விமானிகள் சண்டையால் இஸ்ரேல் சென்ற விமானம் அவசரத் தரையிறக்கமா?
துபையில் இருந்து டெல் அவிவ் நோக்கிப் புறப்பட்ட ஃப்ளைதுபை பயணிகள் விமானம் புதன் கிழமை காலை செளதி அரேபியாவுக்கு திருப்பிவிடப்பட்டு, அங்கு அவசரமாகத் தரையிறக்கப்பட்டது.
விமானிகளுக்கு இடையே விமானத்தில் சண்டை ஏற்பட்டதாக இஸ்ரேலிய ஊடகங்கள் தெரிவித்தன. இதையடுத்து, விமானத்தில் இருந்து அவசர நிலை தகவல்கள் அனுப்பப்பட்டதால், விமானம் கடத்தப்பட்டு இருக்கலாம் என்ற அச்சமும் சிறிது நேரம் ஏற்பட்டது.
இரு விமானிகள் இடையே ஏற்பட்டதாகக் கூறப்படும் 'சண்டை'க்குப் பிறகே அவசரக்கால அலாரம் ஒலிக்கப்பட்டதாக தகவல்கள் தெரிவிக்கின்றன. இந்த விமானத்தில் பயணித்த இஸ்ரேலிய பயணி ஒருவர், விமானக் குழுவினர் உதவி கேட்டதாகவும், அதன் பிறகு பயணிகள் விமானிகளில் ஒருவரைக் கட்டுப்படுத்தி, அவரைக் கட்டிப் போட்டதாகவும் செய்தியாளர்களிடம் தெரிவித்துள்ளார்.
இஸ்ரேல் பிரதமர் பெஞ்சமின் நேதன்யாகு வெளியிட்டுள்ள அறிக்கையில், நிலைமை கட்டுக்குள் இருப்பதாகவும், சௌதி அரேபியாவில் இருந்து இஸ்ரேலிய பயணிகளை தாய்நாட்டிற்குக் கொண்டு வரும் முயற்சிகள் நடைபெற்று வருவதாகவும் தெரிவித்துள்ளார்.
- இது, பிபிசிக்காக கலெக்டிவ் நியூஸ்ரூம் வெளியீடு
