Umucamanza wo mu Bwongereza yategetse ushinjwa jenoside yo mu Rwanda kuriha £100,000 y'ingwate kugira ngo arekurwe by'agateganyo

Umugabo ushinjwa ibyaha bijyanye na jenoside yabaye mu Rwanda mu mwaka wa 1994 azakomeza gufungwa keretse arishye urukiko ingwate y'amapawundi 100,000 (angana na miliyoni 195 uyavunje mu mafaranga y'u Rwanda).

Dr Vincent Brown, wahoze ari Dr Vincent Bajinya, w'imyaka 65, ashinjwa kuba yari "umuyobozi" cyangwa "umugenzuzi" w'ibikorwa by'urugomo byakozwe n'abandi, ndetse ni we muntu wa mbere mu Bwongereza urezwe ibyaha bijyanye na jenoside.

Ku wa mbere, mu rukiko rwa Old Bailey mu murwa mukuru London, umucamanza Mark Lucraft KC yemeye irekurwa ry'agateganyo ririmo ibisabwa bikaze cyane kurusha mu iburanisha ryabanje, harimo ingwate yiyongereye ndetse no gushyirwaho igikoresho cy'ikoranabuhanga rya 'elegitoronike' cyo kugenzura aho uregwa aherereye.

Brown ashinjwa "kwica, kuyobora cyangwa gushishikariza" impfu z'Abatutsi mu Rwanda. Ahakana avuga ko nta cyaha yakoze.

Abantu batatu bo mu nzu imwe bivugwa ko bishwe, hamwe n'umushoferi wa taxi, umugore n'umuhungu we wari ukiri urubyiruko, hagati y'itariki ya 6 n'iya 13 Mata (4) mu mwaka wa 1994.

Abo bavugwa ko bishwe ni Dominique Mukurarinda, Immaculée Mukankusi, Gerasi Rurangirwa, Léandre Mbogoye, Charlotte Kamaguja na Olivier Tuyishime.

Brown, utuye mu gace ka Islington, mu majyaruguru ya London, yarezwe nyuma y'iperereza kuri ubwo bwicanyi ryakozwe n'Ubwongereza ryamaze imyaka irindwi.

Abatutsi hamwe n'Abahutu bashyiraga mu gaciro muri politike bose hamwe bigereranywa ko bagera ku 800,000 bishwe n'Abahutu b'abahezanguni mu gihe cy'iminsi 100 muri jenoside yabaye mu Rwanda mu 1994.

Ku wa gatatu, umucamanza yashyizeho ingwate y'amapawundi 100,000 nk'igisabwa kugira ngo Brown arekurwe by'agateganyo. Yariyongereye ugereranyije n'ingwate y'amapawundi 25,000 (angana na miliyoni 48 FRW) yari yashyizweho mbere n'abacamanza.

Brown yanategetswe gutanga urwandiko rwe rw'inzira (pasiporo) n'indangamuntu zose afite, kudasaba ibyangombwa byo gukora ingendo zijya mu mahanga ndetse yabwiwe ko agomba gukurikiza umukwabu wo kuba no kurara iwe i London.

Azajya anagenzurwa binyuze ku gikoresho cy'ikoranabuhanga rya 'elegitoronike' ndetse agomba kujya yitaba polisi buri munsi.

Umucamanza Lucraft yavuze ko igihe cyose iyo ngwate y'amapawundi 100,000 izaba itaratangwa, uregwa azakomeza gufungwa.

Brown ni umuganga wabyigiye watangiye gukora uwo mwuga mu Rwanda mu myaka ya 1980. Nyuma yaje kuba umukuru w'ishami ry'ubuzima bw'umuryango ry'icyo gihugu i Kigali ndetse yari atuye mu nkengero ya Kigali hamwe n'umugore we n'umuhungu wabo wari ukiri urubyiruko.

Mu mwaka wa 2006 yakoze muri Praxis, ikigo cy'ubugiraneza gifasha impunzi ziva ahantu hanyuranye harimo n'u Rwanda.

Yanakoze mu kigo cyo mu Bwongereza cyitwa 'Refugee Nurses Task Force' cyashinzwe mu 2003, cyagiraga inama leta y'Ubwongereza ku bijyanye n'impunzi n'abasaba ubuhungiro.

Brown yitezwe kwitaba mu rukiko rwa Old Bailey ku itariki ya 9 Ukwakira (10) uyu mwaka.

Amaperereza arakomeje ku bindi byaha bya jenoside ashinjwa gukorera mu Rwanda.