மெக்கா ஒப்பந்தத்தின் கீழ் ஹூத்திகளை எதிர்ப்பது பாகிஸ்தானுக்கு ஏன் கடினம்?

ஏமனின் சர்வதேச அளவில் அங்கீகரிக்கப்பட்ட செளதி ஆதரவு பெற்ற அரசாங்கத்திற்கும், ஈரான் ஆதரவு பெற்ற ஹூத்தி கிளர்ச்சியாளர்களுக்கும் இடையிலான போர் மீண்டும் தொடங்கியுள்ளது.

செளதி அரேபியா, பாகிஸ்தான் மற்றும் துருக்கியுடன் இணைந்து செய்து கொண்ட 'மெக்கா பாதுகாப்பு ஒப்பந்தத்தையும்' செயல்பாட்டிற்கு கொண்டு வந்துள்ளது.

ஹூத்திகள் அதிகாரப்பூர்வமாக 'அன்சார் அல்லாஹ்' (அல்லாஹ்வின் ஆதரவாளர்கள்) என்று அழைக்கப்படுகிறார்கள். இவர்கள் ஏமனின் வடமேற்கு சதா மாகாணத்தைச் சேர்ந்த ஒரு பழங்குடி சமூகத்துடன் தொடர்புடையவர்கள்.

ஹூத்திகள் ஷியா இஸ்லாமின் ஜைதி பிரிவைப் பின்பற்றுபவர்கள். ஜைதி முஸ்லிம்கள் ஏமனின் மொத்த மக்கள் தொகையில் சுமார் மூன்றில் ஒரு பங்காக உள்ளனர்.

கடந்த 1990களில் வடக்கு மற்றும் தெற்கு ஏமன் ஒன்றிணைக்கப்பட்ட பிறகு ஹூத்தி இயக்கம் உருவானது. இவர்கள் அரசாங்கத்திற்கு எதிராகப் பல கிளர்ச்சிகளை நடத்தினர். 2014-ல் ஹூதிகள் சனா நகரைக் கைப்பற்றியது ஒரு உள்நாட்டுப் போருக்கு வழிவகுத்தது. அந்தப் போர் இன்றும் நாட்டைப் பிரித்து வைத்துள்ளது.

ஹூத்திகள் மேலைநாடுகளுக்கும் இஸ்ரேலுக்கும் எதிரான கொள்கையைக் கொண்டவர்கள். அமெரிக்கா ஹூத்திகளை பயங்கரவாத அமைப்பாக அறிவித்துள்ளது. ஐரோப்பிய ஒன்றியம் ஹூத்திகள் மீது தடைகளை விதித்துள்ளது. ஹூத்தி தாக்குதல்களை எதிர்கொள்ள செளதி அரேபியாவுக்கு ராணுவ ஆதரவு வழங்க பாகிஸ்தானும் ஒப்புக்கொண்டுள்ளது.

பாகிஸ்தான் ஒரு சுன்னி முஸ்லிம்கள் பெரும்பான்மையாக வாழும் இஸ்லாமிய நாடாகும். மெக்கா ஒப்பந்தத்திற்கு முன்பே செளதி அரேபியாவுடன் அது நெருங்கிய பாதுகாப்பு மற்றும் மூலோபாய உறவைக் கொண்டிருந்தது. முஸ்லிம் நாடுகளில் பாகிஸ்தான் ராணுவ ரீதியாக மிகவும் திறன் வாய்ந்த நாடுகளில் ஒன்றாகக் கருதப்படுகிறது.

பாகிஸ்தான் அணுஆயுத வல்லமை பெற்ற மற்றும் முக்கியமான ராணுவ சக்தி கொண்ட நாடாகும். பாகிஸ்தான் தன் ராணுவ பலத்தை இந்தியாவுக்கு இணையான போட்டியாக சித்தரிக்கிறது. செளதி அரேபியாவின் ஆயுதப் படைகளுக்கு ராணுவப் பயிற்சி மற்றும் ஆயுதங்களை வழங்கும் ஒரு முக்கியமான நாடாகவும் பாகிஸ்தான் திகழ்கிறது.

