சாலை பணிக்காக '650 ஆண்டு' மசூதியின் ஒரு பகுதியை இடிக்க அனுமதி - மத்தியபிரதேச உயர் நீதிமன்றம் கூறியது என்ன?

மத்தியப் பிரதேசத்தில் உஜ்ஜைனில் சாலை விரிவாக்கப் பணிக்காக ஷாஹி மசூதியின் ஒரு பகுதியை அகற்றுவதற்கு எதிராகத் தாக்கல் செய்யப்பட்ட மனுவை அம்மாநில உயர் நீதிமன்றத்தின் இரு நீதிபதிகள் கொண்ட அமர்வு தள்ளுபடி செய்துள்ளது.

இதன் மூலம், உஜ்ஜைனில் சாலை விரிவாக்கப் பணிகள் தொடர்ந்து நடைபெறும்.

2028-ஆம் ஆண்டு நடைபெறவுள்ள சிம்ஹஸ்த கும்ப மேளாவுக்கான முன்னேற்பாடாக நகரில் சாலை விரிவாக்கப் பணிகள் நடைபெற்று வருகின்றன. அங்குள்ள சுமார் 650 ஆண்டுகள் பழமையானதாகக் கருதப்படும் உஜ்ஜைனின் ஷாஹி மசூதி விவகாரத்தில் திங்கள்கிழமை காலை சர்ச்சை வெடித்தது.

ஞாயிற்றுக்கிழமை இரவு முதலே சத்ரி சௌக் பகுதியில் உள்ள மசூதிக்கு அருகே ஏராளமான மக்கள் கூடினர். திங்கள்கிழமை காலை அங்கிருந்த மக்கள் திரளுக்கும் போலீசாருக்கும் இடையே மோதல் ஏற்பட்டு, அது வன்முறையாக மாறியது.

இந்தச் சர்ச்சை மசூதி முழுவதையும் இடிப்பது பற்றியது அல்ல; சாலை விரிவாக்கத்திற்காக அதன் ஒரு பகுதியை இடிப்பது பற்றியதே ஆகும்.

கூட்டத்தைக் கட்டுப்படுத்த போலீசார் கண்ணீர்ப்புகைக் குண்டுகளை வீசினர். தற்போது ஷாஹி மசூதிப் பகுதியில் பெருமளவிலான போலீஸ் படை குவிக்கப்பட்டுள்ளது.

உஜ்ஜைன் மாவட்ட ஆட்சியர் ரோஷன் சிங் கூறுகையில், "சிம்ஹஸ்த 2028-க்கான முன்னேற்பாடுகளின் ஒரு பகுதியாக, சாலை விரிவாக்கம் மற்றும் பிற கட்டுமானப் பணிகள் நடைபெற்று வருகின்றன. அனைத்து மதங்கள் மற்றும் சமூகங்களைச் சேர்ந்த மக்களும் இதில் தாமாக முன்வந்து ஒத்துழைப்பு அளித்து வருகின்றனர்," என்றார்.

"சாலை விரிவாக்கப் பாதையில் வரும் தங்கள் வீடுகள் அல்லது வழிபாட்டுத் தலங்களை பலர் தாங்களாகவே அகற்றி வருகின்றனர். சத்ரி சௌக் பகுதியில் சாலை விரிவாக்கப் பாதையில் வரும் ஷாஹி மசூதியின் ஒரு பகுதியையும் முஸ்லிம் சமூகத்தினர் அகற்றி வருகின்றனர். வதந்திகளை நம்ப வேண்டாம் என்றும், அமைதி மற்றும் ஒழுங்கைப் பேணுவதில் அரசுக்கு ஒத்துழைப்பு அளிக்குமாறும் அனைவரையும் கேட்டுக்கொள்கிறேன்."

பிபிசியிடம் பேசிய உஜ்ஜைன் நகர காஜி காலிக் உர் ரஹ்மான், "ஞாயிற்றுக்கிழமை இரவு மசூதி நிர்வாகக் குழுவிற்கும் மாவட்ட நிர்வாகத்திற்கும் இடையே நடைபெற்ற பேச்சுவார்த்தைக்குப் பிறகு, அந்தப் பகுதியைத் தாங்களே அகற்றுவதற்கு மசூதி நிர்வாகக் குழு முடிவு செய்தது. வதந்திகள் காரணமாகச் சிலர் கோபமடைந்தனர். இதனால் சிறிது மோதல் ஏற்பட்டது, ஆனால் தற்போது நிலைமை இயல்பு நிலைக்குத் திரும்பியுள்ளது," என்று கூறினார். சட்டம்-ஒழுங்கைப் பராமரிக்க ரயில்வே பாதுகாப்புப் படை வீரர்களும் பணியில் ஈடுபடுத்தப்பட்டுள்ளனர்.

