Ọ̀pọ́ ẹ̀ṣọ́ ààbò Iru Ekun farapa bí wọ́n ṣe fìjà pẹ́ẹ́ta pẹ̀lú àwọn agbébọn nínú igbó Old Oyo National Park

Published
Ìye àkókó tí a fi kà á: Ìṣẹ́jú 2

Ọpọ awọn ọmọ egbẹ Iru Ekun to jẹ ẹṣọ aabo Oloye Sunday Adeyemo ti ọpọ mọ si Sunday Igboho farapa yannayanna nigba ti wọn fija pẹẹta pẹlu awọn agbebọn ninu igbo Old Oyo National Park.

Gẹgẹ bi ileeṣẹ iroyin Nigerian Tribune ṣe sọ, iṣẹlẹ naa waye lasiko tawọn ẹṣọ aabo Iru Ekun n gbiyanju lati tọpinpin awọn agbebọn naa lọ ninu igbo Old Oyo National Park.

Wọn ni awọn ẹṣọ aabo naa gbiyanju lati lo duroonu lati fi ṣawari ibi ti awọn agbebọn naa wa ki wọn to tọ wọn lọ.

Skip content and continue reading

End of content

Ṣugbọn iṣẹlẹ naa di wahala nigba ti awọn afurasi agbebọn naa ti wọn ti gọ sibikan ṣina ibọn bolẹ fun awọn ẹṣọ aabo Iru Ekun naa ti awọn mejeeji si fija pẹẹta ninu igbo naa.

Wọn ni eyi ṣokunfa bi ọpọ awọn ẹṣọ aabo farapa yannayanna bi o tilẹ jẹ pe a ko tii le fidi iye eeyan to farapa ninu iṣẹlẹ naa mulẹ.

Titi di asiko ti a n ko iroyin jọ, ileeṣẹ ọlọpaa atawọn ẹṣọ aabo Iru Ekun ko i tii sọ ohunkohun lori ikọlu naa.