பாகிஸ்தானின் இக்கட்டான நிலை

மறுபுறம், பொருளாதார ரீதியாகப் பலவீனமான பாகிஸ்தான் அரசுக்கு நிதியுதவி வழங்கும் முக்கிய நாடுகளில் ஒன்றாக செளதி அரேபியா இருந்து வருகிறது. சமீபத்தில், பாகிஸ்தானுக்கு 8 பில்லியன் டாலர் அளவிலான நிதியுதவி மற்றும் முதலீட்டை செளதி அரேபியா வழங்கியது. பாகிஸ்தானின் பொருளாதார நிலையைப் பொறுத்தவரை, இது மிகவும் முக்கியமானதாகப் பார்க்கப்பட்டது.

பாதுகாப்புப் பங்காளியாக மட்டுமின்றி, பொருளாதார மற்றும் புவிசார் அரசியல் ரீதியாகவும் பாகிஸ்தான் செளதி அரேபியாவை பெரிதும் சார்ந்துள்ளது. 1990ஆம் ஆண்டு, இராக்கின் ஆக்கிரமிப்பில் இருந்து செளதி அரேபியாவை பாதுகாப்பதற்காக உருவாக்கப்பட்ட சர்வதேச ராணுவப் படையில் இணைய பாகிஸ்தான் ஒப்புக்கொண்டது. அப்போது, செளதி அரேபியாவின் புனிதத் தலங்களைப் பாதுகாக்கும் பணியிலும் பாகிஸ்தான் வீரர்கள் ஈடுபட்டனர்.

இத்தகைய நெருக்கமான உறவு இருந்தபோதிலும், 2015-ஆம் ஆண்டு ஏப்ரலில் செளதி தலைமையிலான கூட்டணியில் இணைந்து ஏமனின் ஹூத்தி கிளர்ச்சியாளர்களுக்கு எதிராகப் போரிட வேண்டும் என்ற கோரிக்கையை பாகிஸ்தான் நாடாளுமன்றம் நிராகரித்தது. அப்போது பாகிஸ்தானின் இந்த முடிவு, இரான் ஆதரவு பெற்ற ஹூத்திகளுக்கு எதிராகப் பரந்த சன்னி கூட்டணியை உருவாக்க செளதி அரேபியா மேற்கொண்ட முயற்சிக்கு குறிப்பிடத்தக்க பின்னடைவாக அமைந்தது.

"இந்த நெருக்கடியை முடிவுக்குக் கொண்டுவர பாகிஸ்தான் தீவிரமான இராஜதந்திரப் பங்கை ஆற்றுவதற்கு ஏதுவாக, ஏமன் மோதலில் பாகிஸ்தான் நடுநிலை வகிக்க வேண்டும்" என்று பாகிஸ்தான் நாடாளுமன்ற உறுப்பினர்கள் தெரிவித்தனர். ஆனால், இந்த முறை 'மெக்கா ஒப்பந்தத்தின்' கீழ், ஹூத்தி தாக்குதல்களை எதிர்கொள்ள செளதி அரேபியாவுக்கு ராணுவ ஆதரவு வழங்க பாகிஸ்தான் ஒப்புக்கொண்டுள்ளது.

ஹூத்தி கிளர்ச்சியாளர்களுடன் பாகிஸ்தான் நேரடியாக மோதினால் என்ன நடக்கும்?

இது பாகிஸ்தானுக்கு மிகவும் சிக்கலான சூழ்நிலையாகப் பார்க்கப்படுகிறது. செளதி அரேபியாவுக்கும் ஹூத்திகளுக்கும் இடையே நீண்டகாலமாக மோதல் நீடித்து வரும் நிலையில், இதில் பாகிஸ்தான் நேரடியாக இணைந்தால், அந்நாடும் இந்த நீண்டகாலப் போருக்குள் சிக்கிக்கொள்ள வேண்டிய நிலை ஏற்படலாம்.

தற்போது, இந்தியாவுடனான பதற்றம், ஆப்கானிஸ்தான் எல்லையில் தொடரும் மோதல்கள், நாட்டுக்குள் ஆயுதமேந்திய குழுக்களின் தாக்குதல்கள் எனப் பல்வேறு பாதுகாப்புச் சவால்களை பாகிஸ்தான் எதிர்கொண்டு வருகிறது.

