Nin u sheegay ChatGPT inuu doonayo in uu dilo wiilkiisa oo sideed jir ah oo boolisku gacanta ku dhigeen

DIGNIIN: Maqaalkan waxaa ku jira hadallo aad dhibsan karto.

"Waxaan u ballanqaaday lacag dhan 50,000 inuu i dilo aniga iyo wiilkayga, balse wuu diiday sababtoo ah wuxuu ahaa ilmo."

"Waxaan doonayay inaan ogaado halka ay ka timid rabitaankan ah in dad la dilo. Waan ka helaa dareenka ah inaan arko qof kale oo dhibtoonaya."

Muddo ku dhow laba bilood, beeraley u dhashay dalka Brazil ayaa farriimahan iyo kuwo kaleba la wadaagay barnaamijka garaadka macmalka ah ee ChatGPT; arrintaas oo booliisku ku tilmaameen qorshe uu ku doonayay inuu ku dilo wiilkiisa 8-jirka ah, uu ku weeraro dad kale, ka dibna uu is-dilo.

Farriimahan – oo ay heshay BBC News Brazil – ayaa ahaa kuwii sababay in ninkaas la xiro.

Mid ka mid ah kiisaska dhifka ah ee noocan ah, nin 36 jir ah ayaa la xiray ka dib markii shirkadda OpenAI—oo ahayd tii samaysay ChatGPT—ay farriimihiisa u gudbisay hay'adda FBI-da, taas oo iyaduna wargelisay mas'uuliyiinta dalka Brazil.

Qareenkiisa ayaa ku doodaya in ninku uu "hadallo aan macno lahayn" kula hadlayay barnaamijka wada-hadalka (chatbot) isla markaana uusan gelin wax dembi ah.

Kiiskan ayaa iftiiminaya caqabad sii kordhaysa oo haysata booliiska, maxkamadaha, iyo shirkadaha ku shaqeeya Garaadka Macmalka ah (AI): Maxaa dhacaya marka barnaamijyada AI-ga ee wada-hadalka ay ogaadaan khatar iman karta ka hor inta aan la gelin wax dembi ah?

'Xogta kasta oo ka helnay madasha waa la xaqiijiyay.'

Ninkan, oo magaciisa aysan BBC-du shaacin si loo ilaaliyo aqoonsiga wiilkiisa, ayaa lagu xiray deegaan miyi ah oo ka tirsan São Gabriel da Palha taariikhdu markay ahayd 19-kii Juun; saddex maalmood ka dib markii qaybta dambiyada dhanka internetka ee Wasaaradda Caddaaladda Brazil ay kiiska u gudbisay waaxda booliiska gobolka.

"Mudnaan gaar ah ayaan siinnay kiiskan sababo la xiriira halistiisa iyo iyadoo la rumeysan yahay in aabbuhu uu qorsheynayay inuu dilo wiilkiisa," ayuu yiri Brenno Andrade, oo ah madaxa saldhigga booliiska ee dambiyada internetka ee gobolka Espírito Santo.

Sida uu sheegay Andrade, ninka la tuhunsan yahay ayaa xiriir yar ama aan jirinba la lahaa wiilkiisa, marka laga reebo bixinta kharashka daryeelka ilmaha. Baarayaashu waxay aaminsan yihiin in dareenka xun ee ka dhashay lacagahaas laga yaabo inuu ka mid ahaa sababaha keenay qorshaha la tuhunsan yahay.

Intii lagu guda jiray baaritaanka hantidiisa, waxaa la helay afar dhalo oo ay ku jiraan walxo aan la aqoonsan iyo xarig siriq ah, kuwaas oo ay saraakiishu sheegeen inay muujin karaan ujeeddooyin is-dilid ah.

Booliisku waxay sidoo kale aaminsan yihiin in ninka la tuhunsan yahay uu kala hadlay ChatGPT weerarro suurtagal ah oo lagu qaado dugsiyada, kaniisadaha, iyo saraakiisha booliiska.

Farriin ka mid ah kuwa ay BBC-du aragtay ayaa oranaysay: "Haddii aan tago goobta daroogada lagu isticmaalo oo aan dilo ilaa afar dambiile, waxaan ka caan-bixi lahaa magaalada. Intaas ka dib, waxaan u baahan lahaa oo kaliya inaan dilo hal ama laba sarkaal oo booliis ah, ka dibna si nabad ah ayaan u dhiman lahaa."

Farriin kale ayaa qornayd: "Waxaan ka fekerayaa inaan iibsado hub oo aan rasaas ku furo booliiska si ay uga jawaabaan oo ay ii dilaan. Taasi waxay noqon lahayd wax aad u wanaagsan oo ii fiican."

