Toirbheartan air ainmeachadh mar Thèarmann Nàdair Nàiseanta

Chaidh Toirbheartan ainmeachadh mar an Tèarmann Nàdair Nàiseanta às ùire ann an Alba.

Tha NàdarAlba air gabhail ri iarrtas bho Urras Nàiseanta na h-Alba mu 12,602 acair a chomharrachadh fon bhrataich seo.

Tha an tèarmann a' dol bho bhruaichean Loch Thoirbheartain gu mullach Beinn Àiligin agus An Liathach.

Ri thaobh, tha Tèarmann Nàdair Nàiseanta Beinn Eighe - a' chiad sgìre san Rìoghachd Aonaichte air an deach an inbhe a bhuileachadh ann an 1951.

Tha an sgìre na h-àite-còmhnaidh do dh'iomadach rud bho phlanntaichean annasach gu eòin leithid an iolaire-bhuidhe.

Tha i a' tarraing àireamhan mòra de luchd-turais gach bliadhna agus i ainmeil airson sreap agus coiseachd.

Tha Toirbheartan air a bhith an urra ri Urras Nàiseanta na h-Alba bho dheireadh na 1960an agus tha amasan aca san ùine-fhada gus nàdar a bhrosnachadh san sgìre, ann an com-pàirteachas le coimhearsnachdan ionadail agus uachdarain.

Thuirt Àrd-oifigear an urrais, Phillip Long OBE: "Mar bhuidhean, tha sinne ag amas air nàdar, bòichead agus dualchas na h-Alba a shealltainn dhan a h-uile duine.

"Leis gur e Tèarmann Nàdair Nàiseanta a th' ann an Toirbheartan a-nis, tha mi an dòchas gum brosnaich seo daoine gus a dhol ga fhaicinn agus gun ionnsaich iad mun obair ghlèidheachtais a tha ga dhèanamh airson a dhìon san àm ri teachd."

A rèir NàdarAlba, tha e deatamach nàdar a dhìon gus targaidean na dùthacha a thaobh bith-iomadachd a choileanadh.

Tha Alba ag amas air stad a chur air crìonadh ann am bith-iomadachd ro 2030 agus gum bi nàdar air slànachadh ro 2045.

Thuirt Àrd-oifigear na buidhne, Nick Halfhide: "Tha Toirbheartan na dheagh eiseimpleir air mar a ghabhas pìosan talmhainn a cheangal ri chèile gus nàdar a bhrosnachadh agus mar as urrainn do dh'uachdarain, buidhnean cathrannais agus coimhearsnachdan obrachadh còmhla a dh'ionnsaigh an aon amais."

'S e Toirbheartan a' chiad sgìre a th' air a bhith air a comharrachadh mar Thèarmann Nàdair Nàiseanta an Alba bho 2017 - nuair a chaidh Glean Comhann agus Oighreachd Loidse Mar ainmeachadh mar an leithid.