அகற்றப்படவுள்ள மசூதியின் ஒரு பகுதி, உஜ்ஜைன் மாநகராட்சி 15 மீட்டராக விரிவுபடுத்தத் திட்டமிட்டுள்ள சாலையின் பாதையில் அமைந்துள்ளது.

'சிம்ஹஸ்தா' திருவிழாக் காலங்களில் அதிகரிக்கும் போக்குவரத்து மற்றும் பக்தர்களின் வருகையைக் கருத்தில் கொண்டு, இந்த நடவடிக்கை அவசியம் என்று நிர்வாகம் கூறுகிறது.

மசூதி கமிட்டியின் வழக்கறிஞர் என்ன கூறினார்?

மசூதி கமிட்டி சார்பில் ஆஜரான வழக்கறிஞர் அசார் வார்சி, செப்டம்பர் 9 அன்று, இந்த மனு மீது தனி நீதிபதி அமர்வு ஒரு உத்தரவைப் பிறப்பித்திருந்ததாகக் கூறினார்.

அவர் கூறுகையில், "அந்த உத்தரவில், 'மாஸ்டர் பிளான்' அல்லது விரிவான திட்ட வரைபடத்தின்படி நடவடிக்கை எடுக்கப்பட வேண்டும் என்றும், அதைப் பின்பற்ற வேண்டும் என்றும் கூறப்பட்டிருந்தது. இதைத் தொடர்ந்து, கமிட்டி சார்பில் இரு நீதிபதிகள் கொண்ட அமர்வில் மேல்முறையீட்டு மனு தாக்கல் செய்யப்பட்டது," என்றார்.

விசாரணையின் போது, ​​மாற்றுப் பாதையைக் கண்டறிவது குறித்த ஆலோசனையும் நீதிமன்றத்தின் முன் வைக்கப்பட்டது.

வார்சியின் கூற்றுப்படி, "நிர்வாகத்திற்கும் மசூதி கமிட்டிக்கும் இடையிலான பேச்சுவார்த்தையின் போது, ​​மசூதியின் சுமார் மூன்று அடி பகுதியை அப்படியே தக்கவைப்பது குறித்தும் விவாதிக்கப்பட்டது. சாலை விரிவாக்கத்திற்காக எடுத்துக்கொள்ளப்படும் நிலத்திற்குப் பதிலாக, விதிகளின்படி சலுகைகள் வழங்கப்படும் என்று மாநகராட்சி தனது பிரமாணப் பத்திரத்தில் தெரிவித்திருந்தது."

மாநகராட்சி தனது பிரமாணப் பத்திரத்தில் குறிப்பிட்டுள்ள நிபந்தனைகளை நிறைவேற்றுமாறு இரு நீதிபதிகள் கொண்ட அமர்வு உத்தரவிட்டுள்ளது.

நீதிமன்ற உத்தரவைத் தொடர்ந்து, உஜ்ஜைனில் சாலை விரிவாக்கப் பணிகள் தொடரும். விசாரணையின் போது, ​​மாற்று ஏற்பாடுகள் மற்றும் பாதிக்கப்படும் பகுதி தொடர்பான சிக்கல்களை மசூதி கமிட்டி சுட்டிக்காட்டியது.

சாலை விரிவாக்கம் தொடர்பான சர்ச்சை

உஜ்ஜைன் மாநகராட்சியின் கூற்றுப்படி, 'உஜ்ஜைன் மேம்பாட்டுத் திட்டம் 2035'-ன் கீழ் சாலை விரிவாக்கப் பணிகள் மேற்கொள்ளப்படுகின்றன.

15 மீட்டராக விரிவுபடுத்தத் திட்டமிடப்பட்டுள்ள சாலைப் பாதையில்தான் 'ஷாஹி மசூதி' அமைந்துள்ளது. மசூதியின் ஒரு பகுதி, திட்டமிடப்பட்ட சாலைப் பாதையின் எல்லைக்குள் வருகிறது.

'சிம்ஹஸ்தா' நிகழ்வை முஸ்லிம் சமூகம் எதிர்க்கவில்லை என்று காஜி காலிக் உர் ரஹ்மான் கூறினார்.

"சிம்ஹஸ்தா (கும்பமேளா) விழா இதற்கு முன்பும் நடைபெற்றுள்ளது, இனியும் நடைபெறும். முஸ்லிம் சமூகம் எப்போதும் இதற்கு ஆதரவாகவே இருந்து வருகிறது. மாற்று ஏற்பாடுகள் செய்யப்பட வேண்டும் என்றும், எந்தவொரு மத வழிபாட்டுத் தலமும் இடிக்கப்படக் கூடாது என்றும் மட்டுமே நாங்கள் கூறுகிறோம். ஏனெனில், இவற்றில் பல வரலாற்றுச் சிறப்புமிக்க சின்னங்களாகும். உதாரணமாக 'ஷாஹி மஸ்ஜித்'-ஐ எடுத்துக்கொண்டால், அது சுமார் 650 ஆண்டுகள் பழமையானது," என்று அவர் செய்தியாளர்களிடம் கூறினார்.

