‘గంటకు పైగా సీపీఆర్ చేసినా బతకలేదు’ నానా పాటేకర్ చివరిక్షణాలపై వైద్యులు ఏం చెప్పారు?

(ఈ కథనంలో కలిచివేసేవిషయాలున్నాయి.)

ప్రముఖ బాలీవుడ్, మరాఠీ నటుడు నానా పాటేకర్ కన్నుమూశారు.

నానా పాటేకర్ గోవాలో కన్నుమూసినట్టు ఆయన కుమారుడు మల్హర్ పాటేకర్ ధ్రువీకరించారు.

ఈ ఉదయం 5.20గంటలకు తీవ్రమైన గుండెపోటుతో నానా పాటేకర్ మరణించారని పీటీఐ తెలిపింది.

మరణానికి ముందు నానా పాటేకర్ తనకు ఆరోగ్యం బాగోలేదని ఒక స్నేహితునికి సందేశం పంపారు.

ఉదయం ఆయనను ఆస్పత్రికి తరలించారు. కానీ గంటకు పైగా సీపీఆర్ చేసినప్పటికీ వైద్యులు ఆయన ప్రాణాలను కాపాడలేకపోయారు.

నానా పాటేకర్ చివరి క్షణాలపై మణిపాల్ ఆస్పత్రి వైద్యులు వివరాలు వెల్లడించారు.

"మా అంబులెన్స్ ఉదయం 4:20 గంటలకు నానా పటేకర్ ఇంటికి చేరుకుంది. ఆయన ఇల్లు మా ఆస్పత్రికి చాలా దగ్గరలోనే ఉంది. మేం అక్కడికి చేరుకునే సమయానికి ఆయన అపస్మారక స్థితిలో ఉన్నారు. అందుకే మా బృందం వెంటనే సీపీఆర్ ప్రారంభించింది.

నానాపటేకర్‌ను ఉదయం 4:30 గంటలకు అంబులెన్స్‌లో ఆస్పత్రికి తరలించి సీపీఆర్ కొనసాగించాం. ఉదయం 5:20 గంటలకు ఆయన మరణించినట్టు వైద్యులు ప్రకటించారు. ఆ సమయంలో ఆయనవెంట కుటుంబ సభ్యులెవరూ లేరు. ఆయన బాగోగులు చూసుకునే వ్యక్తి ఒకరు, ఒక స్నేహితుడు అక్కడ ఉన్నారు'' అని మణిపాల్ ఆసుపత్రిలోని ఆంకాలజీ విభాగం అధిపతి డాక్టర్ శేఖర్ సాలుంఖే చెప్పారు.

స్నేహితుడు వెళ్లేటప్పటికి...

నానా పాటేకర్ నుంచి మెసేజ్ అందుకున్న స్నేహితుడు తెల్లవారుజామున నాలుగు గంటలకు ఆయన ఇంటికి చేరుకున్నారు. ఆ సమయంలో నానా పాటేకర్ తీవ్రమైన చెమటతో తడిసిపోయి నేలపై పడి ఉన్నారు. కేర్ టేకర్ ఆస్పత్రికి వెళ్లి అంబులెన్స్‌ను తీసుకువచ్చారు.

గంటకు పైగా సీపీఆర్ చేసినప్పటికీ మేం ఆయన్ను కాపాడలేకపోయాం. ఆసుపత్రికి తీసుకువచ్చేసరికే ఆయన మరణించారు" అని డాక్టర్ సాలుంఖే చెప్పారు.

ఆసుపత్రికి తీసుకువెళ్లేలోపే నానా పాటేకర్ మరణించడంతో ఈ ఘటనను మెడికో-లీగల్ కేసుగా నమోదు చేశారు. ఆయన మృతదేహాన్ని గోవా మెడికల్ కాలేజీకి తరలించారు. పోస్ట్‌మార్టం అనంతరం కుటుంబ సభ్యులకు అప్పగిస్తారు.

బాలీవుడ్ హీరోగా దేశవ్యాప్త గుర్తింపు

తన అద్భుతమైన నటనతో నానా పాటేకర్ ఐదు దశాబ్దాలకు పైగా కెరీర్‌లో హిందీ, మరాఠీ సినిమాల్లో ప్రముఖ నటుడిగా గుర్తింపు పొందారు. ఆయన డైలాగ్ చెప్పే తీరుకు ఎందరో అభిమానులున్నారు.

పరిందా, ప్రహార్: ది ఫైనల్ అటాక్, క్రాంతివీర్, అగ్ని సాక్షి, ఖామోషీ: ది మ్యూజికల్, అబ్ తక్ ఛప్పన్, వెల్కమ్ వంటి చిత్రాల్లో ఆయన నటనకు మంచి గుర్తింపు లభించింది.

2007లో వచ్చిన 'వెల్కమ్' అనే కామెడీ చిత్రంలో గ్యాంగ్‌స్టర్ ఉదయ్ శెట్టి పాత్రతో ప్రేక్షకులను అలరించారు నానా పాటేకర్‌. సీక్వెల్ అయిన 'వెల్కమ్ బ్యాక్' (2015)లో కూడా అదే పాత్రను పోషించారు.

నటనతో పాటు 'ప్రహార్: ది ఫైనల్ ఎటాక్' చిత్రానికి నానా పాటేకర్‌ దర్శకత్వం కూడా వహించారు. సినిమా, కళారంగానికి చేసిన సేవలకుగాను 2013లో పద్మశ్రీ పురస్కారం అందుకున్నారు.

నానా పాటేకర్‌ చివరిసారిగా విశాల్ భరద్వాజ్ దర్శకత్వం వహించిన రొమాంటిక్ యాక్షన్ థ్రిల్లర్ 'ఓ'రోమియో'లో కనిపించారు. ఈ ఏడాది ఫిబ్రవరిలో ఈ సినిమా విడుదలయింది. ప్రకాశ్ ఝా రాజకీయ డ్రామా సిరీస్ 'సంకల్ప్'తో ఓటీటీలోకి ప్రవేశించారు.

నానా పాటేకర్‌ తొలి హిందీ చిత్రం 'గమన్'. 1978లో ఇది విడుదలయింది. నాలుగు దశాబ్దాలకు పైగా సాగిన కెరీర్‌లో హీరో, విలన్, క్యారెక్టర్ ఆర్టిస్ట్‌గా రాణించారు. ప్లే బ్యాక్ సింగర్‌గానూ అలరించారు. నాటకరంగంపై తనదైన ముద్ర వేశారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)