இஸ்லாமாபாத்தைச் சேர்ந்த கொள்கை ஆய்வு நிறுவனமான 'இன்ஸ்டிடியூட் ஆஃப் பாலிசி ஸ்டடீஸ்' அமைப்பின் மூத்த உறுப்பினரும் ஓய்வுபெற்ற பிரிகேடியருமான துக்ரல் யாமின், அல் ஜசீரா ஊடகத்திடம் பேசுகையில், இந்த ஒப்பந்தத்தின் வரம்புகள் இரு தரப்பினருக்கும் பொருந்தும் என்று கூறினார்.

"எல்லைப் பாதுகாப்பு மற்றும் உள்நாட்டு அச்சுறுத்தல்கள் காரணமாக பாகிஸ்தான் ராணுவம் ஏற்கனவே பெரும் அழுத்தத்தில் உள்ளது. எனவே, வெளிநாட்டுக்கு வீரர்களை அனுப்புவது கடினமாக இருக்கும். அதேபோல், செளதி அரேபியாவுக்கு வீரர்களை அனுப்புவதற்காக துருக்கி தனது ராணுவத்தின் ஒரு பகுதியை மற்ற இடங்களிலிருந்து திரும்பப் பெறத் தயாராக இருக்குமா என்பதும் கேள்விக்குறிதான். துருக்கிக்கு நேட்டோவில் கடமைகள் உள்ளன. மேலும், சிரியாவுடனான அதன் எல்லையும் முழுமையாகப் பாதுகாப்பானதாக இல்லை" என்று அவர் தெரிவித்தார்.

ஹூத்திகள் இரான் ஆதரவு பெற்றவர்கள். அதே நேரத்தில், பாகிஸ்தானுக்கும் தெஹ்ரானுடனான உறவைப் பேண முக்கியமான காரணங்கள் உள்ளன.

ராய்ட்டர்ஸ் செய்தி நிறுவனம் வெளியிட்ட தகவலின்படி, பாகிஸ்தான் தனது எண்ணெய் மற்றும் எரிவாயு விநியோகத்திற்காக ஹோர்முஸ் நீரிணை மற்றும் செங்கடல் வழித்தடங்களைச் சார்ந்துள்ளது. இந்த வழித்தடங்களில் இரான் அல்லது ஹூத்திகள் இடையூறு ஏற்படுத்தினால், பாகிஸ்தானின் எரிபொருள் விநியோகம் பாதிக்கப்படக்கூடும்.

எனவே, ஹூத்திகளுக்கு எதிரான போரில் பாகிஸ்தான் நேரடியாக ஈடுபடுவது போர்க்களத்துக்கு அப்பாலும், இராஜதந்திர மற்றும் பொருளாதார ரீதியிலான அபாயங்களை உருவாக்கக்கூடும்.

இதன் பொருள் பாகிஸ்தான் நேரடியாக இரானுடன் போரில் ஈடுபடும் என்பதல்ல. ஆனால், இரான் மற்றும் செளதி அரேபியா ஆகிய இரு தரப்பினருடனும் தனது உறவை சமநிலைப்படுத்துவது பாகிஸ்தானுக்கு மேலும் சிக்கலானதாக மாறக்கூடும்.

கிங்ஸ் காலேஜ் லண்டனின் பாதுகாப்பு பகுப்பாய்வாளரும் மூத்த ஆய்வாளருமான ஆயிஷா சித்திகா, பிரிட்டிஷ் செய்தி இணையதளமான 'தி கார்டியன்' இதழிடம் கூறுகையில், பாகிஸ்தான் ராணுவத் தளபதி அசீம் முனீர், இந்த முடிவால் ஏற்படக்கூடிய அபாயங்களைச் சரியாக மதிப்பிடவில்லை என்று தான் கருதுவதாகத் தெரிவித்தார்.

"பாகிஸ்தான் இவ்வளவு விரைவாக தனது படைகளைப் போர்க்களத்தில் களமிறக்க வேண்டிய சூழ்நிலை ஏற்படும் என்று அவர் எதிர்பார்த்திருக்கவில்லை என்று நினைக்கிறேன்" என்றும் அவர் கூறினார்.

செளதி அரேபியாவிடம் பல பில்லியன் டாலர் மதிப்பிலான போர் விமானங்களும் ஆயுதங்களும் இருந்தாலும், பல ஆண்டுகளாக ஹூத்திகளுக்கு எதிராகப் போரிட்ட பிறகும் அவர்களை தீர்மானமாகத் தோற்கடிக்க முடியவில்லை.

