Hii ni tovuti ya maandishi pekee ambayo inatumia data kidogo. Tazama toleo kuu la tovuti likijumuisha picha na video zote.
Pata maelezo zaidi kuhusu toleo hili la linalotumia kiasi kidogo cha data
Saudi Arabia yadungua makombora 10 yaliyorushwa na Wahouthi
Muungano wa kijeshi unaoongozwa na Saudi Arabia dhidi ya ya waasi wa Kihouthi nchini Yemen, umesema umedungua makombora 10 ya balistiki yaliyorushwa na Wahouthi kuelekea kusini mwa Saudi Arabia.
Muhtasari
- Watu 38 hawajulikani walipo baada ya jengo kuanguka Nairobi.
- Saudi Arabia yadungua makombora 10 ya Wahouthi
- Uingereza: Tuna siku 1000 kujiandaa kwa vita
- Uganda yatangaza karantini ya siku 21 kwa watu wanaorejea kutoka DRC
- Iran yaripoti kudungua ndege isiyo na rubani ya Marekani
- Mtu wa tatu aokolewa akiwa hai takriban siku mbili baada ya jengo la ghorofa kuporomoka nchini Kenya
- Watu 22 wameripotiwa kufariki katika ajali mbaya ya barabarani nchini Kenya
- Mlipuko wasikika mjini Riyadh, Saudi Arabia,huku Uwanja wa Ndege ukifunguliwa tena
- Iran: Kusitishwa kwa mapigano na Marekani kunategemea kutimizwa kwa masharti yaliyopendekezwa
- Watu 10 wauawa na maduka kuporwa Kaskazini mwa Nigeria
- Trump amjibu Obama na kudai utawala wake uliiwezesha Iran kupata silaha za nyuklia
- Israel kufunga vivuko vya Ukingo wa Magharibi wakati wa uchaguzi
- Brazil kupiga kura katika duru ya pili ya uchaguzi wa urais wenye ushindani mkali
- Obama amkosoa Trump kuhusu vita vya Iran na kupanda kwa gharama ya maisha
- Zaidi ya waandamanaji 1000 wakamatwa Ufaransa
Moja kwa moja
Na Beldeen Waliaula
Watu 38 hawajulikani walipo baada ya jengo kuanguka Nairobi.
Kulingana na Susan Auma Mang’eni, ambaye ni Katibu Mkuu katika Idara ya Serikali inayoshughulikia Maendeleo ya Biashara ndogo ndogo na za Kati (MSME) nchini Kenya, bado kuna watu ambao hawajulikani walipo kufuatia kuanguka kwa jengo,lenye ghorofa 18 katika mtaa wa Eastleigh mjini Nairobi siku ya Ijumaa.
"Hadi kufikia sasa, takriban watu 38 wameripotiwa kupotea," alisema Mang’eni.
Kulingana na katibu huyo,familia zimetoa taarifa kuhusu ndugu zao waliopotea kwa Shirika la Msalaba Mwekundu la Kenya na timu nyingine zinazoshiriki katika shughuli za uokoaji, ikiwemo Idara ya Upelelezi wa Makosa ya Jinai (DCI) na vyombo vya usalama.
Mang’eni alisema mamlaka zinafuatilia kila taarifa ili kubaini walipo watu hao waliopotea, akiongeza kuwa namba za simu zilizotolewa na familia zinaweza kusaidia wachunguzi kuwafuatilia.
"Wakati mwingine mkitupa simu, tunaweza kubaini mahali ambapo namba hiyo inapatikana," alisema.
Mang’eni alisema watu tisa wamepatikana, huku baadhi wakipatikana katika eneo la tukio. Wengine, alisema, hawakuwepo eneo hilo siku jengo hilo lilipoanguka.
Namba za simu za watu hao tisa ziliendana na simu zilizopatikana kwenye vifusi.
Saudi Arabia yadungua makombora 10 ya Wahouthi yaliyolenga kusini mwa taifa hilo
Muungano wa kijeshi unaoongozwa na Saudi Arabia dhidi ya ya waasi wa Kihouthi nchini Yemen, umesema umedungua makombora 10 ya balistiki yaliyorushwa na Wahouthi kuelekea kusini mwa Saudi Arabia.
