இந்தியர்களுடன் சென்ற கப்பல் மீது நடுக்கடலில் தாக்குதல் - வெளியுறவு அமைச்சகம் கூறியது என்ன?

கருங்கடலில் வணிகக் கப்பல்கள் மீது நடத்தப்பட்ட தாக்குதல்களுக்கு இந்திய வெளியுறவு அமைச்சகம் கடும் கண்டனம் தெரிவித்துள்ளது. இந்தச் சம்பவத்தில் இந்தியர்களும் பாதிக்கப்பட்டுள்ளதாக வெளியுறவு அமைச்சகம் தெரிவித்துள்ளது.

டோகோ நாட்டுக் கொடியுடன் இருந்த அல்ஃபா வாட்டன், பலாவ் நாட்டுக் கொடியுடன் இருந்த ஏபிள், லைபீரியா நாட்டுக் கொடியுடன் இருந்த அஃப்ராமேக்ஸ் ரியோ ஆகிய கப்பல்கள் மீது தாக்குதல் நடத்தப்பட்டதாக அமைச்சகம் தெரிவித்துள்ளது.

வெளியுறவு அமைச்சகத்தின் தகவலின்படி, ஏபிள் கப்பலில் ஏழு இந்தியர்கள் உட்பட மொத்தம் 18 மாலுமிகள் இருந்தனர். இந்தத் தாக்குதலில் இந்தியர் ஒருவர் காயமடைந்துள்ளார்.

பல்கேரிய அதிகாரிகளின் உதவியுடன் அனைத்து மாலுமிகளும் பாதுகாப்பாக மீட்கப்பட்டு, பல்கேரியாவின் வர்ணா நகரில் தங்குவதற்கான ஏற்பாடுகள் செய்யப்பட்டுள்ளன.

காயமடைந்த இந்தியர்களுக்கு தேவையான மருத்துவ சிகிச்சை அளிக்கப்பட்டு வருகிறது. பல்கேரிய அதிகாரிகள் செய்த உதவிக்காக இந்திய அரசு நன்றி தெரிவித்துள்ளது.

அஃப்ராமேக்ஸ் ரியோ கப்பலில் இருந்த 23 ஊழியர்களும் இந்தியர்கள் என்றும், அவர்கள் அனைவரும் பாதுகாப்பாக மீட்கப்பட்டதாகவும் அமைச்சகம் தெரிவித்துள்ளது.

ஆனால், அல்ஃபா வாட்டன் கப்பலில் இருந்த ஊழியர்கள் குறித்த தகவல் இதுவரை கிடைக்கவில்லை.

வணிகக் கப்பல்கள் மீது தொடர்ந்து நடத்தப்பட்டு வரும் தாக்குதல்கள் இந்தியாவுக்கு மிகுந்த கவலை அளிப்பதாக வெளியுறவு அமைச்சகம் தெரிவித்துள்ளது.

இதுபோன்ற தாக்குதல்களை உடனடியாக நிறுத்த வேண்டும் என்று இந்தியா மீண்டும் வலியுறுத்தியுள்ளது.

பிராந்தியத்தில் அமைதியையும் நிலைத்தன்மையையும் பேணுவதற்காக, வணிகக் கப்பல்கள், மாலுமிகள் மற்றும் பொதுமக்களின் உள்கட்டமைப்புகளை குறிவைத்து நடத்தப்படும் தாக்குதல்கள் உடனடியாக நிறுத்தப்பட வேண்டும் என்று அமைச்சகம் தெரிவித்துள்ளது.

சர்வதேச கடல் வழித்தடங்களின் பாதுகாப்பை உறுதி செய்வதன் முக்கியத்துவத்தையும், மாலுமிகளைப் பாதுகாப்பதன் அவசியத்தையும் இந்தியா வலியுறுத்தியுள்ளது.

- இது பிபிசிக்காக கலெக்டிவ் நியூஸ்ரூம் வெளியீடு