आरएएफ फेयरफोर्ड घटनामा पक्राउ परेका पाँच पुरुष प्रहरी जमानतमा रिहा

आरएएफ फेयरफोर्ड नजिकै आतङ्कवादसम्बन्धी अपराध गरेको आशङ्कामा पक्राउ परेका पाँच जना पुरुषलाई प्रहरी जमानतमा रिहा गरिने भएको प्रतिआतङ्कवाद प्रहरीले जनाएको छ।

आइतवार बिहान सबेरै ग्लस्टरशरस्थित उक्त हवाई अड्डा नजिकै तीनवटा "शङ्कास्पद सवारीसाधन" देखिएको सूचना प्रहरीलाई प्राप्त भएपछि ठूलो घटना घोषणा गरिएको थियो र दर्जनौँ घर खाली गराइएको थियो।

प्रतिआतङ्कवाद प्रहरी (सीटीपी) ले अधिकारीहरूले "अनुसन्धानका विभिन्न पक्षहरू" माथि काम गरिरहेका जनाएको छ। यसमा कुनै विदेशी राष्ट्रका तर्फबाट काम गर्ने व्यक्ति वा प्रतिनिधिहरू संलग्न थिए कि थिएनन् भन्ने विषय पनि रहेको बताइएको छ।

पक्राउ परेका पाँच जना सबै लन्डनका हुन्।

उनीहरूलाई सुरुमा विस्फोटन ऐन अन्तर्गतका अपराध गरेको आशङ्कामा नियन्त्रणमा लिइएको थियो। त्यसपछि आतङ्कवादी कामको तयारी गरेको आशङ्का गरिएको थियो।

प्रतिआतङ्कवाद प्रहरीले उनीहरू अझै अनुसन्धानको दायरामा रहेको र उनीहरूको रिहाइ "आवागमन तथा अन्य व्यक्तिहरूसँगको सम्पर्कमा कडा सर्तहरू" लागू हुने जनाएको छ।

प्रहरीका अनुसार तीमध्ये तीनजना वेस्टमिन्स्टर, एकजना क्यामडेन र अर्का एकजना विल्सडेनमा बस्छन्। उनीहरूको उमेर २३ देखि २५ वर्षसम्मको रहेको छ।

मुख्य हवाई अड्डाको ठीक पूर्वतर्फ रहेको वेल्फर गाउँमा तीनवटा सेता भ्यान देखेपछि ९९९ मा फोन गरेर प्रहरीलाई खबर गरिदिने एक किसान महिलाले आफूले ती भ्यान देख्नु "भाग्य" भएको बीबीसीलाई बताइन्।

प्रतिआतङ्कवाद प्रहरी सीटीपीका प्रमुख सहायक आयुक्त लरेन्स टेलरले सोमवार दिउँसो तीनवटा "शङ्कास्पद सवारीसाधन" लाई "सैनिक स्रोतसाधनको र फरेन्सिक विज्ञहरूको सहयोगमा विस्तृत रूपमा परीक्षण गरिएको" बताएका छन्।

उनले अधिकारीहरूले घटनालाई "हरेक सम्भावित कोणबाट" अनुसन्धान गरिरहेको बताए।

यसमा "यो गतिविधि कुनै विदेशी राष्ट्रका तर्फबाट काम गर्ने प्रतिनिधि वा व्यक्तिहरूले उनीहरूलाई त्यसबारे जानकार भए पनि नभए पनि गरेको हुन सक्ने" सम्भावनासमेत विचार गरिएको उनले बताए।

प्रधानमन्त्री एन्डी बर्नमले सोमवार दिउँसो कोब्रा बैठकको अध्यक्षता गर्दै अधिकारीहरूले घटनाका सम्पूर्ण तथ्य स्थापित नगरेसम्म मानिसहरूलाई "अनुमान नगर्न" आग्रह गरे।

लन्डनस्थित इरानी दूतावासले घटनासँग इरानलाई जोड्ने "आधारहीन र दुर्भाग्यपूर्ण अनुमान" लाई "पूर्ण रूपमा अस्वीकार र कडा निन्दा" गरेको जनाएको छ। यस्तो अड्कलबाजीले "ब्रिटेनमा इरानप्रति भय र नकारात्मक धारणा फैलाउने प्रचारलाई बढावा दिनुबाहेक कुनै उद्देश्य पूरा नगर्ने" दूतावासले जनाएको छ।

दूतावासले भ्रामक तथा हानिकारक सञ्चारमाध्यमका कथनहरूको प्रतिक्रियास्वरूप देश र आफ्ना जनताको अधिकार तथा हितको रक्षा गर्न आवश्यक परे "उचित कानुनी कदम चाल्ने अधिकार सुरक्षित राखेको" जनाएको छ।

आरएएफ हवाई अड्डा दशकौँदेखि अमेरिकी वायुसेना (यूएसएएफ)ले प्रयोग गर्दै आएको छ।

हालैका महिनाहरूमा अमेरिकी बम खसाल्ने विमानहरूले उक्त हवाई अड्डाबाट मध्यपूर्वतर्फ उडान भरेका छन्। ब्रिटेनले इरानमाथि रक्षात्मक कारबाहीका लागि उक्त हवाई अड्डा प्रयोग गर्न अमेरिकाको अनुरोधलाई स्वीकृति दिएपछि यस्तो भएको हो।

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।