மறுபுறம், ஹூத்திகள் கடுமையான மற்றும் சவாலான சூழ்நிலைகளிலும் திறம்படப் போரிடக்கூடிய வலுவான போராளிகள் என்பதை ஏற்கெனவே நிரூபித்துள்ளனர்.

மத்திய கிழக்கில் முடிவில்லாமல் நீடிக்கும் மற்றொரு போருக்குள் பாகிஸ்தான் இழுக்கப்பட்டுவிடுமோ என்றும் அந்நாட்டு அதிகாரிகள் கவலை தெரிவிக்கின்றனர்.

பாகிஸ்தானின் பொருளாதாரம் ஏற்கெனவே பலவீனமான நிலையில் உள்ளது. அதே நேரத்தில், ஆப்கானிஸ்தானில் தலிபான்களுடன் கிட்டத்தட்ட நேரடி மோதல் போன்ற சூழ்நிலையையும், நாட்டின் எல்லைப் பகுதிகளில் கட்டுக்கடங்காமல் அதிகரித்து வரும் தீவிரவாத அச்சுறுத்தலையும் அந்நாடு எதிர்கொண்டு வருகிறது.

சித்திகா மேலும் கூறுகையில், ஹூத்திகளுக்கு எதிரான போரில் பாகிஸ்தான் ஈடுபடுவது கடுமையான விளைவுகளை ஏற்படுத்தக்கூடும் என்று எச்சரித்தார்.

"இரானுக்கு அடுத்தபடியாக, உலகிலேயே அதிக எண்ணிக்கையிலான ஷியா முஸ்லிம்கள் வசிக்கும் நாடு பாகிஸ்தான். எனவே, ஹூத்திகளுக்கு எதிரான தாக்குதல்களில் பாகிஸ்தான் பங்கேற்பதை எதிர்த்து அந்நாட்டில் போராட்டங்கள் வெடிப்பதற்கான வாய்ப்பு உள்ளது" என்று அவர் தெரிவித்தார்.

செளதி அரேபியாவுக்கு மாபெரும் சவால்

இஸ்லாமாபாத்தைத் தளமாகக் கொண்ட 'பாக் இன்ஸ்டிடியூட் ஃபார் பீஸ் ஸ்டடீஸ்' அமைப்பின் இயக்குநர் முஹம்மது ஆமிர் ராணா, 'தி கார்டியன்' இதழிடம் கூறுகையில், "ஏமன் மண்ணில் நடைபெறும் எந்தவொரு ராணுவ நடவடிக்கையிலும் நேரடியாக ஈடுபடுவதைத் தவிர்க்கவே பாகிஸ்தான் முழுமையாக முயலும்" என்று தெரிவித்தார்.

அமெரிக்க ஊடக நிறுவனமான 'ப்ளூம்பெர்க்' வெளியிட்டுள்ள அறிக்கையில், செளதி அரேபியாவைப் பொறுத்தவரை, ஹூத்திகளைத் தோற்கடிப்பது நீண்டகாலமாகத் தொடரும் ஒரு எதிர்ப்புக்கு முற்றுப்புள்ளி வைப்பதாக அமையும் என்று குறிப்பிடப்பட்டுள்ளது.

ஹூத்திகளின் தாக்குதல்கள், செளதி பட்டத்து இளவரசர் முகமது பின் சல்மானின் பொருளாதாரத் திட்டங்களுக்கு பெரும் பாதிப்பை ஏற்படுத்தும் அபாயத்தையும் கொண்டுள்ளன. தரவு மையங்கள் முதல் மின்சார வாகனத் தயாரிப்பு வரை பல்வேறு திட்டங்களில் பல பில்லியன் டாலர் மதிப்பிலான வெளிநாட்டு முதலீடுகளை ஈர்ப்பதை அவர் நோக்கமாகக் கொண்டுள்ளார்.

