RNLI: Rhybudd i arnofio os yn mynd i drafferth

Traeth Porthcawl a char RNLIGetty Images

Wrth i'r haf nesáu mae'r RNLI yn annog pobl i gofio technegau achub bywyd os ydyn nhw'n mynd i drafferthion yn y dŵr.

Daw'r anogaeth wrth i'r elusen ddweud iddyn nhw achub 28 o fywydau y llynedd a helpu 5,507 o bobl.

Ddydd Mawrth mae'r elusen yn lansio'i ymgyrch "Arnofio i Fyw" ac fe fydd achubwyr yn dychwelyd i rai o draethau Cymru yn ystod yr hanner tymor.

Mae'r elusen yn amcangyfrif y bydd dros 48 miliwn o bobl ar hyd y Deyrnas Unedig yn mynd i'r arfordir neu ddŵr agored o leiaf unwaith dros yr haf.

Dywedodd Chris Cousins, Arweinydd Diogelwch Dŵr Rhanbarthol: "Rydym yn gwybod y bydd nifer fawr o bobl yn ymweld ag arfordir Cymru dros y misoedd nesaf ac rydym am i bawb gofio ein cyngor Arnofio i Fyw.

"Drwy wneud hyn, rydych chi'n rhoi cyfle i chi'ch hun orffwys ac adfer eich anadlu. Ar ôl i chi adennill rheolaeth o'ch anadlu, gallwch alw am gymorth neu nofio i ddiogelwch."

Bydd achubwyr bywyd yn arddangos y dechneg 'arnofio i fyw' ym Mhorthladd Dinbych-y-pysgod ddydd Mawrth i nodi lansio'r ymgyrch.

Y cyngor os ydych mewn trafferth yn y dŵr?

  • Pwyswch eich pen yn ôl, gyda'ch clustiau o dan y dŵr

  • Ymlaciwch ac anadlwch fel arfer

  • Symudwch eich breichiau a choesau er mwyn arnofio

  • Peidiwch poeni os yw eich coesau yn suddo ychydig

  • Ceisiwch ymarfer arnofio mewn pwll nofio

Y cyngor os yn gweld rhywun mewn trafferth

  • Ffoniwch 999

  • Dywedwch wrthyn nhw i arnofio ar eu cefn

  • Taflwch offer achub i'w helpu nhw i arnofio nes bod y gwasanaethau brys yn cyrraedd

Bydd achubwyr bywyd yr RNLI yn dychwelyd i rai traethau yng Nghymru'r penwythnos hwn i baratoi ar gyfer hanner tymor.

Dros hanner tymor mis Mai bydd achubwyr bywyd yr RNLI ar y traethau yma rhwng 10.00 a 18:00.

  • Sir Benfro: Porth Mawr (Whitesands beach), Niwgwl a thraeth de Dinbych-y pysgod

  • Abertawe: Langland, Caswell, Aberafan, Pen-bre, Bae y Tri Chlogwyn a Phorth Einon

  • Ynys y Barri, Bae Coney, Bae Trecco a Bae Rest

  • Ceredigion: Llangrannog a Borth

  • Sir Ddinbych: Prestatyn a'r Rhyl

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.