Пентагон эълон қилган НУЖ ҳужжатларидан нималарни ўргандик?
- Author, Сакши Венкатраман
- Author, Ребекка Пиэдер
- Published
- Ўқилиш вақти: 4 дақ
Пентагон НУЖ (номаълум учар жисм) лар ҳақида эълон қилган охирги ҳужжатлар тўпламида Ердаги одамлар ва Ойдаги фазогирлар қайд этган кузатувлар ҳам бор.
Ўнлаб йилларни қамраб олган ушбу ҳужжатлар АҚШ президенти Доналд Трампнинг кўрсатмасига биноан жума куни махфийликдан чиқарилиб, интернетга жойлаштирилди. Трамп "улкан қизиқиш туфайли" уларни эълон қилишини йил бошида айтган эди.
АҚШда сўнгги йилларда ўзга сайёраликларга қизиқиш қайта жонланди. 2022-йилда Конгресс сўнгги 50 йил ичида илк бор НУЖлар бўйича тинглов ўтказди, ҳарбийлар эса бу масалада шаффофликни оширишга ваъда берди.
161 та файл Мудофаа вазирлиги веб-сайтига жойлаштирилган бўлиб, келажакда яна кўпроқ ҳужжатлар эълон қилиниши кутилмоқда.
Men "mana bu yaltiroq narsaga qarang" qabilidagi tashviqotdan juda charchadim.
Собиқ президент Барак Обама феврал ойидаги интервюсида ўзга сайёраликлар "ҳақиқатан ҳам бор, лекин мен уларни кўрмаганман" деб, бу мавзуга қизиқишни янада кучайтирган эди.
Шундан сўнг Обама ўз фикрларига аниқлик киритиб, статистик жиҳатдан олиб қараганда, коинотда ҳаёт мавжуд бўлиши эҳтимоли борлигини, бироқ президентлик даврида бунга "ҳеч қандай далил" кўрмаганини таъкидлади.
Ўша ойнинг охирида Трамп Пентагонга "ўзга сайёраликлар ва ердан ташқаридаги ҳаёт, номаълум ҳаво ҳодисалари (НҲҲ) ҳамда номаълум учар жисмлар (НУЖ) билан боғлиқ" файлларни эълон қилишни буюрди.
Жума куни эълон қилинган файллар орасида ўнлаб йиллар давомида махфий сақланган ҳарбий ёзишмалар, "Аполлон"нинг Ойга парвози ҳисоботлари ва келиб чиқиши ердан ташқарида деб гумон қилинган НУЖни кўрганини даъво қилган шахсларнинг хабарлари мавжуд.
"Аполлон" фазогирлари ёруғлик чақнашлари ҳақида гапирган
Сурат манбаси, US Department of Defense
Файллар орасида 1960-ва 1970-йиллардаги "Аполлон-11", "Аполлон-12" ва "Аполлон-17"нинг Ойга қўниш миссиялари бортида бўлган фазогирларнинг аввал махфий бўлган суҳбат ёзувлари (стенограммалари) бор.
"Аполлон-11" миссиясининг машҳур фазогири Базз Олдрин 1969-йилда берган ва жума куни эълон қилинган интервюсида Ойга сафари чоғида бир нечта тушунтириб бўлмайдиган ҳодисаларни кўрганини айтган.
"Мен жуда ёрқин ёруғлик манбасини кузатдим, биз уни тахминан лазер бўлиши мумкин деб ҳисобладик," дейди у.
Суҳбат ёзувларига кўра, 1969-йилда Ойда юрган "Аполлон-12" фазогири Алан Бин миссия давомида "космосда сузиб юрган" заррачалар ва ёруғлик чақнашларини кўрганини айтган. Унинг сўзларига кўра, заррачалар "гўё Ойдан чиқиб кетаётгандек" кўринган.
1972-йилдаги "Аполлон-17" миссиясининг икки фазогири ҳам кема бортида милтилловчи ёруғликни кўрганини хабар қилган. Фазогир Жек Шмитт "Бу ерда худди Тўртинчи июл (Мустақиллик куни) салютларидек!" деган экан ўшанда. Улар ёруғлик муз бўлакларидан қайтган акс бўлиши мумкинлигини ҳам қўшимча қилишган.
Эълон қилинган файлларнинг яна бирида 1965-йилги "Gemini 7" космик парвозининг аудиоёзуви бўлиб, унда фазогир Френк Борманнинг Ер билан алоқаси акс этган. У NASA миссияни бошқариш марказига номаълум жисмни кўргани ҳақида хабар бериб, космик кеманинг чап томонида кўринган "номаълум объект" ва "триллионлаб майда заррачалар"ни тасвирлаган.
Ёруғлик ичидан пайдо бўлган муаллақ жисмлар
Файлларда эълон қилинган ўнлаб йиллик ҳисоботлар орасида номаълум аномал ҳодисалар кузатилгани ҳақидаги ўнлаб шахсий хабарлар ҳам мавжуд.
Бир ҳужжатда келтирилишича, 1957-йилда бир киши ФҚБга берган интервьюсида ердан кўтарилаётган катта, думалоқ транспорт воситасига гувоҳ бўлганини айтган. Шунингдек, 2023-йил сентябр ва октябр ойларида АҚШ фуқаролари ёрқин нур ичидан пайдо бўлиб, ҳавода муаллақ турган металл жисмларни кўргани ҳақида хабар берган интервюлар ҳам бор.
End of Ижтимоий тармоқлардаги саҳифаларимиз
Ироқ, Сурия ва БААдаги ҳарбий кузатувлар
Файллар орасида АҚШ ҳарбийлари томонидан 2022-йилда Яқин Шарқда олинган видеоклиплар ҳам бор.
Ироқ, Сурия ва Бирлашган Араб Амирликларида олинган кадрларда Пентагон веб-сайти "ечими топилмаган номаълум аномал ҳодиса" деб атаган ҳолат акс этган.
Яқин Шарқнинг ошкор этилмаган бир ҳудудида 2022-йилда олинган видео тасвирда овал шаклидаги жисмнинг чапдан ўнгга тез учиб ўтгани тасвирланган ва унга илова қилинган ҳисоботда бу "эҳтимолий ракета" деб белгиланган.
"Бу яхши биринчи қадам, лекин бизга кўпроғи керак", дейди қонунчилар
Теннесси штатидан республикачи конгрессмен Тим Берчетт аввалроқ НУЖ кузатувлари бўйича ҳукуматнинг шаффофлигини оширишни қўллаб-қувватлаган эди. У Пентагоннинг файлларни эълон қилганини олқишлаб, Х ижтимоий тармоғидаги постида буни "ажойиб бошланиш" деб атади.
Флоридалик республикачи конгрессмен Анна Паулина Луна ҳам бу масалада шаффофлик тарафдори. У ўз баёнотида ушбу ошкор қилишни "тўғри йўналишдаги улкан биринчи қадам" деб атади.
Бироқ, Трампнинг собиқ иттифоқчи, президент билан муносабатлари совуқлашиб, Конгрессни тарк этган собиқ конгрессмен Маржори Тейлор Гриннинг айтишича, бу ҳужжатларнинг эълон қилиниши америкаликлар дуч келаётган нархларнинг қимматлашуви ва Эрондаги уруш каби долзарброқ масалалардан чалғитишдир.
"Мен "мана бу ялтироқ нарсага қаранг" қабилидаги ташвиқотдан жуда чарчадим", дейди Грин Х'даги постида.