மேலும், பிற நாடுகளைப் பொறுத்தவரை, ஹூத்திகளின் தோல்வி செங்கடலில் கப்பல் போக்குவரத்துக்கு நீண்டகாலமாக நிலவி வரும் அச்சுறுத்தலுக்கு முற்றுப்புள்ளி வைக்கக்கூடும். ஹூத்திகள் பல ஆண்டுகளாக செங்கடல் வழியாகச் செல்லும் கடல்சார் போக்குவரத்தைப் பாதித்து வருகின்றனர். கடந்த 2023ஆம் ஆண்டு ஹமாஸ் இஸ்ரேல் மீது நடத்திய அக்டோபர் 7 தாக்குதலுக்குப் பிறகு, காசாவில் இஸ்ரேல் மேற்கொண்டுவரும் ராணுவ நடவடிக்கைக்கு எதிர்ப்புத் தெரிவிக்கும் வகையில், செங்கடலில் கப்பல்கள் மீது தாக்குதல் நடத்தத் தொடங்கியதாக ஹூத்திகள் தெரிவித்தனர்.

ஆரம்பத்தில், இஸ்ரேலுடன் தொடர்புடைய கப்பல்களையே தங்கள் இலக்குகள் என்று அந்தக் குழு கூறியது. ஆனால், பின்னர் இஸ்ரேலுடன் நேரடித் தொடர்பு இல்லாத கப்பல்களும் தாக்குதலுக்கு உள்ளாகின. சூயஸ் கால்வாய், செங்கடல் மற்றும் பாப் அல்-மந்தெப் நீரிணை வழியாகச் செல்லும் கடல் பாதை, ஐரோப்பாவுக்கும் ஆசியாவுக்கும் இடையே பயணிக்கும் கப்பல்களுக்கு மிகவும் முக்கியமான மற்றும் குறுகிய வழித்தடமாகும்.

ஆனால், செங்கடல் வழித்தடத்தைத் தவிர்ப்பதற்காக தற்போது பல கப்பல் நிறுவனங்கள் தங்களது கப்பல்களை ஆப்பிரிக்காவின் தெற்கு முனையான கேப் ஆஃப் குட் ஹோப் வழியாகச் செலுத்தி வருகின்றன. இதனால், பயணத் தொலைவு ஆயிரக்கணக்கான மைல்கள் கூடுதலாவதுடன், இரண்டு வாரங்கள் வரை கூடுதல் நேரமும் ஆகலாம். இது கப்பல் போக்குவரத்துக்கான செலவையும் கணிசமாக அதிகரிக்கிறது.

பாகிஸ்தான் அதிகாரி ஒருவர் கடந்த செப்டம்பர் 18-ஆம் தேதி 'ஃபைனான்ஷியல் டைம்ஸ்' இதழிடம் கூறுகையில், "இது செளதி அரேபியாவுக்கும் ஏமனுக்கும் இடையிலான பிரச்னை என்று இரான் கூறுகிறது. ஆனால், பிராந்தியத்தில் பதற்றம் அதிகரிப்பது இரானின் கொள்கைக்கு சாதகமாகவே இருப்பதாகத் தெரிகிறது" என்று தெரிவித்தார்.

இரானால் சிக்கல்கள் அதிகரிக்குமா?

'பைனான்சியல் டைம்ஸ்' வெளியிட்டுள்ள அறிக்கையில், "இரானின் 'எதிர்ப்பு அச்சில்' மிகவும் செல்வாக்கு மிக்க உறுப்பினர்களில் ஒன்றான ஏமனின் ஹூத்திகள், தெஹ்ரான் ஆதரவு பெற்ற பிற ஆயுதக் குழுக்களுடன் ஒப்பிடும்போது, சித்தாந்த ரீதியாக ஈரானிய ஆட்சியுடன் அவ்வளவு நெருக்கமாக இல்லை. அவர்கள் பெரும்பாலும் தங்களது உள்நாட்டு நிகழ்ச்சி நிரலையே முன்னெடுத்து வருகின்றனர்.

"ஹூத்திகள் சுதந்திரமாகச் செயல்படுவதாக இரானிய அதிகாரிகள் வலியுறுத்துகின்றனர். இருப்பினும், அவர்களின் ராணுவ நடவடிக்கைகள் உலகளாவிய எரிசக்தி விலையை உயர்த்தும் தெஹ்ரானின் நோக்கத்திற்கு ஆதரவாக அமைகின்றன" என்று குறிப்பிடப்பட்டுள்ளது.

