba seach deich mar a tha anns na farpaisean eile.

Às dèidh dhaibh Loch Abar a chur a-mach 2-0 sa chairteal-chuairt dheireannaich, tha dùbhlan mòr eile ro na Sgitheanaich Didòmhnaich nuair a chluicheas iad Bàideanach.

• Taghadh Chupa na Prìomh Lìge

• Ceann Loch Seile air na Sgitheanaich a chur a-mach à Cupa Valerie Fhriseil

Sa gheama eile bidh Ceann Loch Seile - an aon sgioba nach do chaill geama idir gu seo air an t-seusan seo - an aghaidh Inbhir Nis.

Bidh an dà gheama ann an Drochaid an Aonachain: Ceann Loch Seile an aghaidh Inbhir Nis aig 12:45f is Bàideanach an aghaidh an Eilein Sgitheanaich aig 3f.

Bidh na h-iar-chuairtean deireannach ann cuideachd Didòmhnaich ann an Cupa ùr nan Sgiobaidhean Singilte.

Bidh Dùn Ad an aghaidh Tatha is For san Eochair ann an Glaschu aig 1f is bidh Lòbhat an aghaidh Ghleann Urchadain ann an Canaich aig 1:45f.

Cupa a' Bhaile Mhòir

Ann an iomain nam fear Disathairne cluichidh Inbhir Aora an aghaidh Chill Mhàilidh san iar-chuairt dheireannaich de Chupa a' Bhaile Mhòir.

Bidh an sgioba a nì a' chùis an sin an aghaidh Lòbhat sa chuairt dheireannaich.

Tha ceithir geamaichean cuideachd sa Phrìomh Lìog Disathairne.

Bidh Cabar Fèidh an aghaidh a' Ghearasdain, Caol Bhòid an aghaidh Loch Abair is an t-Eilean Sgitheanach an aghaidh Cheann a' Ghiùthsaich.

Chaidh an geama eadar Ceann Loch Seile is Caol-Gleann a chur dheth.

Abair gu robh tadhail gu leòr ann an geamannan Lìog Uibhist is Bharraigh oidhche Mhàirt.

Bhuannaich Beinn na Faoghla 3-0 an aghaidh Saints an Ìochdair.

Chuir Barraigh ochd tadhail air Èirisgeidh gun fhreagairt aig Cnoc na Monadh.

Fhuair Kieran MacÌosaig còig tadhail do dh'Uibhist a Tuath anns an' gheama acasan an aghaidh Southend, a chrìochnaich 10-1 aig a' cheann thall.

'S e puing an urra a bh' ann sa gheama mhòr ann an Lìog Leòdhais is na Hearadh oidhche Luain is Aths is an Rubha a' crìochnachadh co-ionann 0-0 aig Pàirc Chnoc nan Gobhar.

'S iad am Bac as motha a fhuair buannachd às a sin is an dà sgioba a tha a' farpais riutha airson an tiotail a' leigeil às phuingean.

Tha an Rubha fhathast aig a' mhullach is iad trì puingean air thoiseach air a' Bhac, ach tha iad air dà gheama a bharrachd a chluich.

Tha Aths trì puingean air cùl nam Bacach is iad ri chèile air sia geamaichean a chluich.

Bha an geama aig a' Bhac an aghaidh nan Loch oidhche Luain air a chur dheth.

Bha deagh oidhche aig na Hearaich a ghluais suas dhan cheathramh àite nuair a rinn iadsan a' chùis air an Taobh Siar 2-1 ann am Barabhas.

'S iad Dòmhnall MacRath is Kenny MacSuain a fhuair tadhail na Hearadh às dèidh dhan Taobh Siar a dhol air thoiseach tro Luke MacAoidh.

Seo an dàrna turas a bha na Hearaich air buannachadh ann am Barabhas taobh a-staigh beagan sheachdainean.

Tha United san t-siathamh àite is iadsan air buannachadh 3-0 an aghaidh Nis aig na Còig Peighinnean Diluain.

'S iad Friseal Moireach (2) is Neil Aitken a fhuair na tadhail do sgioba Steòrnabhaigh.

Tha seachd puingean mar-thà aig United, ceithir a bharrachd na fhuair iad fad an t-seusain an-uiridh.

Ann an Lìog Uibhist is Bharraigh oidhche Mhàirt bidh Uibhist a Tuath a' dol an aghaidh Southend, Beinn na Faoghla an aghaidh Saints an Ìochdair, is Barraigh an aghaidh Èirisgeidh.

Bhuannaich Barraigh gu furasta 4-0 an aghaidh An Rubha anns a' chairteal chuairt dheireannaich de Chupa MalCivils ann an Lionacleit Disathairne.

Anns a' gheama eile a chaidh a chluiche Disathairne, bhuannaich An Taobh Siar 7-1 an aghaidh Chàrlabhaigh aig Cnoc a' Choilich.

Cha b' urrainn do dh'Èirisgeidh sgioba a thogail airson a' gheama an aghaidh a' Bhac agus mar sin, chaidh buaidh a thoirt dha na Leòdhasaich.

Anns a' chairteal chuairt dheireannaich eile, 's ann Disathairne 4mh den Iuchar a bhios Saints an Ìochdair is Athletic Steòrnabhaigh a' cluiche.

Tha trì geamannan ann an Lìog Leòdhais is na Hearadh a-nochd:

• Athletic an aghaidh An Rubha

• Nis an aghaidh United

• An Taobh Siar an aghaidh Na Hearadh

Chaidh an geama eadar Na Lochan agus am Bac a chur dheth air sgàth bàis ann an nàbachd nan Lochan.

Ann an Cupa Rois, tha Port Rìgh air faighinn troimhe chun na cuairt deireannaiche agus iad a' dèanamh a' ghnothaich air Malaig 3-2.

Tùs an deilbh, Charlene NicLeòid

Chaidh Ceann Loch Seile air adhart dhan iar-chuairt dheireannaich de Chupa Valerie Fhriseil nuair a rinn iad an gnothach air na nàbaidhean aca às an Eilean Sgitheanach Didòmnhnaich.

Ann an geama a chaidh a ghluasad bho Rèaraig gu Caol Àcainn, 's iad na Sgitheanaich a chaidh air thoiseach tràth le tadhal bho Donna NicCoinnich.

Sin mar a dh'fhuirich cùisean gu domhain a-steach dhan dàrna leth, ach le beagan mhionaidean air fhàgail chuir Lorna NicRath am ball dhan lìon is bha na sgiobaidhean co-ionann.

Chuir sin spionnadh ann an Ceann Loch Seile agus gu sgiobalta bha iad air thoiseach tro Rhianna Kirk.

• Cupa Valerie Fhriseil air ais am Bàideanach

A dh'aindeoin oidhirpean nan Sgitheanach anns na mionaidean mu dheireadh cha b' urrainn dhaibh tadhal fhaighinn is chaidh Seile air adhart 2-1.

Bidh Ceann Loch Seile a-nise an aghaidh GMA san iar-chuairt dheireannaich air an 26mh den Iuchar.

Bidh Bàideanach an aghaidh Loch Abair sa gheama eile - ath-chluich den chuairt-dheireannaich a bh' ann an-uiridh.

Bha aona gheama ann am Prìomh Lìog nam ban air an deireadh-sheachdain is chrìochnaich e 2-2 eadar Gleann Urchadain is Loch Abar, rud a tha cha mhòr gu cinnteach a' cur às do dhòchas sam bith a bh' aig na h-Abraich greim a chumail air an tiotal.

Là math eile dha sgiobaidhean Bhàideanach

Ann an iomain nam fear Disathairne bhuannaich Baile Ùr an t-Slèibh is Ceann a' Ghiùthsaich a-rithist is am blàr eatorra 'son an tiotail a' leantainn.

'S e 7-0 a bh' ann dhan Bhaile Ùr ann an Drochaid an Aonachain agus 3-1 do Cheann a' Ghiùthsaich aig an taigh an aghaidh Cheann Loch Seile.

San aon gheama eile sa Phrìomh Lìog rinn Camanachd an Òbain an gnothach 5-1 air Cabar Fèidh.

Tha Lòbhat sa chuairt dheireannaich de Chupa a' Bhàile Mhòir às dèidh dhaibh a' chùis a dhèanamh air na nàbaidhean aca a' Mhanachainn.

Thàinig na tadhail san 20 mionaid mu dheireadh bho Graeme MacMhaolain is Sergio MacThòmais.

Rinn Inbhir Aora adhartas ann an Cupa a' Bhaile Mhòir cuideachd.

Rinn iad a' chùis 5-3 air Eilean Bhòid is na Bòdaich air tilleadh gu 4-3 sa gheama sin às dèidh a bhith 4-0 air dheireadh.

Bidh Inbhir Aora a-nise an aghaidh Chill Mhàilidh Disathairne seo tighinn 'son àite sa chuairt dheireannaich an aghaidh Lòbhat.

Tha luchd-leantainn sgioba na h-Alba a' feitheamh feuch co-dhiù am faigh iad a-mach à ìre nam buidhnean aig Cupa na Cruinne an dèidh dhaibh call 3-0 ri Brasil Diciadain.