உயர் நீதிமன்றத்தில் இந்த மனு ஏற்கனவே தள்ளுபடி

இந்த விவகாரத்தில், ஷாஹி மஸ்ஜித்தின் ஒரு பகுதியை அகற்றுவதற்கான மாநகராட்சியின் முடிவை எதிர்த்துத் தாக்கல் செய்யப்பட்ட இரண்டு மனுக்களை, மத்தியப் பிரதேச உயர் நீதிமன்றம் செப்டம்பர் 9 அன்று பிறப்பித்த உத்தரவில் தள்ளுபடி செய்தது.

மசூதியின் தொழுகைக்கூடத்தின் ஒரு பகுதி, சுமார் 120 அடி உயரமுள்ள அதன் மினாரா (கோபுரம்) மற்றும் 'மசார் சௌக் ஷாஹி' ஆகியவற்றை சாலை விரிவாக்கப் பணி பாதிக்கும் என்று மனுதாரர்கள் கூறியிருந்தனர்.

மாநகராட்சி நிர்ணயிக்கப்பட்ட சட்ட நடைமுறைகளைப் பின்பற்றியதாகவும், பாதிக்கப்பட்ட தரப்பினருக்குத் தங்கள் ஆட்சேபனைகளைத் தெரிவிப்பதற்கான வாய்ப்பை வழங்கியதாகவும் நீதிபதி சந்தீப் என். பட் தலைமையிலான அமர்வு குறிப்பிட்டது.

இது ஒரு மத வழிபாட்டுத் தலம் என்பதால் ஒரு குறிப்பிட்ட சமூகம் குறிவைக்கப்படுவதாக மசூதி தரப்பு வாதிட்டது; ஆனால், இந்த வாதத்தை நீதிமன்றம் நிராகரித்தது.

நீதிமன்றத்தில் சமர்ப்பிக்கப்பட்ட ஆவணங்களின்படி, அதே சாலையில் ஏற்கனவே பத்து கோயில்கள் மற்றும் ஒரு மசூதியின் சில பகுதிகள் அகற்றப்பட்டுள்ளன.

உஜ்ஜைனில் உள்ள சுமார் 80 வழிபாட்டுத் தலங்கள் தொடர்பான கட்டுமானங்கள் மீதான நடவடிக்கைகள் குறித்தும் நீதிமன்ற உத்தரவில் குறிப்பிடப்பட்டுள்ளது.

சம்பந்தப்பட்ட சொத்து ஒரு வழிபாட்டுத் தலமாக இருப்பதால் மட்டுமே, மாநகராட்சியின் நடவடிக்கையை தன்னிச்சையானது என்று கருத முடியாது என்று நீதிமன்றம் கூறியிருந்தது.

சிம்ஹஸ்தா விழாவுக்கான ஏற்பாடுகளின் போது சர்ச்சை

2028-ஆம் ஆண்டு நடைபெறவுள்ள சிம்ஹஸ்தா விழாவின் போது எதிர்பார்க்கப்படும் பக்தர்கள் எண்ணிக்கை மற்றும் போக்குவரத்து நிர்வாகத்தின் அவசியம் குறித்தும் நீதிமன்றம் தனது உத்தரவில் குறிப்பிட்டிருந்தது.

ஷாஹி மசூதி, மகாகாலேஷ்வர் கோயிலுக்கு நேர் எதிரேயும், க்ஷிப்ரா நதிக்கு அருகிலும் அமைந்துள்ளது.

சிம்ஹஸ்தா விழாவின் போது இப்பகுதியில் மக்கள் நடமாட்டம் அதிகமாக இருக்கும் என்றும், சாலை அகலப்படுத்தும் பணி போக்குவரத்து மற்றும் பொதுப் பாதுகாப்புடன் தொடர்புடையது என்றும் நீதிமன்றம் கூறியிருந்தது.

உயர் நீதிமன்றத்தில் நிவாரணம் கிடைக்காத பட்சத்தில், உச்ச நீதிமன்றத்தை அணுகலாம் என்று மசூதி கமிட்டியுடன் தொடர்புடையவர்கள் தெரிவித்திருந்தனர்.

நகர காஜியின் கூற்றுப்படி, இந்த மசூதி சுமார் 1390-ஆம் ஆண்டில் கட்டப்பட்டது.

தற்போது, ​​சத்ரி சௌக் மற்றும் ஷாஹி மசூதி ஆகிய பகுதிகளைச் சுற்றி காவல்துறை பாதுகாப்பு பணியில் ஈடுபடுத்தப்பட்டுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு