ኣብ ኮረም፡ ኣላማጣን ሽረን ዝተሓከሙ ውጉኣት ቍጽሮም 720 ከም ዝበጽሐ ተገሊጹ

ኣብ ሰሜን ኢትዮጵያ ዳግማይ ውግእ ብሰንኪ ብምውልዑ፡ ካብ 22 ክሳዕ 25 መስከረም 2026 ኣብ ውሽጢ 48 ሰዓታት ጥራይ ኣብ ሆስፒታላት ኮረምን ኣላማጣን ዝኣተዉ ተሓከምቲ ቍጽሮም ካብ 180 ናብ 420 ክብ ከም ዝበለ 'ሓካይም ብዘይ ዶብ' (ኤምኤስኤፍ) ኣፍሊጡ።

እቲ ትካል ሰኑይ 28 መስከረም 2026 ኣብ ዘውጽኦ መግለጺ ከም ዝሓበሮ፡ ብደገፉ ኣብ ዝመሓደር ኣብ ሰሜን ምዕራብ ትግራይ ከተማ ሽረ ዝርከብ ሆስፒታል ስሑል ጥራይ ብ25 መስከረም 2026 ልዕሊ 300 ኣብ ውግእ ዝተጐድኡ ተሓከምቲ ኣትዮም ኣለዉ።

ምስዚ ሓድሽ ውግእ ተተሓሒዙ እናወሰኸ ንዝመጽእ ዘሎ ቍጽሪ ቍሱላት ምላሽ ንምሃብ፡ ኣባላት እቲ ትካል ካብ 22 መስከረም ጀሚሮም ንጥፈታቶም ከም ዘስፍሑን ኣብቲ ዞባ ዘሎ ኵነታት "ኣዝዩ ዘስግእ" ምዃኑን ኣመልኪቱ ኣሎ።

ሓካይም ብዘይዶብ ኣብ መግለጺኡ፡ ኣብ ሆስፒታላት ሽረ፡ ሽራሮን ኮረምን ጥዕና ኣደታትን ህጻናትን ሓዊሱ ዝወሃብ ኣገልግሎት ሕክምና ምድጋፍ ከም ዝቕጽል ኣረጋጊጹ።

እንተዀነ፡ ብሰንኪ እቲ እናበኣሰ ዝኸይድ ዘሎ ናይ ጸጥታ ኵነታት፡ ኣብ ሆስፒታል ኣላማጣ ዝነበረ ምንቅስቓሳት ደው ክብል ከም ዝተገደደን ናብ ህዝቢ እናኸድካ ዝግበር ንጥፈታት ረድኤት ንጥፈታት ከም እተቛረጸን ኣፍሊጡ ኣሎ።

በቲ ኻልእ ወገን ግን፡ ብውግእ ዝተጐድኡ ሰባት ብብዝሒ ኣብ ዝውሕዙሎም ዘለዉ ከባቢታት ሰብ-ሞያኡ ከም ዘዋፈረ ኣረዲኡ።

ተቐማጦ ካብቲ ኲናት ሃዲሞም ይመዛበሉ ብምህላዎም ድማ ሓካይም ብዘይዶብ ኣብ ክልላት ትግራይ፡ ኣምሓራን ዓፋርን ዘለዉ ተመዛበልቲ ድሌታቶም ንምምላእ ምድላዋት ይገብር ከም ዘሎ ብምሕባር፡ ምግፋሕ እቲ ግጭት ንድሕነት ንጹሃን ዜጋታትን ተበጻሕነት ጥዕናን ኣብ ሓደጋ ከየውድቖ ስግኣቱ ገሊጹ።

በቲ ካልእ ሸነኽ፡ ዓለምለኻዊ ኮሚቴ ቀይሕ መስቀል፡ ውግእ ካብ ዝካየደሉ ዘሎ ክልል ትግራይ 161 ሰባት ናብ ክልል ዓፋር ከም ዘግዓዘ ኣፍሊጡ።