Msemaji wa muungano huo wa kijeshi, Turki al-Maliki, amesema katika taarifa iliyochapishwa kwenye mtandao wa X kwamba, “makombora 10 ya balistiki yaliyorushwa na kundi la Wahouthi, ambalo ni kundi la kigaidi, kuelekea eneo la kusini yamedunguliwa na kuharibiwa.”
Mamlaka za Saudi Arabia awali zilitangaza kudungua na kuharibu makombora mawili yaliyorushwa na Wahouthi.
Moja lilikuwa kombora la balistiki lililoelekezwa katika mji mkuu, Riyadh, huku jingine likilenga mji wa Khamis Mushait.
Tangazo la kudunguliwa kwa makombora hayo mawili lilitolewa saa chache baada ya Uwanja wa Ndege wa Kimataifa wa King Khalid kutangaza kurejelewa kwa shughuli za kawaida za usafiri , kufuatia kusimamishwa kwa safari za ndege kwa wiki mbili, baada ya mashambulizi ya awali ya makombora.
Uingereza: Tuna siku 1000 kujiandaa kwa vita
Waziri wa Ulinzi wa Uingereza Wes Streeting, amesema nchi hiyo ina takriban siku 1,000 kujiandaa kwa uwezekano wa vita na maadui wake.
“Azma ya maadui wetu ya kutudhuru si jambo geni,” Wes Streeting aliliambia gazeti la Uingereza la The Telegraph.
“Kilichobadilika ni uwezo wao. Kufikia mwaka wa 2030, nguvu zao za kijeshi na uchumi wao unaotegemea vita unaweza kuwawezesha kutushambulia.”
Waziri huyo aliongezea kuwa, kwa kuzingatia tathmini hiyo, Uingereza ina zaidi ya siku 1,000 tu kujiandaa pamoja na washirika wake ili “kushinda” vita hivyo.
“Lazima tujiandae ili kuzuia hali mbaya zaidi,” alisema, akirejelea uwezekano wa shambulio kutoka Urusi.
Serikali ya Uingereza imeanzisha kampeni ya “Be Prepared” (Jiandae), inayowashauri wananchi kuweka nyumbani maji ya kunywa, vyakula vinavyoweza kuhifadhiwa kwa muda mrefu kama vile vyakula vya makopo, blanketi na redio.
Hatua hiyo inalenga kuwasaidia wananchi wa taifa hilo kuwa tayari iwapo kutatokea mashambulizi ya kimtandao, hali mbaya ya hewa au kukatizwa kwa huduma muhimu za miundombinu.
Soma pia:
Uganda yatangaza karantini ya siku 21 kwa watu wanaorejea kutoka DRC
Raia wa Uganda wanaorejea nchini humo kutoka Jamhuri ya Kidemokrasi ya Congo watawekwa karantini kwa siku 21, Waziri wa Afya Chris Baryomunsi amesema, hii ikiwa tahadhari ambayo Uganda inachukua kudhibiti ugonjwa wa Ebola.
Uganda imekuwa ikifuatilia kisa cha Ebola kilichoripotiwa nchini Nigeria, kinachohusisha mwanamke aliyesafiri kutoka Uganda.
Maafisa wamesema wanachunguza mfuatano wa vinasaba, taarifa za safari, mwingiliano na harakati za mwanamke huyo, kwa kushirikiana na mamlaka za Nigeria.
Waziri Baryomunsi amesema kuwa watu wote 60, waliokuwa na mawasiliano na mtu mgonjwa wa kwanza wa Ebola nchini Kenya, wamekamilisha kipindi cha kuangaliwa wakiwa wametengwa cha siku 21 na sasa wameruhusiwa kuondoka.
"Wizara imeimarisha ukaguzi wa wasafiri katika Uwanja wa Ndege wa Kimataifa wa Entebbe na katika mipaka yote ya nchi kavu. Wasafiri wote wanaokusudia kuingia Uganda kwa njia ya anga, nchi kavu au majini, lazima wajaze fomu maalum ya taarifa za usafiri," alisema Waziri Baryomunsi.