Baarayaashu waxay sheegeen in ninku uu sameeyay baaritaan ku saabsan walxo sun ah, oo ay ku jirto sunta 'ricin', isla markaana uu isku dayay inuu hareer maro tallaabooyinka amniga ee ChatGPT isagoo beddelaya qaabka su'aalaha loo dhigayo.

Ninkan ayaa beeniyay inuu damacsanaa inuu waxyeeleeyo wiilkiisa.

Ka dib 54 maalmood oo uu xirnaa, waxaa la sii daayay Agoosto 13-keedii sababo la xiriira dib u dhac ku yimid baaritaanka. Ma jiraan wax dacwad ah oo la gudbiyay, laakiin baaritaanka booliisku wuu socdaa.

Baarayaashu waxay sheegeen inay baarayaan taleefanka gacanta ee tuhmanaha oo ay sugayaan natiijooyinka baaritaannada dambi baarista ee alaabta la qabtay si loo ogaado inuu qaaday tallaabooyin la taaban karo si uu u fuliyo qorshe kasta, oo ay ku jiraan inuu la xiriiray nin wax dilay.

Waxay sheegeen in caddayntan ay gacan ka geysan karto go'aaminta in tuhmanaha uu ka soo wareegay qorsheynta iyo diyaarinta dambiga una gudbay fulinta.

Sharciga dambiyada ee Brazil, dambi waxaa caadi ahaan loo arkaa inuu dhacay oo keliya marxaladda fulinta.

Difaacyadu waxay ku doodayaan in aan wax tallaabo ah laga qaadin arrintan.

"Haddii la hadalka AI iyo hadalka waxyaabaha nacasnimada ah ay yihiin dambi, qof walba wuxuu geli doonaa xabsi," ayuu qareenka difaaca Pedro Paulo Pessi u sheegay BBC News Brazil.

Dhibaatada caddaynta

Waxaa la rumeysan yahay in kiisaska shirkadaha AI ay ku wargeliyaan dadka isticmaala booliiska ay naadir yihiin.

Bishii Agoosto, OpenAI waxay FBI-da u gudbisay nin 25 jir ah oo Florida ah ka dib markii uu la wadaagay qorshayaashiisa kufsiga iyo dilka saaxiibtiis hore chatbot-ka, sida laga soo xigtay warbaahinta Mareykanka.

Anrade, oo ka tirsan booliiska Espírito Santo, ayaa sheegay in kiiska beeralayda uu ahaa digniintii ugu horreysay ee noocan ah oo ay soo saarto AI-u ee dawladdu heshay iyo kiiska saddexaad ee noocaas ah ee Brazil.

"Waa hab kale oo booliisku ay isku dayaan inay ogaadaan haddii dadku ay baareen dambiyo iyagoo adeegsanaya garaadka macmalka ah," ayuu yiri Andrade.

Si kastaba ha ahaatee, waxaa jira shakiyo dhowr ah oo ku saabsan doorka noocyadan digniinaha ah ee ka imanaya shirkadaha AI ay ka ciyaaraan habka baaritaanka, oo ay ku jiraan in fariimaha loo isticmaali karo caddayn maxkamadeed.

Sida laga soo xigtay cilmi-baarayaashu, OpenAI waxay bixisay faahfaahin ku saabsan isticmaalaha iyo fariimaha ay direen, laakiin ma aysan helin jawaabaha ChatGPT.

"Ma aanan helin jawaabaha la bixiyay," ayuu yiri Andrade.

Qareenka dambiyada Maíra Fernandes ayaa sheegay in tani ay abuureyso dhibaato caddaymeed sababtoo ah macnaha guud ee fariimaha ayaa muhiim ah.

"Ma noqon karto qayb yar, ma noqon karto nooc wax laga beddelay. Waa inay noqotaa wadahadalka oo dhammaystiran," ayuu yiri.

Qoraal ay u dirtay BBC News Brazil, shirkaddu way diiday inay sharaxdo sababta aan loo bixin jawaabaha ChatGPT, iyadoo si fudud u sheegtay inay ku wargelin karto hay'adaha fulinta sharciga marka ay ogaato "khatar la aamini karo oo soo socota oo waxyeello u geysan karta dhinac saddexaad."

Bishii Abriil ee sanadkan, Florida waxay furtay baaritaan dambiyeed oo ka dhan ah OpenAI si loo ogaado haddii tignoolajiyadeeda ChatGPT ay wax xiriir ah la leedahay dilkii laba qof intii lagu jiray toogasho ballaaran oo ka dhacday Jaamacadda Gobolka Florida sannadkii hore.

OpenAI waxay beeninaysaa eedeymahaas, iyadoo sheegtay in ChatGPT ay bixisay macluumaad horeyba loo heli jiray oo aan dhiirrigelin ama kor u qaadin dhaqdhaqaaqyada sharci darrada ah.