இந்திய பங்குச் சந்தை தொடர்ந்து சரிவது ஏன்? நான்கு முக்கியக் காரணங்கள்

இந்திய பங்குச் சந்தை தொடர்ந்து சரிவைச் சந்தித்து வருகிறது. திங்கள் கிழமை நிஃப்டி 50 குறியீடு கிட்டத்தட்ட ஆறு மாதங்களில் இல்லாத அளவுக்குச் சரிந்து, 23,000 புள்ளிகளுக்கும் கீழே சென்றது.

செவ்வாய்க் கிழமையும் நிஃப்டி 50 குறியீடு தொடர்ந்து சரிவைச் சந்தித்து வருகிறது.

ரூபாய் மதிப்பு சரிவு, அதிகரித்து வரும் கச்சா எண்ணெய் விலை, வெளிநாட்டு முதலீட்டாளர்களின் தொடர் பங்குகள் விற்பனை ஆகியவை சந்தையின் போக்கில் அழுத்தத்தை ஏற்படுத்தி வருகின்றன.

பிரென்ட் கச்சா எண்ணெய் ஒரு பேரலுக்கு 106 டாலருக்கும் அதிகமாக வர்த்தகமாகி வருகிறது. அதே நேரத்தில், அமெரிக்காவின் 10 ஆண்டுக்கால கருவூலப் பத்திரங்களுக்கான வருவாய் 19 ஆண்டுகளில் இல்லாத புதிய உச்சத்தை எட்டியுள்ளது. உலகளாவிய சந்தைச் சூழல் தொடர்ந்து சவாலானதாக உள்ளது.

செப்டம்பர் 18ஆம் தேதியுடன் முடிவடைந்த வாரத்தில் இந்தியாவின் அந்நிய செலாவணி கையிருப்பு சரிந்துள்ளது. இது கிட்டத்தட்ட இரு ஆண்டுகளில் இல்லாத அளவுக்கு மிகப் பெரிய வாராந்திர சரிவாக அமைந்துள்ளது.

இதற்கிடையில், ரூபாய் மதிப்பை ஆதரிப்பதற்காக ரிசர்வ் வங்கி டாலர்களை விற்பனை செய்தது. அதிகரித்துள்ள எண்ணெய் விலை மற்றும் மூலதன வெளியேற்றம் காரணமாக ரூபாய் மதிப்பு மீண்டும் அழுத்தத்திற்கு உள்ளாகியுள்ளது.

திங்கள் கிழமை பிஎஸ்இ சென்செக்ஸ் 708 புள்ளிகள் அல்லது 0.97% சரிந்து 72,064 புள்ளிகளில் முடிவடைந்தது. குறியீட்டில் இடம்பெற்றுள்ள பெரும்பாலான பங்குகள் சரிவில் வர்த்தகமாகின.

அமெரிக்க அதிபர் டொனால்ட் டிரம்ப், இரானுடன் ஏழு நாட்களுக்கு போர் நிறுத்தம் செய்வதற்கான முன்மொழிவை நிராகரித்தார். இதற்கிடையே, எரிபொருள் விநியோகம் குறைந்து வருவதாகவும் எண்ணெய் சந்தை நிலவரங்கள் சுட்டிக்காட்டின.

1. எண்ணெய் விலை உயர்வு

அமெரிக்கா-இரான் மோதல் காரணமாக மேற்கு ஆசியாவில் இருந்து எண்ணெய் விநியோகம் மீண்டும் சீரடையவில்லை. இந்த விநியோகத் தடையால் எண்ணெய் விலை உயர்ந்து வருகிறது. இந்தியாவை பொறுத்த வரை, கச்சா எண்ணெய் சந்தையை இயக்கும் முக்கியக் காரணியாக இது உள்ளது. ஏனெனில், இந்தியா தனது கச்சா எண்ணெய் தேவையில் பெரும்பகுதியை இறக்குமதி செய்கிறது.

பொதுவாக, கச்சா எண்ணெய் விலை நீண்ட காலத்திற்குத் தொடர்ந்து உயர்வது இந்திய பங்குச் சந்தைக்கு எதிர்மறையானதாக இருக்கும். இது இறக்குமதி செலவை அதிகரித்து, ரூபாய் மதிப்பில் அழுத்தத்தை ஏற்படுத்தக் கூடும், பணவீக்கம் மற்றும் வட்டி விகித அபாயங்களை அதிகரித்து, மேலும் எரிபொருளை அதிகம் பயன்படுத்தும் தொழில்களின் லாபத்திலும் அழுத்தத்தை ஏற்படுத்துகிறது.

கச்சா எண்ணெய் விலை உயர்வது அதிக இறக்குமதி செலவைக் குறிக்கிறது. இது ரூபாய் மதிப்பில் அழுத்தத்தை ஏற்படுத்துவதுடன், அதிக பண வீக்கத்திற்கும் வழிவகுக்கக் கூடும். இதனால், ரிசர்வ் வங்கியின் பணக் கொள்கை மேலும் இறுக்கமாகும் அபாயம் அதிகரிக்கிறது. இது நிறுவனங்களின் லாப வரம்புகள் மற்றும் பங்குகளின் மதிப்பீடுகளை பாதிக்கக்கூடும்.

எண்ணெய் விலை உயரும்போது, எண்ணெய் இறக்குமதிக்காக அதிக டாலர்கள் தேவைப்படும். இதனால் இந்தியாவின் வர்த்தகப் பற்றாக்குறை மற்றும் நடப்புக் கணக்குப் பற்றாக்குறை அதிகரித்து, ரூபாய் மதிப்பில் அழுத்தத்தை ஏற்படுத்தக் கூடும். ரூபாய் மதிப்பு பலவீனமடைவதால், கச்சா எண்ணெய் உள்ளிட்ட இறக்குமதிப் பொருட்களின் விலை மேலும் அதிகரிக்கும்.

அதிகரிக்கும் எண்ணெய் விலை, பலவீனமான ரூபாய், உயர்ந்து வரும் உலகளாவிய பத்திரங்களின் வட்டி விகிதங்கள், உலக அரசியல் அபாயங்கள் ஆகியவை இணைந்து, வெளிநாட்டு முதலீட்டாளர்கள் இந்திய சந்தையில் தங்களது முதலீட்டைக் குறைக்க வழிவகுத்துள்ளன. விநியோகத் தடைகளால் அதிகரிக்கும் எண்ணெய் விலை, உலகளாவிய தேவை அதிகரிப்பால் உயர்வதைவிடப் பெரும்பாலும் அதிக தாக்கத்தை ஏற்படுத்தும்.

2. வலுவடையும் பத்திரங்களின் வட்டி வருவாய்

அமெரிக்க சந்தையில் ஏற்பட்ட கடுமையான சரிவுக்குப் பிறகு, ஆசியாவின் பத்திரச் சந்தைகள் சீரடைந்தன. ஆனால், பத்திரங்களின் வட்டி வருவாய் தொடர்ந்து உயர்ந்த நிலையிலேயே இருந்தது. ப்ளூம்பெர்க் அறிக்கைப்படி, திங்கள் கிழமை 2007ஆம் ஆண்டுக்குப் பிறகு இல்லாத அளவுக்கு உயர்ந்த அமெரிக்காவின் 10 ஆண்டுக்கால பத்திரங்களின் வட்டி வருவாய், ஒரு அடிப்படைப் புள்ளி உயர்ந்து 5.25 சதவிகிதமாக இருந்தது. 30 ஆண்டுக்கால பத்திரங்களின் வட்டி வருவாயும் ஒரு அடிப்படைப் புள்ளி உயர்ந்து 5.56 சதவிகிதமாக இருந்தது.

இந்தச் சூழலில், அமெரிக்க கருவூலப் பத்திரங்களின் வட்டி வருவாய் அதிகரிப்பது, டாலர் மதிப்பில் இருக்கும் நிலையான வருவாய் தரும் முதலீட்டுக் கருவிகளை அதிகம் கவர்ச்சிகரமானதாக மாற்றக்கூடும்.

மேலும், உலகளாவிய கடன் பெறும் செலவுகளையும் அதிகரிக்கக்கூடும். இதனால், வளர்ந்து வரும் சந்தைகளுக்குச் செல்லும் வெளிநாட்டு முதலீட்டு வரத்து குறையக் கூடும். பத்திரங்களின் வட்டி வருவாய் என்பது, அரசாங்கம் அல்லது ஒரு நிறுவனத்திற்குக் கடன் வழங்குவதற்காக முதலீட்டாளர்கள் எதிர்பார்க்கும் வருவாயைக் குறிக்கிறது.

பத்திரங்களின் விலையும், அவற்றின் வட்டி வருவாயும் எதிரெதிர் திசையில் நகரும். பத்திரங்களின் விலை குறையும்போது, வட்டி வருவாய் அதிகரிக்கும். விலை உயரும்போது, வட்டி வருவாய் குறையும். இந்த எதிர்மறையான தொடர்பை ரிசர்வ் வங்கியும் வெளிப்படையாகக் குறிப்பிடுகிறது.

