Transocean Winner "an sgeulachd a b' fheàrr a rinn mi a-riamh"

Air madainn an 8mh den Lùnastal 2016 bha Aonghas Dòmnallach fhathast na chadal san Rubha faisg air Steòrnabhagh nuair a dh'fhalbh am fòn aige.

Chaidh innse dha mu rud a thachair a bha duilich dha a chreidsinn.

Thuirt seann fhear-naidheachd a' BhBC: "Chuala mi gun robh clàr-ola air a thighinn air tìr air an taobh siar ann an Càrlabhagh an cladach Dail Mòr!"

Rinn Aonghas air an tràigh le cabhaig far an d' fhuair e a' chiad sealladh den ìomhaigh iongantach - structar mòr stàillin le crann àrd a' fiaradh air na creagan.

Tha 10 bliadhna ann bhon bha bàta-slaodaidh a' toirt an Transocean Winner eadar Nirribhidh agus Malta a-muigh sa Chuan Siar nuair a thàinig gèile.

Bhris an clàr-ola air falbh bhon bhàta-slaodaidh air an oidhche, mus deach e air tìr tràth sa mhadainn ann an Dail Mòr an sgìre Chàrlabhaigh.

Cha robh duine air bòrd ach bha 280 liotar de dhìosal.

'S beag fios a bh' aig Aonghas Dòmhnallach a' chiad mhadainn ud gum biodh e an sàs san sgeulachd airson cha mhòr dà mhìos "a' faicinn dè an t-adhartas a bha iad a' dèanamh airson a toirt air falbh".

Rinn Aonghas 13 aithrisean air a' chiad là, agus ùidh mhòr aig buidhnean naidheachd san sgeulachd gu nàiseanta agus gu h-eadar-nàiseanta.

Thuirt e: "'S e sgeulachd mhòr a bh' ann gu h-ionadail cuideachd airson an toiseach bha eagal ann gum biodh truailleadh an cois a' chlàir, gun dèanadh i tòrr call, ach cha b' e sin a thachair idir.

"'S e sgeulachd mhath a bh' ann, sgeulachd inntinneach, chan fhàsadh tu sgìth dheth ged a bhiodh tu ag obair air fhathast!"

Thàinig daoine cruinn ann an Càrlabhagh Dimàirt a chluinntinn mar a tha Aonghas a' cuimhneachadh air an sgeulachd 10 bliadhna on thàinig an Transocean Winner air tìr.

An làthair bha Aonghas MacAsgaill à Carlabhagh aig a bheil cuimhne mhath air a' mhadainn a chuala e an naidheachd.

"Dh'innis mi dhan dà nighean agam agus dh'fhalbh sin sìos ach chan fhaigheadh sin a-steach an rathad, bha na poilis ann.

"Chaidh sinn tarsainn na mòintich agus chunnaic sinn a' bhiast rud a bha seo air a' chladach.

Thuirt e: "Abair thusa gun robh tòrr a' tachairt ann an Càrlabhagh anns na seachdainean agus na mìosan às dèidh sin!"

Tha Aonghas Dòmhnallach a' smaoineachadh "gu bheil e a' ciallachadh tòrr dhaibh gu bheil iad a' coimhead gur e rud a bh' ann a tharraing an àite ri chèile".

Tha e na adhabhar toileachais dha gun robh na h-eòlaichean a bha an sàs sa ghnothach a' moladh cho cuideachail agus a bha a' choimhearsnachd dhaibh.

"Choisinn sin cliù mìorbhaileach dhan choimhearsnachd seo," thuirt e.

Cha b' e sin an aon bhuannachd a bh' ann an cois a' ghnothaich.

Fhuair a' choimhearsnachd maoineachadh bhon chompanaidh aig an robh an Transocean Winner, agus fhuair gnothachasan ionadail - eadar luchd-einnseinìridh, taighean-aoigheachd agus daoine le bàtaichean - buannachd às.

Bha Aonghas na fhear-naidheachd airson còrr is 40 bliadhna agus tha e ag ràdh "gun cheist sam bith 's e seo an sgeulachd a b' fheàrr a bh' ann".

Mhìnich e: "Tha mise air an t-uabhas sgeulachd a dhèanamh mu dheidhinn nan eilean agus tha feadhainn ann agus tha e air a bhith bochd leam gun robh agam ri an dèanamh airson bha e a' cur fìor dhroch choltas air an àite às an robh mi fhèin.

"'S e sgeulachd mhath a bh' ann agus 's e sgeulachd a bh' ann nach do dh'fhàg droch dhìleab sam bith às a dèidh."