ብሌተና ጀነራል ጻድቃን ዝምራሕ ቤት ምኽሪ ድሕሪ ደጊም 'ብዝተመስረተሉ መሓውር' ከም ዘይቕጽል ኣፍሊጡ

ብሌ/ጀነራል ጻድቃን ገብረትንሳኤ ዝምራሕን ኣብ ክልል ትግራይ መስርሕ ምስግጋር ንምጥጣሕ ክነጥፍ ዝጸንሐ "ቤት ምኽሪ ሰላምን ለውጥን ትግራይ" ድሕሪ ደጊም "ብዝተመስረተሉ መሓውር ከም ዘይቕጽል" ኣፍሊጡ።

ኣተሓባባሪ ሚድያን ርክብ ህዝብን እቲ ቤት ምኽሪ ኣይተ ከበደ ኣሰፋ፡ እዚ ስጕምቲ እዚ ዝውሰድ ዘሎ፡ ኣብታ ክልል ዝካየድ ዘሎ መስርሕ ምስግጋር መንግስቲ ፈደራል ባዕሉ ክሕዞ ስለ ዝወሰነ ምዃኑ ንቢቢሲ ገሊጹ።

ትማሊ ዓርቢ 16 ጥቅምቲ 2026 ኣብ ዘውጽኦ መግለጺ፡ ኣብዚ ሕጂ እዋን ኣብ ክልል ትግራይ ዝረአ ዘሎ "ፖለቲካውን ወተሃደራውን ዓወት" ንኽረጋገጽ እጃሙ ከም ዘበርከተ ኣመልኪቱ።

ቤት ምኽሪ ሰላምን ለውጥን ትግራይ ኣብ ግንቦት 2025 እዩ ተመስሪቱ። ካብ ህዝባዊ ወያነ ሓርነት ትግራይ (ህወሓት) ዝተፈለዩ ፖለቲከኛታትን ከምኡ'ውን ፖለቲካዊ ውድባት ትግራይ ዝሓቘፈ'ዩ።

ካብቶም ነቲ ቤት ምኽሪ ዘቘሙ ሸሞንተ ፖለቲካዊ ውድባት፡ ብኣማኻሪ ቀዳማይ ምኒስተር ኣብይ ኣሕመድ ኣብ ጉዳያት ምብራቕ ኣፍሪቃ ኣይተ ጌታቸው ረዳ ዝምራሕ ሰልፊ ደሞክራስያዊ ኪዳን ንትግራይ (ስምረት) ይርከቦም።

ካብ ህወሓት ብዝተፈለዩ መራሕቲ ዝተመስረተት ውድብ ወለዶ ትግራይ ከምኡ እውን ዓረና ትግራይ ንደሞክራስን ልዑላውነትን ውድብ ትንሳኤ ሰብዓ እንደርታን እውን ካልኦት ኣባላት እቲ ቤት ምኽሪ እዮም።

ብዘይካ ፖለቲካዊ ውድባት፡ "ልዕሊ ደርዘን ዝዀኑ ስቪላዊ ማሕበራት፡ ኣካላት ሚድያን ንውዕል ሰላም ፕሪቶርያ ዝተደራደሩ ውልቀሰባትን" እውን ኣባላት እቲ ቤት ምኽሪ ከም ዝነበሩ እቲ መግለጺ ይሕብር።

ኣብ ትሕቲ እቲ ቤት ምኽሪ ዝቘማ ኮሚቴታት ድማ ብሌተና ጀነራል ጻድቃን ገብረትንሳኤ ክምርሓ ጸኒሐን።

ቤት ምኽሪ ምኒስትራት ኢትዮጵያ፡ ንኽልል ትግራይ ንዝቕጽል ሽዱሽተ ኣዋርሕ ብላዕለዋይነት ዘመሓድር ፈደራላዊ 'ሞግዚት ምምሕዳር' ከም ዘቘመ ምፍላጡ ስዒቡ ድሕሪ ሰዓታት ድማ እቲ ቤት ምኽሪ ከም ዘይቕጽል ኣፍሊጡ።

ቤት ምኽሪ ሰላምን ለውጥን ሎሚ ኣብ ዘውጽኦ መግለጺ "ብዝተዋደደ ጻዕሪ፡ ገበነኛታት ፖለቲካውን ወተሃደራውን ሓይልታት ካብ ስልጣን ከም ዝተኣልዩ፡" ብምጥቃስ ሞግዚት ምምሕዳር ብፈደራላዊ መንግስቲ ከም ዝተሰመየ ኣመልኪቱ።