Soma pia:
Iran yaripoti kudungua ndege isiyo na rubani ya Marekani
Idara ya Mahusiano ya Umma ya Jeshi la Iran iliandika kwenye ujumbe uliochapishwa katika mtandao wa X kwamba, mfumo wa ulinzi wa nchi hiyo ulikuwa umezuia na kuangusha ndege isiyo na rubani ya Marekani aina ya Lucas.
Kulingana na tangazo la jeshi la IRGC, 'Ndege hiyo isiyo na rubani ililengwa angani mwa Bandar Abbas.'
Mnamo mwezi Disemba 2015, Kamandi Kuu ya Marekani, CENTCOM, ilitangaza kuundwa kwa kikosi cha kwanza cha ndege zisizo na rubani za kushambulia upande mmoja, hulipuka baada ya kugonga lengwa, Mashariki ya Kati.
Mtu wa tatu aokolewa akiwa hai takriban siku mbili baada ya jengo la ghorofa kuporomoka nchini Kenya
Mtu wa tatu ameokolewa akiwa hai kutoka kwenye jengo lililoporomoka eneo la Eastleigh,mjini Nairobi, nchini Kenya.
Zaidi ya saa 24 tangu jengo hilo kuporomoka huko vikosi vya uokoaji vimewatoa watu wengine wawili wakiwa hai kutoka kwenye vifusi.
Wakati huo huo, imebainika kuwa serikali ya Kaunti ya Nairobi pamoja na Mamlaka ya Kitaifa ya Usimamizi wa Mazingira (NEMA) hazikutoa idhini ya ujenzi wa jengo hilo la ghorofa 18 lililoporomoka huko Eastleigh.
Taarifa nyingine za kutatanisha zinaonyesha kuwa maelezo ya mradi huo yaliingizwa kwenye mfumo wa mtandaoni wa Mamlaka ya Kitaifa ya Ujenzi (NCA) kwa kuchelewa.
Kulingana na ripoti za vyombo vya habari nchini Kenya, mradi huo wa ujenzi wa jengo hilo haukuwa umeorodheshwa kwenye tovuti rasmi ya mamlaka ya ujenzi nchini siku ya Kenya siku ya Ijumaa jengo hilo lilipoporomka, lakini ukaonekana Jumamosi; jambo linalozua maswali kuhusu wakati uliposajiliwa na kama hatua hiyo ilichukuliwa kwa haraka na bila kufuata taratibu stahiki.
Watu 22 wameripotiwa kufariki katika ajali mbaya ya barabarani nchini Kenya
Watu 22 wamefariki na wengine kadhaa kujeruhiwa katika ajali iliyohusisha basi na lori kwenye barabara kuu ya Nairobi-Mombasa nchini Kenya leo asubuhi.
Ajali hiyo inaripotiwa kutokea majira ya saa moja asubuhi, ambapo basi hilo lilikuwa limebeba abiria waliokuwa wakirejea kutoka kwenye shughuli ya mazishi wakati lilipogongana na lori hilo.
Waliojeruhiwa walikimbizwa katika hospitali ya Kaunti Ndogo ya Mtito Andei, ambapo wanapokea matibabu, huku miili ya waliofariki katika ajali hiyo ikihifadhiwa katika chumba cha kuhifadhia maiti cha hospitali hiyo.
Kamishna wa Kaunti ya Makueni ambako ajali hiyo ilitokea, Abdullahi Khalif, awali alikuwa amethibitisha vifo vya watu 20, kabla ya idadi hiyo kupanda na kufikia 22.
Mlipuko wasikika mjini Riyadh, Saudi Arabia,huku Uwanja wa Ndege ukifunguliwa tena
Milipuko imeripotiwa katika mji mkuu wa Saudi Arabia, Riyadh.
Hii inajiri baada ya mamlaka za Saudi Arabia kutangaza kuwa safari za ndege zitaanza tena katika Uwanja wa Ndege wa Kimataifa wa King Khalid kuanzia leo.
Uwanja wa Ndege wa King Khalid ulikuwa umefungwa kwa wiki mbili kufuatia mashambulizi ya mara kwa mara ya waasi Kihouthi.
