Unknown gunmen kidnap younger sister of ex-Nigeria minister of power Adelabu wit twins for Oyo

Unknown gunmen don kidnap one woman and her two children wey dey related to Nigeria former minister of Power, Bayo Adelabu, for Challenge area of Ibadan, southwest Nigeria.

Oyo State Police command confam di incident to BBC News Pidgin on 3, June and add say dia men don visit wia di kidnap happun.

Divisional police officer in charge of Challenge, Jaiyeola Marvis, say di gunmen come inside unregistered vehicle.

"We dey aware already, I just comot for di scene of di crime not quite long wit all my men, na fact say dem kidnap pesin for dia, unknown gunmen wit unregistered vehicle kidnap one lady and her two children."

One video wey dey spread online show one red car wit broken glasses while di ignition still dey on. Pipo gada round di car afta di incident don happun.

Di DPO say dem dey work to see how dem go catch di perpetrators of dis crime, as dia men go dey o patrol.

Di DPO also confam say di woman wey dem kidnap dey related to ex-minister Adelabu. and govnorship aspirant under di ruling All Progressives Congress.

Di kidnap involve two children wey also dey inside di car wit di woman wen di incident happun.

"Information wey we gada say di lady wey dem kidnap na sister to former minister of power. Dem get same parent according to information wey dey bifor me."

Adelabu confam kidnap incident, family call for help

Di family of di former minister of power, Adebayo Adelabu, confam di unfortunate kidnapping of im younger sister wey 43 years old.

Di family identify di victim as "Mrs. Olaide Busayo Adegoke John-Paul, alongside her twin sons, Peter and Paul wey dem kidnap for di early hours of Wednesday, June 3, 2026".

According to di press release by Femi Awogboro, di media aide to Adelabu, di gunmen bin attack around 7am while she dey go drop her pikin for school.

"Di abductors also forcefully take away her 12-year-old twin sons wey dey wit her at di time of di incident."

"Immediately di incident dey reported, all relevant security and law enforcement agencies dey duly contacted."

E say security operatives dey aware alreadi and dem don begin investigations, and to also rescue di victims.

"Chief Adebayo Adelabu and di entire family dey deeply distressed by dis tragic development but remain hopeful and confident for di capacity of di security agencies to secure di safe release of Mrs. John-Paul and her children."

Meanwhile, BBC News Pidgin bin report how gunmen bin attack Ogbomoso community on Friday, 15 May 2026, and kidnap primary school pupils and teachers from LA School and Community Grammar School, Ahoro-Esinele.

For di attack, di gunmen kpai one teacher, kidnap di principal, and abduct unspecified number of students.

Di Oyo State Police Command tok-tok pesin, DSP Ayanlade Olayinka, confam di incident. DSP Ayanlade for one statement say di kidnappers storm di school between 8am and 9am.

"Gunmen enta Ahoro-Esinele area, Oriire Local Govment Area, Oyo State. Dem abduct one school principal and unknown number of students," e bin tok.