Na còisirean: "Co-chomann, co-cheòl is co-eisimealachd"

Cha mhòr nach eil am Mòd Nàiseanta Rìoghail seachad ach do gu leòr 's e Dihaoine an là ris a bheil iad air a bhith a' feitheamh agus farpaisean nan còisirean sgìreil a' tachairt.

"Tha e cho làidir a bhith seinn còmhla agus guthan a chluinntinn mar aon," thuirt Màiri Anna NicUalraig, stiùiriche Còisir Ghàidhlig Loch Abar a thog Cuach Cuimhneachan Mairead NicDhonnchaidh an-uiridh.

Tha i sin agus Sgiath MhicShimidh is Thulaich Bhàrdainn, a chaidh gu Ceòlraidh Ghàidhlig Ghlaschu an-uiridh, air na duaisean as cliùitiche ann an saoghal nan còisirean Gàidhlig, agus bidh na ceudan sheinneadairean air an àrd-ùrlar ag amas orra an-diugh.

Tha coimhearsnachd còisire mar "shamhla air mac an duine" am beachd Màiri Anna.

"Tha co-chomann, co-cheòl agus co-eisimealachd ann," thuirt i, a tha a' cur nar cuimhne "nach eil sinn beò nar n-aonar, agus mar a tha feum againn air càch a chèile."

Thuirt i: "Tha còisir coltach ri teaghlach, agus chan e rud ro mhilis tha mi a' ciallachadh.

"Tha gràdh agad ach bidh iad a' cur cais ort cuideachd san aon dòigh!"

Ged a tha Màiri Anna air a dachaigh a dhèanamh an Loch Abar, tha i an t-seachdain seo air ais am Baile Mòr nan Gàidheal far an do thogadh i.

'S i tè a bha thall agus a chunnaic nuair a thig e dhan Mhòd agus gu saoghal nan còisirean.

Tha i air Bonn Òir a' Chomuinn agus Bonn Òir an t-Seann Nòis a bhuannachadh agus bha i bliadhnaichean os cionn Còisir Ghàidhlig Inbhir Nis a thog Sgiath MhicShimidh is Thulaich Bhàrdainn ann an 2005 agus 2006.

Thuirt i gun do thòisich obair ullachaidh nan Abrach an dèidh soirbheachas na bliadhna an-uiridh aig Mòd Loch Abar "cha mhòr sa mhionaid".

Cha b' e annas a bh' ann do shinnsearan Ghàidheal an là an-diugh an guthan a thogail còmhla, na fir agus iad ag iomradh agus na mnathan ri obair luaidh, mar eisimpleir.

Cha robh còisirean Gàidhlig mar a th' againn an-diugh mar phàirt den dualchas air a' Ghàidhealtachd bho thùs ge-tà.

'S e farpaisean a' Chomuinn Ghàidhealaich a dh'fhàg gu bheil an-diugh bun-stèidh cho làidir aig na còisirean.

Ged a bha beagan chòisirean Gàidhlig ann ron chiad Mhòd ann an 1892, tha Màiri Anna a' gabhail ris gun robh cuid a' faicinn an t-seòrsa seinn seo mar rud "fuadain" aig fìor thoiseach gnothaich.

Bha deasbad às ùr ann an-uiridh nuair a dh'iarr an Comunn beachd nan còisirean air sreath mholaidhean a bheireadh crathadh air cruth nam farpaisean agus airson siostam measaidh ùr a thaobh fileantas bhall.

Dh'fhoillsich An Comunn Gàidhealach aig toiseach na mìos nach tig atharrachadh air structar nam farpaisean no air feumalachdan a thaobh na Gàidhlig aig an ìre seo.

Aig an àm, thuirt Cathraiche a' Chomuinn, Magaidh Choineagan, gun dèanadh iad tuilleadh obrach mu "dè an dòigh às fheàrr a' Ghàidhlig a bhrosnachadh, agus aig an aon àm daoine a mhisneachadh airson a bhith a' gabhail barrachd ùidh ann an Gàidhlig.

Tha Màiri Anna ag ràdh gu bheil "còmhradh gu tur iomchaidh a thaobh brosnachadh na Gàidhlig", ach gum feumar slighe ùr a dhealbh ann an dòigh a tha "càirdeil, brosnachail agus amasail".

Bha deasbad cuideachd ann mu bhith a' toirt a-steach stoidhlichean ùra de sheinn, fiù 's dannsa, agus cha bhiodh càil a leisg air Màiri Anna seo a chur fa chomhair luchd-frithealaidh a' Mhòid.

Thuirt i: "Seasaidh a' Ghàidhlig ri nòs sam bith, carson nach dèanadh!"

Tha i ag ràdh gu bheil i fhèin "an-còmhnaidh a' putadh crìochan a' chiùil agus a' feuchainn ri beagan spors fhaighinn".

Leis an sin, cò aig a tha brath na bhios fainear don luchd-èisteachd is luchd-amhairc san àm ri teachd ach 's ann sa chruth 'thraidiseanta' a bhios farpaisean na bliadhna-sa.

Mura faigh sibh air a bhith an làthair bidh iad rin craoladh beò air BBC Radio nan Gàidheal agus air BBC ALBA.