Innealan cobhair èiginnich air fàire aig comann taigheadais an Inbhir Nis

Stèidhichidh Comann Taigheadais an Nationwide inneal defibrillator agus uidheamachd chobhair fala aig a' mheur aca ann an Inbhir Nis.

Tha a' chompanaidh am beachd an uidheamachd a chur an sàs aig roghainn de mheuran aca feadh na dùthcha.

Bidh innealan defibrillator gan cleachdadh airson cobhair èiginneach a dhèanamh air daoine a tha a' gabhail grèim cridhe, agus cleachdar uidheamachd chobhair fala airson daoine a tha a' call fala a shàbhaladh an dèidh leithid ionnsaigh sgeine.

Chuir iad a dh'iarraidh cead bho Chomhairle na Gàidhealtachd airson a' phlana, 's na h-uidheaman ri an stèidheachadh ann am preasan sònraichte.

"Tha Comann Taigheadais Nationwide fo ghealltanas taic a thoirt do na coimhearsnachdan a bhios iad a' frithealadh, le meuran air an suidheachadh aig cridhe àrd-shràidean air feadh na RA," thuirt iad ann am brath.

"Mar phàirt den ghealltanas seo a bhith a' cur ri maith na coimhearsnachd, tha iad am beachd uidheamachd sàbhalaidh bheatha a stèidheachadh ann an cuid de na meuran aca airson dèanamh cinnteach gum bi cothrom aig daoine air cobhair èiginneach a là 's a dh'oidhche ge b' e càite a bheil feum air a leithid."