नयाँ कानुन लागु हुँदै गर्दा ट्रम्पले हटाए रुसमाथिका केही प्रतिबन्ध

अमेरिकी राष्ट्रपति डोनल्ड ट्रम्पले युक्रेनमाथि रुसले गरेको आक्रमणका कारण मस्कोमाथि दबाव बढाउन अमेरिकी कंग्रेसले हालै पारित गरेको विभिन्न प्रतिबन्ध कार्यान्वयनमा रोक लगाउन राष्ट्रपतीय अधिकार प्रयोग गरेका छन्।

शुक्रवार राति जारी कार्यकारी आदेशमा ट्रम्पले केही प्रतिबन्ध रोक्नु अमेरिकाको 'राष्ट्रिय हित' मा रहेको उल्लेख गरेका छन्। उनले गत सेप्टेम्बरमा प्रतिबन्धसम्बन्धी विधेयकमा हस्ताक्षर गर्दै त्यसलाई कानुनको रूप दिएका थिए। उक्त कानुन आइतवारदेखि लागु हुँदै थियो।

ट्रम्पले नोभेम्बरमा हुने मध्यावधि निर्वाचनअघि अमेरिकामा ऊर्जा मूल्य घटाउने प्रयासस्वरूप रुसबाट डिजेल आयात गर्ने बताएका केही दिनपछि यो घटनाक्रम विकास भएको हो। उक्त निर्वाचनले अमेरिकी कंग्रेसमा कुन दलको नियन्त्रण रहने भन्ने निर्धारण गर्ने ठानिएको छ।

ट्रम्पको योजनाले अमेरिकी सांसदहरूलाई आश्चर्यमा पारेको छ। साथै, यसले दुवै प्रमुख राजनीतिक दलका सांसदहरूबाट विरोधसमेत निम्त्याएको छ।

उक्त कानुनले रुसी अर्थतन्त्रलाई लक्षित गर्दै रुसी तेल र ग्यासका पाँच ठूला खरिदकर्ता देशमाथि शतप्रतिशतसम्म ट्यारिफ शुल्क लगाउने व्यापक अधिकार राष्ट्रपति ट्रम्पलाई दिएको थियो। ती देशमध्ये विशेषगरी चीन र भारत पर्छन्।

यसका साथै उक्त कानुनमा रुसी राष्ट्रपति भ्लादिमिर पुटिन, रुसी सरकारका वरिष्ठ अधिकारी, ब्याङ्क तथा अन्य वित्तीय संस्था र विद्यमान प्रतिबन्ध छल्न प्रयोग गरिने 'स्याडो फ्लीट' भनिने रुसी ट्याङ्करहरूमाथि प्रतिबन्ध लगाउने व्यवस्था पनि समावेश छ।

बिहीवार कंग्रेसका दुवै प्रमुख राजनीतिक दलका २० सांसदले ट्रम्पलाई नयाँ कानुन कार्यान्वयन गर्न आग्रह गर्दै पत्र लेखेका थिए।

उनीहरूले प्रतिबन्धसम्बन्धी विधेयकमा हस्ताक्षर गरेकोमा ट्रम्पलाई धन्यवाद दिँदै उक्त कानुनको "पूर्ण र इमानदारीपूर्वक कार्यान्वयन" गर्न आग्रह गरेका हुन्।

सांसदहरूले उक्त कानुनले "पुटिनलाई शान्ति वार्तालाई गम्भीरतापूर्वक लिन बाध्य पार्न निर्णायक भूमिका खेल्ने" बताएका छन्।

भर्जिनियाका कंग्रेस सदस्य डन बेयरजस्ता डेमोक्र्याटिक सांसदहरूले ट्रम्पको प्रतिबन्धसम्बन्धी पछिल्लो कदमको आलोचना गरिसकेका छन्। उनीहरूले ट्रम्पमाथि मस्कोसामु झुकेको र किएभ तथा युक्रेनी राष्ट्रपति भोलोदिमिर जेलेन्स्कीको साथ छाडेको आरोप लगाएका हुन्।

"पुटिनसमक्ष ट्रम्पको पछिल्लो आत्मसमर्पणले फेरि एकपटक हाम्रा युक्रेनी साझेदारहरूलाई धोका दिएको छ र रुसको गैरकानुनी आक्रामक युद्धलाई दण्डित गर्न बनाइएको कानुनप्रति कंग्रेसको स्पष्ट अभिप्रायको अवहेलना गरेको छ," बेयरले सामाजिक सञ्जाल एक्समा लेखेका छन्।

अक्टोबर ९ मा ट्रम्पले रुसी राष्ट्रपति भ्लादिमिर पुटिनसँग टेलिफोनमा कुराकानी भएको र रुसबाट डिजेल खरिद गर्ने सहमति भएको घोषणा गरेका थिए।

फेब्रुअरीमा इरानसँग युद्ध सुरु भएयता अमेरिकामा इन्धन, विशेषगरी डिजेलको मूल्य उल्लेख्य रूपमा बढेको छ। यसले जीवनयापनको बढ्दो खर्चका कारण पहिल्यै आर्थिक दबावमा रहेका अमेरिकी मतदातामाथि थप भार पारेको बताइन्छ। आगामी मध्यावधि निर्वाचनअघि इन्धनको मूल्य घटाउने ट्रम्पको प्रयास यसै सन्दर्भमा आएको हो।

रुसबाट डिजेल खरिद गर्ने यस सहमतिले मस्कोलाई युक्रेनविरुद्धको युद्ध सञ्चालन गर्न आर्थिक सहयोग पुग्न सक्ने भन्दै अमेरिकाका सहयोगी राष्ट्रहरूले पनि ट्रम्पको निर्णयको आलोचना गरेका छन्।

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।