Киевга Россиянинг кенг кўламли ракета ва дрон ҳужумлари: камида 13 киши ҳалок бўлди

Расмийлар маълум қилишича, Россия кучлари тун давомида Украина пойтахти Киевга кенг кўламли дрон ва ракета ҳужуми уюштириб, камида 13 кишининг ҳаётига зомин бўлган.

Шаҳарнинг турли ҳудудларидаги биноларга зарбалар берилгани ортидан бир нечта маҳаллалар эвакуация қилинди. Бу ҳужум Украина президенти Владимир Зеленский Россия "улкан миқёсдаги" зарбага тайёрланаётганини маълум қилганидан бир неча соат ўтгач содир бўлди.

Киев шаҳар ҳарбий маъмурияти раҳбари Тимур Ткаченко қурбонлар сони анча кўп эканини, улар орасида болалар ҳам борлигини билдирди.

У пайшанба тонгида шундай деди: "Душман яна бир бор атайлаб турар жой ҳудудларини нишонга олиб, тинч аҳолини ўлдирмоқда".

Россия Мудофаа вазирлиги эса сўнгги пайтларда Украина томонидан амалга оширилган ҳужумларга жавоб тариқасида энергетика объектлари нишонга олинганини маълум қилди.

Россия Мудофаа вазирлиги эса сўнгги пайтларда Украина томонидан амалга оширилган ҳужумларга жавоб тариқасида энергетика объектлари нишонга олинганини маълум қилди.

Украина Ҳаво кучлари маълумотига кўра, Россия бир кечада 74 та ракета ва 496 та дрон учирган бўлиб, уларнинг асосий қисми Киевни нишонга олган.

Мамлакатнинг ҳаво мудофаа тизимлари бу ҳужумларнинг аксариятини қайтаришга муваффақ бўлган бўлса-да, 25 та баллистик ракета ва 12 та дрон 33 та объектга зарба берган.

Би-Би-Си мухбирлари Киевда тун давомида кучли портлаш овозларини эшитишган. Маҳаллий вақт билан соат 03:30 га келиб камида 10 та йирик зарба қайд этилган. Шаҳар марказида катта ёнғин кузатилган, узоқда эса яна бир нечта ёнғинлар содир бўлган.

Ҳаво мудофаа тизимларининг трассер ўқлари осмонни ёритиб турган, шундан кейин кетма-кет портлашлар эшитилган.

Пайшанба куни тонг отиши билан портлашлар натижасида ҳосил бўлган катта чуқурларни кўриш мумкин бўлган.

Шунингдек, ёнган автомобиллар, бинолар ва инфратузилма объектлари ҳамда вайроналар кўзга ташланган.

Шаҳарнинг турли ҳудудларида ёнғинлар юзага келган. Тез тиббий ёрдам станцияларидан бири ҳам зарар кўргани маълум қилинди. Бу ерда камида бир киши оғир жароҳат олган.

Ёнғин ўчирувчилар шаҳар марказидаги катта кўча бўйлаб жойлашган меҳмонхонани қамраб олган ёнғинни ҳам бартараф этиш билан шуғулланган.

Украинанинг Давлат фавқулодда вазиятлар хизмати маълумотига кўра, ҳозиргача 13 киши ҳалок бўлган, қарийб 90 киши эса жароҳатланган.

Киев мэри Виталий Кличко Telegram орқали эълон қилган видеомурожаатида бу пойтахтга қарши уюштирилган энг йирик ҳужумлардан бири бўлганини таъкидлади ҳамда жума кунини мотам куни деб эълон қилди.

Унинг сўзларига кўра, қутқарув ишлари ҳали ҳам давом этмоқда. Хусусан, Киевнинг жануби-шарқий қисмида жойлашган кўп қаватли турар жой биносининг бир қисми портлаш натижасида вайрон бўлган. Қутқарувчилар вайроналар орасидан 15 ёшли қиз ва унинг оила аъзоларини қидирмоқда.

Кличконинг айтишича, тез тиббий ёрдам станцияларидан бири ҳам ҳужумга учраган. Натижада станциянинг олти нафар ходими жароҳатланган ва тўққизта тез ёрдам автомобили шикастланган.

Зеленский Telegram орқали эълон қилган мурожаатида АҚШни Patriot ҳаво мудофаа ракеталарини Украинада ишлаб чиқариш учун лицензия беришга чақирди. У бу таъминотларни "мутлақо муҳим ва устувор вазифа" деб атади.