እቲ ትካል ሰኑይ ኣብ ዘውጽኦ መግለጺ ከም ዝሓበሮ፡ ካብ ትግራይ ካብ ዝወጽኡ ሰባት ኣባላት ፈደራል ፖሊስ ኢትዮጵያን ስድራቤቶምን፡ ሰራሕተኛታት መንገዲ ኣየር ኢትዮጵያን ስድራቤቶምን፡ ሰራሕተኛታት ድሕነት ስቪል ኣቪየሽን፡ ተዓዘብቲ ሕብረት ኣፍሪቃ ከምኡ'ውን ኣባላት ማሕበር ቀይሕ መስቀል ኢትዮጵያ ይርከብዎም።

ምስ ምጅማር እዚ ሓድሽ ውግእ ተተሓሒዙ ኣብ ክልል ትግራይ ኣገልግሎት ተለፎንን ኢንተርነትን ክቋረጽ ከሎ፡ ኣብ ክልል ኣምሓራ ኣብ እትርከብ ታሪኻዊት ከተማ ላሊበላ ድማ በረራታት ነፈርቲ ደው ከም ዝበለ ነበርቲ ንቢቢሲ ገሊጾም።

ኣብ ሰሜን ኢትዮጵያ ተወሊዑ ልዕሊ 600,000 ሰባት ዝቐዘፈ ደማዊ ውግእ፡ ቅድሚ ኣርባዕተ ዓመት ብሽምግልና ሕብረት ኣፍሪቃ ኣብ ፕሪቶርያ ብዝተኸተመ ስምምዕ ሰላም ድሕሪ ምዕጋቱ፡ ኣብ መንጎ ፈደራላዊ መንግስትን ሓይልታት ህወሓትን ዝነበረ ምስሕሓብ እናገደደ መጺኡ ዝሓለፈ ረቡዕ ዳግማይ ናብ ግጭት ኣትዩ ኣሎ።

እዚ ዳግማይ ዝተባርዐ ውግእ፡ ህዝባዊ ወያነ ሓርነት ትግራይ፡ ሃገራዊ ምንቅስቓስ ፋኖ ኣምሓራ ከምኡ'ውን ሰራዊት ናጽነት ኦሮሞ ሓዊሱ ሸውዓተ ዕጡቓት ጕጅለታት "ንፈደራላዊ መንግስቲ ካብ ስልጣን ንምውራድ" ኪዳን ከም ዝመስረቱ ድሕሪ ምእዋጆም ኣብ ዝቐጸለ መዓልቲ እዩ ብወግዒ ተወሊዑ።

ኣብ መንጎ ክልተኦም ወገናት ኣብ ዘዳውቡ ከባቢታት ክልላት ኣምሓራን ዓፋርን ኲናት እናቐጸለ እንከሎ፡ ህወሓት "ካብ ፈደራላውያን ሓይልታት ዝተኸፍተለይ መጥቃዕቲ ንምክልኻል እየ ናብ ግጭት ኣትየ" ኢሉ። ፈደራላዊ መንግስቲ ድማ ካብ ህወሓት ንዝተኸፍተሉ መጥቃዕቲ ናይ ምክልኻል ስጕምቲ ይወስድ ከም ዘሎ ገሊጹ።

ኣመሪካ፡ ዓባይ ብሪጣንያ፡ ፈረንሳን ሕቡራት ኢማራት ዓረብን ብወገነን፡ ህወሓት ኣብ ጐረባብቲ ክልላትን ደቡብ ትግራይን ፈጺምዎ ዝበልዎ መጥቃዕትን መዓርፎታት ነፈርቲ ምቍጽጻሩን ብምዅናን፡ ምዕራግ ናይቲ ውግእ ከም ዘተሓሳሰበን ገሊጸን ኣለዋ።

ብተመሳሳሊ፡ ዳይረክተር ሂዩማን ራይትስ ዎች ክፍሊ ኣፍሪቃ ላቲሽያ ባደር፡ ኣብ ልዕሊ ሰለማውያን ተወሳኺ ጕድኣት ከይወርድ ሰራዊት ኢትዮጵያ ሕግታት ውግእ ከኽብርን መጥቃዕቲ ቅድሚ ምፍጻሙ ኵሉ ጭቡጥ ናይ ጥንቃቐ ስጕምትታት ክወስድን ጸዊዓ።