மேலும், இரானுடனான பாகிஸ்தானின் பேச்சுவார்த்தைகள் குறித்து அறிந்த ஒருவர், இஸ்லாமாபாத் மிகவும் சிக்கலான சூழ்நிலையில் இருப்பதாகக் கூறியதாகவும் 'ஃபைனான்சியல் டைம்ஸ்' தெரிவித்துள்ளது. கடந்த ஏப்ரல் மாதம், செளதி அரேபியாவின் கிழக்குப் பகுதியில் உள்ள விமானப் படைத் தளம் ஒன்றில் பாகிஸ்தான் போர் விமானங்களையும் விமானப் படை வீரர்களையும் நிறுத்தியிருந்தது.

கடந்த 2015ஆம் ஆண்டு யேமனில் செளதி தலைமையிலான வான்வழித் தாக்குதல்களில் பங்கேற்க பாகிஸ்தான் மறுத்திருந்தது. ஆனால், தற்போது 'மெக்கா ஒப்பந்தத்தின்' கீழ் உள்ள கடமைகள் மற்றும் அந்நாட்டின் கடுமையான நிதி நெருக்கடி காரணமாக, இந்த முறை ரியாத்தின் கோரிக்கையை நிராகரிப்பது பாகிஸ்தானுக்கு மிகவும் கடினமாக இருப்பதாகப் பகுப்பாய்வாளர்கள் கூறுகின்றனர்.

செளதி–பாகிஸ்தான் உறவுகளை ஆய்வு செய்து வரும் பர்மிங்காம் பல்கலைக்கழகத்தின் ஆராய்ச்சியாளர் உமர் கரீம், ஏமனில் முழு அளவிலான போரில் ஈடுபடுவதா அல்லது வரையறுக்கப்பட்ட நடவடிக்கையை மேற்கொள்வதா என்பது குறித்து ரியாத் எடுக்கும் முடிவைப் பொறுத்தே பாகிஸ்தானின் உதவி அமையும் எனக் கருதுகிறார்.

'ஃபைனான்சியல் டைம்ஸ்' செய்தியிடம் பேசிய கரீம், "பெரிய அளவிலான போர் என்பது செளதி அரேபியாவின் உள்கட்டமைப்புகள் மிகப் பெரிய அளவிலான தாக்குதல்களை எதிர்கொள்ள நேரிடும் என்பதைக் குறிக்கும். செளதி அரேபியா பாகிஸ்தானிடம் உதவி கோரினால், டிரோன் தாக்குதல்களில் இருந்து செளதி அரேபியாவைப் பாதுகாப்பதற்கான வான்வழிப் பாதுகாப்பு நடவடிக்கைகளில் பாகிஸ்தான் இணையலாம். அல்லது, ஏமனில் இருந்து தாக்குதல்களை நடத்துவதற்குப் பயன்படுத்தப்படும் தளங்களைக் குறிவைக்கலாம்" என்றார்.

கிளர்ச்சியாளர்களுக்கு எதிரான அரபு கூட்டணிக்குத் தலைமை வகித்து செளதி அரேபியா ஏமனில் தலையிட்டபோது, ஹூத்திகள் பல ஆண்டுகளாக செளதி அரேபியாவுடன் போரிட்டு வந்தனர். 2022ஆம் ஆண்டு ஐ.நா. மத்தியஸ்தத்தில் ஏற்பட்ட போர்நிறுத்தம் அந்த ஆண்டு அக்டோபரில் முறையாக முடிவடைந்தபோதிலும், அதன்பிறகும் பெருமளவில் அமைதி நீடித்தது. ஆனால், கடந்த ஜூலை மாதம் ஹூத்திகள் செளதி அரேபியாவுக்கு எதிராக கடற்படை முற்றுகையை அறிவித்ததைத் தொடர்ந்து மோதல் மீண்டும் தீவிரமடைந்தது.

ஹூத்திகள் பல்வேறு கோரிக்கைகளை முன்வைத்துள்ளனர். ஏமன் அரசின் கட்டுப்பாட்டில் உள்ள பகுதிகளில் இருந்து கிடைக்கும் எண்ணெய் வருவாயைப் பகிர்ந்துகொள்வது, கிளர்ச்சியாளர்களின் கட்டுப்பாட்டில் உள்ள துறைமுகங்களில் இருந்து தடையற்ற கப்பல் போக்குவரத்தை அனுமதிப்பது உள்ளிட்டவை அவற்றில் அடங்கும்.

- இது, பிபிசிக்காக கலெக்டிவ் நியூஸ்ரூம் வெளியீடு