Tovuti ya Flightradar, ambayo inafuatilia safari za ndege kote ulimwenguni, pia iliripoti ndege ikipaa alfajiri ya leo kutoka Riyadh.
Mamlaka ya Saudi Arabia bado haijaelezea chanzo cha mlipuko huo mpya katika mji mkuu.
Wakati huo huo, msemaji wa jeshi la Wahouthi Yahya Saree, ameonya kwamba uwanja wa ndege bado "si salama" na wanaweza kutekeleza shambulio jingine.
Wahouthi wamekuwa wakiulenga uwanja wa ndege katika mawimbi kadhaa tangu usitishaji mapigano kuporomoka.
Shambulio la mapema mwezi huu liliwaua watu 13 na kuwajeruhi zaidi ya 300,hili likiwa shambulio lililosababisha vifo vingi zaidi nchini Saudi Arabia katika muongo mmoja.
Soma pia:
Iran: Kusitishwa kwa mapigano na Marekani kunategemea kutimizwa kwa masharti yaliyopendekezwa
Katika kauli zake za hivi karibuni, Waziri wa Mambo ya Kigeni wa Iran, Abbas Araqchi, ameonya kuhusu uwezekano wa mzozo mpya kati ya nchi yake, Marekani na Israel, akisema kuwa "kusitishwa kwa mapigano kunaweza kuafikiwa tu iwapo uhasama utakomeshwa kabisa katika nyanja zote."
Waziri huyo wa Mambo ya Kigeni, akizungumza katika hafla ya uzinduzi wa "Kituo cha Nyaraka na Makumbusho ya Kamal Kharrazi," alisema kuwa suala hilo la kumaliza vita limejadiliwa na Marekani katika mazungumzo yote yaliyofanyika kwa upatanishi wa Pakistan na Qatar.
Kamal Kharrazi, aliyekuwa Waziri wa Mambo ya Nje wa zamani wa Iran na mshauri wa kimataifa wa kiongozi wa zamani wa nchi hiyo, alifariki dunia kutokana na majeraha aliyopata katika shambulio la Marekani.
Katika sehemu nyingine ya hotuba yake, Bw. Araqchi alionya dhidi ya "minong'ono ya uhasama kutoka kwa wachochezi wa vita" na akaonya kuwa Iran itasababisha gharama kubwa kwa upande mwingine.
"Makombora ya Iran yaliangamiza makumi ya ndege za kivita za Marekani zikiwa ardhini," alisema.
Kauli hizi zinakuja saa chache baada ya Donald Trump kuzungumzia tena uwezekano wa kuchukua hatua mpya za kijeshi dhidi ya Iran, akisema, "Labda italazimika mimi mwenyewe nimalize kazi hiyo, au labda watakubali." Trump Alisisitiza kuwa bado hana uhakika kuhusu matokeo yatakavyokuwa.
Soma pia:
Watu 10 wauawa na maduka kuporwa Kaskazini mwa Nigeria
Watu waliojihami na silaha wameivamia kijiji kimoja katika jimbo la Taraba, kaskazini-mashariki mwa Nigeria, na kuwaua takriban watu 10, na kupora maduka na kuchoma nyumba.
Kuna hofu kwamba idadi halisi ya waliofariki huenda ikawa ya juu Zaidi.
Walioshuhudia tukio hilo wanasema takriban watu 20 wameuawa, huku shirika moja lisilo la kiserikali eneo hilo likikadiria kuwa idadi hiyo inaweza kufikia 50.
Inaripotiwa kuwa washambuliaji hao walifika katika kijiji cha Binnari, eneo la Karim Lamido, wakiwa kwenye pikipiki muda mfupi baada ya sala za mchana za Waislamu siku ya Ijumaa. Walitekeleza mashambulizi yaliyodumu kwa muda was aa nne.
Polisi wanasema wanawatafuta wahalifu au katika misitu iliyokaribu.
Hata hivyo, shirika la kutetea haki za binadamu la Amnesty International limeishutumu serikali ya Nigeria kwa kushindwa kulinda jamii za vijijini.