እቲ ቤት ምኽሪ፡ "ኣብ ትግራይ ፖለቲካዊ ስልጣን ክቈጻጸር ዝጸንሐ ገበነኛ ጕጅለ ንምቅላዕ እጃሙ ኣበርኪቱ'ዩ፤ ሕጂ ተረኺቡ ዘሎ ፖለቲካውን ወተሃደራውን ዓወት ንምርግጋጽ እጃምና ኣበርኪትና ኢና፡" ኢሉ።

ኣተሓባባሪ ሚድያን ርክብ ህዝብን እቲ ቤት ምኽሪ ኣይተ ከበደ፡ "መንግስቲ ፈደራል ዕማም ሰላምን ምርግጋእን ክወስድ ግዝያዊ ምምሕዳር ብምቛሙ፡ ምቕጻል ናይቲ ቤት ምኽሪ ኣድላዪ ኣይኰነን፡" ኢሉ።

"ኣብቲ ዞባ ሰላም፡ ምርግጋእን እዋን ምስግጋር ክዕወትን ብፍሉይን ዝተወደበን ኣገባብ፡" ከም ዝድግፍ እውን ገሊጹ።

ኣባላት ውድባት እቲ ቤት ምኽሪ፡ "ብመሰረት ሕጊ እታ ሃገር፡ ደው ዝብልሉ ዕላማን ናይ ገዛእ ርእሶም ኣገባብን ተጠቒሞም፡ ብናቶም መንገዲ ስርሖም ክቕጽሉ እዮም፡" ክብል ኣብሪሁ።

ኣብ ኢትዮጵያ፡ ብ23 መስከረም፡ ኣብ መንጎ ሰራዊት መንግስትን ዕጡቓት ሓይልታትን ኣብ መዳውብቲ ክልላት ትግራይ፡ ኣምሓራን ዓፋርን ዝጀመረ ውግኣት ሳልሳይ ሰሙኑ ገይሩ ኣሎ።

ኣብዚ ሕጂ እዋን ሰራዊት ፈደራ፡ ንመቐለ ሓዊሱ ብዙሓት ዓበይቲ ከተማታት እቲ ክልል ተቘጻጺሩ ይርከብ።

ብህወሓት ዝምራሕ መንግስቲ ትግራይ ካብ መቐለ ከም ዝወጽአን ዕጥቃዊ ቃልሲ 'ካብ ካልእ' ከባቢታት ክቕጽል ምዃኑን ኣፍሊጡ እዩ።

እዚ ከምዚ ኢሉ እንከሎ፡ ትማሊ ዓርቢ 16 ጥቅምቲ 2026፡ ቤት ምኽሪ ምኒስትራት ኢትዮጵያ፡ ንኽልል ትግራይ ንዝቕጽል ሽዱሽተ ኣዋርሕ ብላዕለዋይነት ዘመሓድር ፈደራላዊ 'ሞግዚት ምምሕዳር' ከም ዘቘመ ኣፍሊጡ።

እዚ ስጕምቲ፡ ኣብቲ ክልል ጸጥታን ምርግጋእን ንምፍጣርን ንቐጻሊ መረጻ ባይታ ንምጥጣሕን ዝዓለመ ምዃኑ መንግስቲ ገሊጹ።

ኣብዚ ዝሓለፈ ሽዱሽተ ዓመታት፡ ካብቲ ኣብ 2020 ዝተኻየደ ኣካታዒ መረጻ ጀሚሩ፡ ብመሰጋገሪ መንግስትታትን ብስምምዕ ፕሪቶርያ ዝቘሙ ግዝያዊ ምምሕዳራትን ኣቢሉ፡ እቲ ክልል ብሽዱሽተ ዝተፈላለዩ ምምሕዳራት እኳ እንተ ተመሓደረ፡ ከም ቍጽጽር ጸጥታ፡ ምምላስ ተመዛበልትን ሕጋውነት ስልጣንን ዝኣመሰሉ መሰረታውያን ሕቶታት ብዘይምፍታሖም፡ ነቲ ውዕል ሰላም ኣፍሪሱ ነቲ ክልል ዳግማይ ናብ ኣዕናዊ ኲናት ደሪኽዎ ኣሎ።