Caball dealain Bharraigh gu bhith air ùrachadh

Tha a' chompanaich chumachd SSEN a' sireadh cead airson toiseach a' phròiseict gus an càball-dealain fon mhuir a tha a' ceangal Bharraigh ris a' ghriod nàiseanta a leasachadh.

Bidh càball 33kv ùr air a chur sìos eadar Coileag a' Phrionnsa ann an Èireisgeigh agus Cidhe Eòlaigearraidh ann am Barraigh.

Bidh Eriskay-Barraigh 3, mar a chanar ris, a' sìneadh 9.7km tarsainn Caolas Bharraigh aig doimhneachd suas ri 13 meatair.

Tha an t-iarrtas aig SSEN gu Comhairle nan Eilean Siar a' mìneachadh gun deach an càball a th' ann an-dràsta a chur an sàs ann an 2013 agus gu bheil "taobh a-muigh dheth ann an droch staid".

Bidh an càball ùr a' ruith ri taobh an fhir sin mar as fheàrr le SSEN gus am bi dà chuairt dealain ann a bheireadh barrachd seasmhachd don t-seirbheis ann am Barraigh, tha iad ag ràdh.

Tha an càball a' dol tro trì làraichean le dìon glèidhteachas Eòrpach agus tha an t-iarrtas dealbhachaidh ag aithneachadh gum faod am pròiseact buaidh a thoirt air mucan-mara, cearbanan, ròin agus biastan-dubha.

Ge-tà, 's e an dragh as motha a thaobh àrainn na tha de bhilearaich-mhara air slighe a' chàbaill.

Tha SSEN a' moladh an càball a chur air grunnd na mara seach trainnse a chladhach far a bheil an lus a' fàs airson a dhìon.

Tha a' chompanaidh chumhachd ag iarraidh an obair a dhèanamh eadar toiseach an Iuchair agus toiseach na Sultaine.

Tha iad ag aithneachadh gum biodh e na b' fhearr seusan àlachaidh nan eun a sheachnadh, ach 's e an argamaid shònraichte aca gum biodh e a chùm maith a' phobaill an dealan a chumail ri Barraigh.