Ball ùr ag iarraidh comataidh fa leth mu leasachadh an A9

Thuirt ball ùr an Eilein Sgitheanaich, Loch Abair is Bhàideanach aig Holyrood gum bu chòir do Phàrlamaid na h-Alba sùil a thoirt feuch dè eile as urrainnear a dhèanamh gus cabhag a chur air Riaghaltas na h-Alba a thaobh obair-leasachaidh an A9.

Tha am ball Lib Deamach, Anndra Baxter, air sgrìobhadh gu Oifigear Riaghlaidh na pàrlamaid agus e airson 's gun tèid comataidh ùr a stèidheachadh aig am bi aire air an obair sin.

Bha an leithid air a mholadh le rannsachadh Comataidh nan Ath-chuingean Poblach sa Phàrlamaid mu dheireadh.

Tha Anndra Baxter ag ràdh, leis gu bheil pàrlamaid agus buidheann de bhuill-phàrlamaid ùr ann, gu bheil an t-àm ann seo a thoirt gu buil.

Tha e ag ràdh gu bheil cho cudromach is a tha an cuspair a' fàgail gu bheil e riatanach gum bi comataidh fa leth ann gus aire a thoirt dha.

"Ged a tha e comasach an cuspair a thogail ann am pàirtean eile den phàrlamaid, chan eil sin an aon rud ri sgrùdadh mionaideach le buidheann de bhuill-phàrlamaid timcheall air bòrd a' ceasnachadh mhinistearan agus oifigearan", thuirt e.

Tha an riaghaltas ag amas air an A9 a dhèanamh dà-fhillte ro 2035.

Tha obair-togail a leantainn air earrannan eadar Tom Aitinn is a' Mhoigh agus Crois-rathaid Abhainn Tatha agus Baile an Lùig. Thathar an dùil gum bi an dà earrann sin deiseil ann an 2028.

Tha Mgr Baxter ag ràdh gu bheil cuideam a dhìth ge-tà gus an riaghaltas a chumail ris a' chlàr-ama a stèidhich iad.

"Le ionmhas poblach ann an staid chugallaich, agus ministear ùr a' coimhead air ath-leasachadh na roinne poblaich, tha dragh orm gum faodadh pròiseact mar an A9 tighinn fo chuideam agus gum faodadh an clàr-ama a bhith air a phutadh air ais", thuirt e.

"Bu chòir dhuinn cuideam a chuir air an riaghaltas an clàr-ama a thoirt air adhart."