Nigeria inaendelea kukabiliwa na mashambulizi ya mara kwa mara ya makundi yenye silaha katika maeneo mbalimbali, yakiwemo maeneo ya kaskazini-magharibi, kaskazini-mashariki na katikati mwa nchi hiyo.
Soma pia:
Trump amjibu Obama na kudai utawala wake uliiwezesha Iran kupata silaha za nyuklia
Rais wa Marekani Donald Trump amemshambulia vikali rais wa zamani Barack Obama, akijibu ukosoaji wake kwa kusema kuwa Obama aliipa Iran mabilioni ya dola wakati wa utawala wake, na kuiwezesha nchi hiyo kupata silaha za nyuklia.
“Obama alikuwa kiongozi dhaifu. Aliipa Iran mabilioni ya dola na kufungua njia kwa nchi hiyo kupata silaha ya nyuklia,” alisema Trump kupitia mtandao wake wa kijamii wa Truth Social.
Rais huyo aliongezea kuwa Obama alikuwa rais asiyekuwa na uwezo, baada ya kuwaunga mkono Hillary Clinton katika uchaguzi wa mwaka 2016 na Kamala Harris katika uchaguzi wa mwaka 2024, ila wagombea wote wawili walishindwa katika chaguzi hizo.
Katika hotuba zake za kampeni hapo jana, Barack Obama alikosoa sera za serikali ya Trump, ikiwemo vita dhidi ya Iran. Alisema kuwa makubaliano ya nyuklia na Iran yaliyoafikiwa wakati wa utawala wake yalikuwa yameizuia nchi hiyo kupata silaha za nyuklia bila hata kurusha kombora moja.
Soma pia:
Israel kufunga vivuko vya Ukingo wa Magharibi wakati wa uchaguzi
Vivuko vyote vya mpakani vya kuingia na kutoka eneo la Ukingo wa Magharibi vitafungwa siku ya Jumanne wakati wa uchaguzi nchini Israel, jeshi la nchi hiyo limesema.
Aidha, wafanyakazi wa Kipalestina hawataruhusiwa kuingia katika makazi yoyote ya walowezi wa Israel.
Vikwazo hivyo vinakuja wakati Israel imeimarisha operesheni zake za usalama katika Ukingo wa Magharibi unaokaliwa kimabavu, baada ya kuuawa kwa wanajeshi wawili wa Israel na wanamgambo wa Kipalestina katika eneo hilo.
Jeshi la Israel (IDF) lilitangaza kupiga marufuku kuingia na kutoka kwa wafanyakazi wa Kipalestina katika maeneo yote ya Yudea na Samaria pamoja na Bonde la Mto Jordan, yakiwemo maeneo ya viwanda. Pia, vivuko vyote vya mpakani vitafungwa siku ya Jumanne.
Kabla ya shambulio lililoongozwa na Hamas dhidi ya Israel tarehe 7 Oktoba 2023, zaidi ya wafanyakazi 100,000 wa Kipalestina waliruhusiwa kuingia Israel kufanya kazi. Tangu wakati huo, ni idadi ndogo tu ambayo walipewa vibali vyao vya kufanya kazi.
Soma pia:
Brazil kupiga kura katika duru ya pili ya uchaguzi wa urais wenye ushindani mkali
Raia wa Brazil wanatarajiwa kupiga kura hii leo, kumchagua rais wao mpya, katika duru ya pili ya uchaguzi uliokumbwa na ushindani mkali.
Chaguo la raia wa Brazil ni kati ya rais wa sasa mwenye umri wa miaka 80, Luiz Inácio Lula da Silva, wa mrengo wa kushoto, ambaye anawania muhula wa nne usiofuatana madarakani, na seneta wa mrengo wa kulia Flávio Bolsonaro, mwenye umri wa miaka 45.
Bolsonaro ni mwanawe rais wa zamani wa mrengo wa kulia, Jair Bolsonaro, ambaye anatumikia kifungo cha miaka 27 jela kwa kupanga njama ya kupindua serikali baada ya kushindwa katika uchaguzi uliopita wa mwaka wa 2022.
Flávio Bolsonaro ndiye anayeonekana kuwa na nafasi kubwa ya kushinda uchaguzi huo, au kupoteza ushindi alioukaribia, baada ya kuongoza katika duru ya kwanza ya upigaji kura iliyofanyika Oktoba 4. Rais wa Marekani Donald Trump alielezea matokeo hayo kuwa ushindi “mkubwa sana.”