Tha na h-eolaichean a' dèanamh dheth gu bheil cothrom 30% aca a dhol chun ath chuairt aig an ire-sa, agus Alba an urra ri dè a thachras ann an geamaichean eile eadar seo agus madainn na Sàbaid.

Tha Alasdair MacIllinnein ag aithris à Miami.

Bha droch oidhche aig Iar-Thuath an Eilein Sgitheanaich ann an Lìog Thaobh Siar na Gàidhealtachd Diciadain is iad a' call san lìog 'son a' chiad turas am-bliadhna.

Rinn Port Rìgh a' chùis orra 1-0 is an tadhal a' tighinn bho Finlay James.

Oidhche Mhàirt bha Caol Àcainn air buannachadh 5-4 an aghaidh a' Ghearasdain.

Chan eil am Bac a-nise ach dìreach dà phuing air cùl an Rubha aig mullach Lìog Leòdhais is na Hearadh is iad air a' chùis a dhèanamh air Aths 2-1 oidhche Luain.

Thàinig na tadhail uile san dàrna leth ann an Col Uarach is Louie Dòmhnallach agus Daibhidh MacAnndrais air an targaid dhan Bhac gus an geama a bhuannachadh.

'S e seo a' chiad uair a bha Aths air call san lìog am-bliadhna.

Ghluais Càrlabhagh dhan treas àite oidhche Luain nuair a rinn iadsan a' chùis air Nis 4-1.

Chuir Ali 'Barbie' Dòmhnallach hat-trick do Chàrlabhagh is thàinig an tadhal eile bho Darren Wilson.

Bha oidhche chofhurtail aig na Hearaich is iadsan air a' chùis a dhèanamh 4-0 air na nàbaidhean aca air na Lochan.

'S iad Ahmed Pandor (2), Connor MacLeòid is Donnie MacRath le breab-peanais a fhuair na tadhail dha na Hearadh.

Sa gheama eile rinn an Taobh Siar an gnothach 2-0 air United is Ali 'Barbhas' MacLeòid is Ailig John Moireasdan air an targaid.

Tha dà gheama ann meadhan na seachdain ann an Lìog Thaobh Siar na Gàidhealtachd.

Oidhche Mhàirt bidh Caol Àcainn an aghaidh a' Ghearasdain agus Diciadain thèid Port Rìgh an aghaidh Iar Thuath an Eilein Sgitheanaich.

Tha obair a-nis air thoiseach air sgioba nàiseanta na h-Alba agus e a' faileachadh orra a' chùis a dhèanamh a-raoir air Morocco.

Chaill iad tadhal gu neòni ach tha an aire a-nis a' tionndadh gu Miami agus an geama mu dheireadh aca sa bhuidhinn an aghaidh Bhraisil.

Tha Alasdair MacIllinnein ag aithris à Boston.

Neartaich an Rubha an suidheachadh aca aig mullach Lìog Leòdhais nuair a rinn iad an gnothach 2-1 air an Taobh Siar oidhche Luain.

Thòisich na Rubhaich gu làidir le dà thadhal sa chiad deich mionaidean bho Josh Mac a' Ghobhainn agus Aonghas Dòmhnallach.

Fhuair Luke MacAoidh fear air ais dha na Siaraich ro letheach-slighe ach 's e sin an tadhal mu dheireadh den oidhche is an geama a' crìochnachadh 2-1.

Tha an Rubha air 18 puingean, còig air thoiseach air a' Bhac, ach tha iad air dà gheama a bharrachd a chluich.

Bha deagh oidhche aig a' Bhac fhèin is iad a' buannachadh 5-0 an aghaidh Nis.

Thàinig na tadhail aca bho Cole Lamb, Leo Hannah, Ally MacÌomhair, John MacLeòid agus Seumas Moireach.

Tha Aths san treas àite is iadsan a-nise air ceithir a-mach à ceithir a bhuannachadh às dèidh dhaibh soirbheachadh 7-1 an aghaidh sgioba nan Loch.

Bha Aths 4-0 air thoiseach taobh a-staigh 20 mionaid aig a' Chreagan Dubh.

Bha cothroman gu leòr aca barrachd thadhal fhaighinn - nam measg trì breaban-peanais nach do chuir iad - ach bha oidhche gu math cofhurtail aca co-dhiù.

Chrìochnaich an geama eile oidhche Luain eadar Càrlabhagh is na Hearadh 1-1.

Chaidh na Hearaich air thoiseach tràth ach dh'fhàg breab-peanais bho Ali Dòmhnallach dìreach ro letheach-slighe an geama co-ionnan 1-1.