Ekiti govnorship election candidates and dia promises as residents cast dia votes on Saturday

Ekiti State govnorship election go happun on Saturday, 20 June 2026 across di 16 local govment areas of di state.

Di election na between di incumbent Govnor Biodun Oyebanji of di All Progressive Congress (APC) and 11 oda candidates.

All di political parties wey dey field candidates for di election do dia primaries between October 20 and November 10 2025.

Election joinbodi for Nigeria Inec don publish provisional and final list of candidates ahead of di election.

Inec publish 12 political party candidates, but later di candidate of Allied Peoples Movement (APM) Joseph Anifowose withdraw from di race and endorse di incumbent Govnor Biodun Oyebanji.

Anoda ogbonge mata wey arise be say Inec remove di name of di candidate of di Peoples Democratic Party (PDP) Wole Oluyede sake of leadership and legal issues wey dey bubble within di party for di national level.

Ekiti get 1,059,360 registered voters. Dis number increase by 66,000 compared to di number of registered voters for di last election.

Biodun Oyebanji - APC

Biodun Abayomi Oyebanji na di candidate of di ruling All Progressive Congress APC. E come from Ikogosi Ekiti axis - dem born am for 1967.

Biodun na public administrator and politician.

E study political science for Ekiti State University and later obtain Masters Degree in Political Science from University of Ibadan.

E bin serve as Chief of Staff and also as Secretary under former govnor Kayode Fayemi administration. E don also hold oda political positions for di state govment.

For 2022, e win election as govnor under di platform of APC.

Im administration build flyover, roads, schools and plenti oda infrastructures.

E dey seek re-election for di for di forthcoming govnorship election dis week.

Oluwadare Bejide - ADC

Oluwadare Bejide na di African Democratic Congress (ADC) candidate for di forthcoming election.

Dem born am for August 1959 for Ekiti South Federal Constituency.

E attend University of Ife (now OAU) and also attend law school bifor dem call am to bar for 1985.

E later attend Obafemi Awolowo University wia e do im Masters Degree in Maritime and Aviation law.

E be Christian and e dey married wit children.

Bejide na public servant, lawyer and politician wey get ogbonge experience. E also be diplomat wey serve as Nigeria ambassador to Canada.

For im political career, e serve as Secretary to Ekiti State Govment for 2007 to 2010.

E bin don contest for some political positions in di past but e no win.

Oyebanji Olajuyin - Labour Party

Oyebanji Olajuyin emerge as di govnorship candidate of di Labour Party.

E emerge as candidate through consensus arrangement during di party primaries.

Olajuyin na medical doctor, academic and politician from Ikere Ekiti.

E be professor of ear nose and throat surgery, associate lecturer in Anatomy/ Medico-linguistic Researcher for Ekiti State University Teaching Hospital, Ado - Ekiti. E don publish 50 books and articles.

E say if im win and become govnor, e go bring integrity, competence and compassion to governance.

Oluwole Oluyede - PDP

Oluwole Oluyede na di candidate of di Peoples Democratic Party PDP for di govnorship election wey go happun for Ekiti state dis weekend.

Dem born am for June 1964 for Ado Ekiti.

Oluyede school for University of Ilorin. E do residency for Upstate University, Syracuse, New York State wey make di Canadian Medical Board to certify am.

E work as medical expert for Nigeria, Canada and Australia. Im be di Chairman/CEO of Mayokun Pty Limited for Ado Ekiti, Ekiti State.

Oluyede bin contest for govnor for 2022 under ADC. E no win dat election.

E dey married to Mrs Oluwakemi and dem get three children.