அமெரிக்க கருவூலப் பத்திரங்களின் வட்டி வருவாய் அதிகரிப்பது, அதிக அபாயம் கொண்ட வளர்ந்து வரும் சந்தைகளின் சொத்துகளைவிட, டாலர் மதிப்பிலான அரசுப் பத்திரங்களை அதிக கவர்ச்சிகரமானதாக மாற்றக்கூடும்.

இதனால், இந்திய பத்திரங்கள் மற்றும் பங்குகளில் வெளிநாட்டு நிறுவன முதலீட்டாளர்களின் (FII) விற்பனை தொடங்கலாம் அல்லது மேலும் அதிகரிக்கலாம். இது ரூபாய் மதிப்பிலும், இந்தியாவின் முக்கிய பங்குச் சந்தை குறியீடுகளிலும் அழுத்தத்தை ஏற்படுத்தக் கூடும்.

3. உலகளாவிய சந்தைகளில் பலவீனம்

உலகளாவிய பங்குச் சந்தைகள் ஒரு வாரத்தில் இல்லாத அளவுக்குச் சரிவடைந்தன. இதன் தாக்கம் இந்திய பங்குச் சந்தைகளிலும் எதிரொலித்தது.

ஜப்பானின் நிக்கேய் 1.4%, தென் கொரியாவின் கோஸ்பி 1.05%, ஹேங் செங் 0.96% என்ற அளவில் சரிந்தன. நாஸ்டாக் 100 ஃபியூச்சர்ஸும் 0.3% சரிந்தது. இது அடுத்த கட்டத்திலும் மேலும் சரிவு ஏற்படக் கூடும் என்பதைக் குறிக்கிறது.

4. வெளிநாட்டு நிறுவன முதலீட்டாளர்களின் விற்பனை தொடர்கிறது

செப்டம்பர் மாதத்தில் இதுவரை வெளிநாட்டு போர்ட்ஃபோலியோ முதலீட்டாளர்கள் (FPI) இந்திய பங்குகளை நிகர அளவில் 20,695 கோடி ரூபாய்க்கு விற்பனை செய்துள்ளனர்.

இரண்டு மாதங்கள் தொடர்ந்து முதலீடு செய்த பின்னர், எஃப்ஐஐ-கள் தற்போது மீண்டும் தங்கள் முதலீடுகளைத் திரும்பப் பெற்று வருகின்றனர். அமெரிக்க பத்திரங்களின் அதிக வட்டி வருவாய் மற்றும் இந்தியாவின் ஐபிஓ சந்தையில் கிடைக்கும் அதிக வருமானம் காரணமாக இந்தப் போக்கு தொடர்ந்து நீடிக்கக்கூடும்.

மோதிலால் ஓஸ்வால் ஃபைனான்ஷியல் சர்வீசஸ் நிறுவனத்தின் கூற்றுப்படி, கடந்த இரு நிதியாண்டுகளில் வெளிநாட்டு நிறுவன முதலீட்டாளர்கள் இந்திய பங்குகளில் இருந்து 56 பில்லியன் டாலர் அளவுக்குப் பெருமளவில் முதலீடுகளைத் திரும்பப் பெற்றுள்ளனர். இதன் மூலம் 2019ஆம் ஆண்டு முதல் அவர்கள் செய்த மொத்த முதலீட்டு வரவு முழுமையாக நீக்கப்பட்டுள்ளது.

இதன் காரணமாக, கடந்த 10 ஆண்டுகளில் ஏற்பட்ட மொத்த முதலீட்டு வரத்தும் கிட்டத்தட்ட பூஜ்ஜியத்தை நெருங்கியுள்ளது. 2026ஆம் ஆண்டில் இதுவரை வெளிநாட்டு முதலீட்டாளர்கள் 25.6 பில்லியன் டாலர் மதிப்பிலான இந்திய பங்குகளை விற்பனை செய்துள்ளனர். முதலீட்டாளர்களின் மனநிலை தொடர்ந்து நிலையற்றதாக உள்ளது.

இரு ஆண்டுகளாக மீள முடியாமல் இருப்பது ஏன்?

இந்திய பங்குச் சந்தையால் கடந்த இரண்டு ஆண்டுகளாக மீண்டு வர முடியாமல் இருப்பது ஏன்?