Бундан аввал ташқи ишлар вазири Андрей Сибига Украина ҳамкорларини мамлакатга қўшимча ҳаво мудофаа тизимларини етказиб беришга чақирган эди.

Унинг таъкидлашича, Украинага фақат қораловчи баёнотлар эмас, балки Россия террорини тўхтатиш учун аниқ амалий чоралар керак.

Сибига "X" ижтимоий тармоғида Россия турар жой бинолари ва фуқаролик инфратузилмасини нишонга олганини таъкидлаб, ҳамкор давлатларни Россияга қарши санкцияларни янада кучайтиришга чақирди.

Украинанинг АҚШдаги элчиси Олга Стефанишина ҳам "X" тармоғида шундай ёзди: "Шаҳар аҳолиси учун яна бир даҳшатли тун бўлди. Улар тунни бошпаналарда ўтказишга мажбур бўлишди."

У бир нечта туманларда фуқаролик инфратузилмаси ва турар жой бинолари вайрон бўлгани ҳамда ёнғинлар чиққанини қайд этди.

Россия Мудофаа вазирлиги эса ўз қўшинлари муҳим ҳарбий корхоналарни, жумладан ёқилғи ва энергетика объектларини нишонга олганини билдирди.

Вазирлик баёнотига кўра, бу Украина томонидан Россия ҳудудидаги фуқаролик инфратузилмасига қарши уюштирилган "террорчи ҳужумлар"га жавоб сифатида амалга оширилган.

Сибига эса Россиянинг Украинага берган зарбаларини Украина томонининг узоқ масофали ҳужумларига жавоб сифатида оқлашни "ахлоқсизлик" деб атади.

Бу Россиянинг икки ҳафтадан ортиқ вақт ичида Украинага қарши амалга оширган биринчи йирик ракета ва дрон ҳужуми ҳисобланади.

Россия Мудофаа вазирлиги, шунингдек, мамлакатнинг марказий ва шарқий қисмларидаги ҳарбий базаларга ҳам зарбалар берилганини маълум қилди. Бу ҳақда Россия оммавий ахборот воситалари хабар берди.

Вазирлик сўнгги пайтларда Москвадан тортиб Қора денгизгача бўлган ҳудудлардаги электр станцияларига қилинган ҳужумларга жавоб тариқасида Украина мудофаа ва энергетика инфратузилмаларини нишонга олганини таъкидлади.

Ушбу ҳужумлар Россия президенти Владимир Путинни мамлакат ёқилғи тақчиллигига дуч келаётганини тан олишга мажбур қилгани ҳам таъкидланмоқда.

Чоршанба куни Зеленский Дублинга ташрифини қисқартирди. Унинг айтишича, янги разведка маълумотлари Москва Украинага қарши янги зарба тайёрлаётганини кўрсатган.

У шундай деди: "Фуқароларимизни ўзларини, фарзандларини ва албатта оилаларини эҳтиёт қилишга чақираман."

Зеленскийнинг қўшимча қилишича, Россия президенти Владимир Путин Украинага қарши ушбу улкан ҳужумни анча вақтдан буён тайёрлаб келган.

Яқинда Россия қўшинлари шарқдаги Украина учун муҳим таянч нуқталардан бири ҳисобланган Костянтиновка шаҳрига кириб борди. Агар Москва ушбу шаҳар устидан назорат ўрнатса, бу бутун Донбасс минтақасига йўл очиши мумкин.

Айни пайтда Украина қўмондонлари бу йил йўқотган ҳудудларидан кўра кўпроқ ерларни қайтариб олганликларини ва Россия билан ишғол қилинган Қрим ўртасидаги муҳим таъминот йўлларига зарба берганликларини маълум қилмоқда.

Бироқ қуруқликдаги жанглар бир неча ойдан буён деярли ҳаракатсиз ҳолатда қолмоқда. Ҳар икки томон қўшинлари асосан ўз мавқеларида мустаҳкамланиб олган.

Ҳозирда Россия Украина ҳудудининг тахминан бешдан бир қисмини назорат қилмоқда. Бу ҳудудларнинг катта қисми Россиянинг 2022 йил феврал ойида бошланган кенг кўламли босқинининг дастлабки ойларида эгаллаб олинган.