Aidha katika duru ya kwanza ya uchaguzi huo, hakuna kiongozi aliyepata Zaidi ya asilimia 50 za kura katika uchaguzi uliofanyika mwezi Oktoba huku duru ya pili ya uchaguzi huo ukiwa na ushindani mkali tayari.
Soma pia:
Obama amkosoa Trump kuhusu vita vya Iran na kupanda kwa gharama ya maisha
Rais wa zamani wa Marekani, Barack Obama, ameikosoa serikali ya Donald Trump kuhusu vita vya Iran na kupanda kwa bei za bidhaa muhimu.
Obama aliikosa serikali ya Marekani alipokuwa akifanya kampeni ya kuwaunga mkono wagombea wa chama cha Democratic katika uchaguzi wa katikati ya muhula nchini Marekani.
“Uchaguzi huu ndio fursa yetu ya mwisho na bora zaidi ya angalau kudhibiti baadhi ya mambo yasiyo na busara yanayofanywa na serikali hii,” Obama aliwaambia wananchi waliohudhuria mkutano huo wa kampeni katika jimbo la Ohio.
Aidha, Rais wa Marekani Donald Trump,ametetea sera za serikali yake kuhusu uhamiaji na ushuru wa bidhaa katika mkutano wa kampeni alioufanya katika jimbo la Georgia.
Uchaguzi wa katikati ya muhula, utakaofanyika tarehe 3 mwezi Novemba, utaamua ni chama gani kitakachodhibiti Bunge la Marekani kwa kipindi kilichosalia cha muhula wa Trump. Matokeo hayo yataathiri pia urahisi wa rais kutekeleza mipango yake.
Upigaji kura wa mapema tayari umeanza, na Trump alipiga kura yake siku ya hapo jana katika jimbo la Florida, akiwa ameandamana na mkewe, Melania Trump.
Soma pia:
Zaidi ya watu 1000 wakamatwa Ufaransa katika maandamano ya kupinga kupanda kwa gharama ya maisha
Maafisa wa usalama nchini Ufaransa, wamesema wamewakamata Zaidi ya watu elfu moja, baada ya mamia ya maelfu ya watu kushiriki maandamano nchini humo, ambayo yalishuhudia makabiliano makali ya polisi hapo jana.
Baada ya siku nzima ya maandamano yaliyokuwa kwa kiasi kikubwa ya amani, polisi walitumia mabomu ya kutoa machozi na magari ya kunyunyizia maji kuwatawanya waandamanaji katika miji kadhaa, ikiwemo Paris.
Hata hivyo, vizuizi vya barabarani vilichomwa moto katika mji wa Marseille, huku baadhi ya watu wakivunja mbao zilizokuwa zimefunika duka moja katika mji wa Bordeaux.
Hadi kufikia sasa, maafisa wa usalama wamefanikiwa kuzuia ghasia na uporaji ikilinganishwa na kiwango kilichoshuhudiwa mwishoni mwa wiki iliyopita, ambapo kulishuhudiwa matukio mabaya zaidi ya uharibifu wa amani katika historia ya kisasa ya Ufaransa.
Wizara ya Mambo ya Ndani ya Ufaransa imesema inakadiria kuwa watu 410,000 walishiriki katika maandamano ya hapo jana huku vyama vya wafanyakazi vikikadiria idadi hiyo kufikia takriban 800,000.
Mapema wiki hii, Rais Emmanuel Macron alikuwa ameamuru kuwa maandamano yatakayoruhusiwa ni yale tu yaliyoandaliwa na vyama vya wafanyakazi vinavyotambuliwa rasmi.
Katika siku za hivi karibuni, mamia ya watu wamehukumiwa vifungo vya jela kwa makosa ya uharibifu wa mali, uchomaji moto na uporaji, kufuatia kusikilizwa kwa kesi zao kupitia taratibu za haraka za mahakama.
Soma pia:
Hujambo na karibu katika matangazo yetu ya moja kwa moja Jumapili ya leo