ராம்தேவ் அகர்வால், மோதிலால் ஓஸ்வால் நிறுவனத்தின் தலைவரும் இணை நிறுவனரும் ஆவார். கடந்த இரு ஆண்டுகளாக இந்திய சந்தையில் ஏற்பட்டுள்ள மந்தநிலை குறித்து பிரிட்டன் நாளிதழான ஃபைனான்ஷியல் டைம்ஸிடம் பேசிய அவர், "கோவிட் பெருந்தொற்றுக்குப் பிறகு, மூன்று முதல் நான்கு ஆண்டுகளுக்கு சுமார் 25% வளர்ச்சி விகிதத்தில் வளர்ந்தோம். வளர்ச்சி மிக வேகமாக இருந்தது. 2021 முதல் 2024 வரை சந்தை கிட்டத்தட்ட ஒரே திசையில் நகர்ந்தது. நிஃப்டி 50 குறியீடு, 8,000 புள்ளிகளில் இருந்து 24,000 புள்ளிகளாக உயர்ந்தது. மூன்று ஆண்டுகளில் மூன்று மடங்கு உயர்வு ஏற்பட்டது. இது மிக அதிகமானதுதான். ஆனால், சந்தையின் இயல்பே அப்படித்தான்" என்றார்.

"இதற்குப் பிறகு ஒரு சரிவு ஏற்படுகிறது. சந்தை 10 படிகள் முன்னேறினால், அதன் பிறகு மூன்று அல்லது நான்கு படிகள் பின்னோக்கிச் செல்லும் அல்லது சில காலம் அதே நிலையில் இருக்கும். தற்போது சந்தை 22,000 முதல் 26,000 புள்ளிகள் வரையிலான வரம்பில் உள்ளது. பிஈ மல்டிபிள் 25இல் இருந்து சுமார் 20-ஆகக் குறைந்துள்ளது. ஆனால், கடந்த ஐந்து ஆண்டுகளாக உள்நாட்டு முதலீடு தொடர்ந்து வலுவாக இருப்பது மிகப்பெரிய மாற்றம். இதனால், வெளிநாட்டு போர்ட்ஃபோலியோ முதலீட்டாளர்கள் (FPI) பெருமளவில் விற்பனை செய்த போதிலும், நமது சந்தை பெரிய அளவில் சரியவில்லை" என்றார்.

ராம்தேவ் அகர்வாலின் கூற்றுப்படி, "2000ஆம் ஆண்டு முதல் 25 ஆண்டுகளுக்கான தரவுகளைப் பார்த்தால், குறியீட்டு அளவில் இந்திய நிறுவனங்களின் வருவாய் கூட்டு வளர்ச்சி விகிதத்தில் சுமார் 12% அதிகரித்துள்ளது. ஐந்து ஆண்டுகளுக்கான நகரும் சராசரியைப் பார்த்தாலும், அது சுமார் 12 சதவிகிதமாகவே உள்ளது. தற்போது பிஈ விகிதம் சுமார் 20ஆக உள்ளது. 2015ஆம் ஆண்டு முதல் இதுதான் அதன் சராசரியாக உள்ளது. மிகுந்த நெருக்கடியான சூழ்நிலைகளில் இது 18-ஆகக் குறையலாம். கோவிட் பேரிடர் காலத்தில்கூட இது 18க்கு கீழ் செல்லவில்லை" என்றார்.

"இதன் உச்ச நிலை சுமார் 24-25 ஆக இருந்துள்ளது. தற்போது இது 20 ஆக உள்ளது. இந்த நிலை நீடித்தால், 12% வளர்ச்சி விகிதத்தில் உங்கள் பணம் இரட்டிப்பாக சுமார் ஆறு ஆண்டுகள் ஆகும். பொருளாதார மேம்பட்டால், கடன் வழங்கல் அதிகரித்து வருவதைப் போல, சற்று சாதகமான சூழல் உருவானால், 15% வளர்ச்சி விகிதத்தில் இது ஐந்து ஆண்டுகளில் நடக்கலாம்."

எனவே, "12-15% வருமான விகிதத்தில், குறியீடு ஐந்து முதல் ஆறு ஆண்டுகளில் இரட்டிப்பாகலாம். நிச்சயமாக, திறமையான வர்த்தகர்கள் குறியீட்டைவிட அதிக வருமானத்தைப் பெற முடியும். ஆனால், சுமார் ஐந்து ஆண்டுகளில் சந்தை இரட்டிப்பாகும் என்று கணிப்பதற்குப் பின்னால் என்னுடைய கணக்கு இதுதான்" என்று விளக்கினார் அவர்.

- இது, பிபிசிக்காக கலெக்டிவ் நியூஸ்ரூம் வெளியீடு