ኡጓንዳውያን 'ጌቶ ኪድስ' ምስ ሻኪራ ኣብ ዋንጫ ዓለም፡ 'ንህይወትና ዝቐየረ ተመኵሮ'

እቶም ካብ ጐደናታት ካምፓላ ዝተበገሱ ኡጋንዳውያን ተላሃይቲ 'ጌቶ ኪድስ'፡ ኣብ መድረኽ ዋንጫ ዓለም ምስ ከዋኽብቲ ሙዚቃ ሻኪራን በርና ቦይን ብምዃን ንህይወቶም ዝቐየረ ታሪኽ ሰሪሖም። እዞም ተውህቦኦምን ትምህርቶምን ኣመዛዚኖም ዝጕዓዙ ዘለዉ ቈልዑ፡ እቲ ዘቕረብዎ ምርኢት 'ኣዝዩ ዘሐጕስ' ምንባሩን ሓድሽ ናይ ተስፋ ማዕጾ ከም ዝኸፈተሎምን ይገልጹ።

እቲ 'ጌቶ ኪድስ' ተባሂሉ ዝፍለጥ ናይ ኡጋንዳ ጕጅለ ሳዕሳዒት፡ ብሰንበት ኣብ ዝተኻየደ ፍጻመ ዋንጫ ዓለም ኣብ እዋን ዕረፍቲ ምርኢቱ ብምቕራብ ሓድሽ ታሪኽ ሰሪሑ ኣሎ።

ጓል 10 ዓመት ሲየራ፡ ነቲ ንህይወቶም ዝቐየረ ተመኵሮ፡ "ኣዝዩ፡ ኣዝዩ፡ ኣዝዩ ጥዑም ነይሩ፡" ብምባል ትገልጾ።

ገሊኦም ተዓዘብቲ ኣብ ከምዚ ዝኣመሰለ ዓቢ ፍጻመ ኩዕሶ እግሪ ምርኢታት ሙዚቃ ምቕራቡ እኳ እንተ ነቐፉ፡ እቶም ቈልዑ ምስቶም ዓለምለኻውያን ከዋኽብቲ ሙዚቃ ዝዀኑ ሻኪራን በርና ቦይን ብምዃን ዘቕረብዎ ምርኢት ግን ብሚልዮናት ዝቝጸሩ ሰባት ኣብ መላእ ዓለም ተዓዚቦሞ እዮም።

ካብ ጐደናታት ካምፓላ ናብ መድረኽ ዓለም

እቲ ጕጅለ ምስ ቢቢሲ ኒውስደይ ኣብ ዝገበሮ ቃለመሕትት፡ ካብቲ ኣብ ርእሰ ከተማ ኡጋንዳ፡ ካምፓላ ዝርከብ ድኻታት ዝነብሩሉ ከባቢታት ተበጊሶም ናብዚ ደረጃ'ዚ ንምብጻሕን ምስ ትምህርቶም ንምትእስሳርን ብዙሕ ጻዕሪ ከም ዝሓተቶም ገሊጾም።

ሲየራ፡ "ተስፋ ኣይትቝረጹ... ናብ ኣምላኽ ጸልዩ። ወለድኹም ስምዑ፡ ትምህርቲ ድማ ቀዳምነት እዩ፡" ክትብል ትመክር።

ጓል 11 ዓመት ጆሰፊን ብወገና፡ ኣብቲ ኣብ ስታድዩም ሜትላይፍ ኒው ጀርሲ፡ ስጳኛ ንኣርጀንቲና ብምስዓር ዋንጫ ዝዓተረትሉ ጸወታ፡ ንኸም ሊዮነል ሜሲን ላሚን ያማልን ዝኣመሰሉ ከዋኽብቲ ኩዕሶ እግሪ ብኣካል ምርኣያ ብኣድናቖት ትገልጽ።

"ንሜሲ ብምርኣየይን ሰባት ምርኢትና ብምዕዛቦምን ኣዝየ ተሓጒሰ፡" ትብል።

ዛንታ ምምስራ እቲ ጕጅለ

ኣካያዲ ስራሕ እቲ ጕጅለ ዳውዳ ካቩማ፡ ባዕሉ'ውን ኣብ ጐደናታት ካምፓላ ዝዓበየ ኰይኑ፡ ህይወቱ ብሓገዝ ሓደ ለጋስ መምህር ከም ዝተቐየረ ይዛረብ።

ንሱ እቲ ዝረኸቦ ሓገዝ ንምምላስ ብምሕሳብ፡ መምህር ድሕሪ ምዃኑ እዩ ነዚ መዕቆቢ ዘይብሎምን ክፍሊት ቤት ትምህርቲ ክኸፍሉ ዘይክእሉን ቈልዑ ዝሓቍፍ 'ጌቶ ኪድስ' ዝብል ጕጅለ መስሪቱ።

ካቩማ፡ "ኣብ ጌቶ ብዙሕ ተውህቦ ኣሎ፣ ኰስኳስ ጥራይ እዩ ዘድልዮ፡" ብምባል ኣረኣእያኡ ይገልጽ።

እቲ ጕጅለ ንመጀመርታ ግዜ ኣብ 2017 ኣብቲ ልዕሊ 1.9 ቢልዮን ተዓዘብቲ ዝረኸበ ናይ ፍረንች ሞንታና ቪድዮ ደርፊ ብምስታፍ ዓቢ ኣቓልቦ ረኺቡ።

ብድሕሪኡ ድማ ኣብ ታሪኽ 'ብሪተይንስ ጎት ታለንት' (Britain's Got Talent)ን 'ኣመሪካስ ጎት ታለንት'ን ብምስታፍ ዝናኦም ናብ ዝለዓለ ደረጃ ደይቡ።

ትምህርቲ ከም ቀዳምነት

እቶም ቈልዑ ኣብ መላእ ዓለም ተፈላጥነት ይርከቡ'ምበር፡ ኣካያዲ ስርሖምን ወለዶምን "ትምህርቲ ቀዳምነት" ዝብል ዕላማ እዩ ዘለዎም።

ካቩማ ከም ዝገለጾ፡ እቶም ቈልዑ ንማሕበራዊ መራኸቢታት ዝዀኑ ቪድዮታት ዝቐርጹ ኣብ መወዳእታ ሰሙን (ቀዳምን ሰንበትን) ጥራይ ኰይኑ፡ ካልኦት መዓልታት ግን ኣብ ትምህርቶም እዮም ዘውዕልዎ።

ካብ ዓዲ ወጻኢ ክጓዓዙ ከለዉ ድማ ምስ መምህራኖም ብኢንተርነት ብምትእስሳር ትምህርቶም ይከታተሉ እዮም።

ሲየራን ጆሰፊንን ዓብየን ሓካይም ክዀና ይመነያ'ምበር፡ ተውህቦ ሳዕሳዒተን ግን ከም ዘይሓድጋኦ ይገልጻ።

ሲየራ "ሳዕሳዒት ህይወተይ ቀይርዎ እዩ፣ ብሳላ ሳዕሳዒት እየ ናብ ቤት ትምህርቲ ክኸይድ ክኢለ፡" ትብል።

እዞም ቈልዑ ንኻልኦት ተመሳሳሊ ድሕረ ባይታ ዘለዎም መዛንኦም ኣብ ዘመሓላለፍዎ መልእኽቲ፡ "ገዛእ-ርእስኹም ኣፍቅሩ፣ ብኣምላኽ እመኑ፣ ተውህቦኹም ድማ ኣይትሕብኡ፡" ብምባል ተስፋ ዘዝርእ ቃላቶም ኣካፊሎም።