மகளிர் டி20 உலகக்கோப்பை: இந்திய அணி அரையிறுதிக்கு செல்வது ஏன் எளிதானது இல்லை?

ஐசிசி மகளிர் டி20 உலகக்கோப்பைத் தொடரில், வியாழக்கிழமை வங்கதேசத்துக்கு எதிராக இந்தியா ஐந்து விக்கெட் வித்தியாசத்தில் வெற்றி பெற்றதைத் தொடர்ந்து, அரையிறுதிக்கு முன்னேறும் அணியின் வாய்ப்பு வலுப்பெற்றுள்ளது.

இருப்பினும், இதைத் தாண்டி அரையிறுதிக்குச் செல்லும் பாதை எளிதானதாக இல்லை.

உண்மையில், குரூப்-ஏ பிரிவில் இந்தியா தற்போது ஆறு புள்ளிகளைப் பெற்று இரண்டாவது இடத்தில் உள்ளது. ஆஸ்திரேலிய அணி நான்கு போட்டிகளில் வெற்றி பெற்று எட்டு புள்ளிகளுடன் முதலிடத்தில் நீடிக்கிறது.

அதே நேரத்தில், நெதர்லாந்துக்கு எதிராகப் பெரிய வெற்றியைப் பதிவு செய்துள்ள தென்னாப்பிரிக்கா, தனது நிகர ரன்ரேட்டை மேம்படுத்தியுள்ளது. அதுவும் ஆறு புள்ளிகளுடன் இந்தியாவுக்குப் போட்டியாக உள்ளது. தென்னாப்பிரிக்க அணி குரூப் பிரிவில் மூன்றாவது இடத்தில் உள்ளது.

இரு அணிகளும் வெற்றி பெற்றுள்ளதால், அரையிறுதிக்கு முன்னேறும் போராட்டம் குரூப் சுற்றின் கடைசிப் போட்டி வரை நீண்டுள்ளது. இரு அணிகளின் கடைசி குரூப் சுற்றுப் போட்டியும் வரும் ஜூன் 28-ம் தேதி நடைபெற உள்ளது.

குரூப் சுற்றின் கடைசிப் போட்டி தீர்மானிக்கும்

தற்போது அரையிறுதிக்கு முன்னேறுவதற்கான போட்டி, இந்தியா மற்றும் தென்னாப்பிரிக்கா ஆகிய அணிகளுக்கு இடையே நேரடியாக நிலவுகிறது.

ஆஸ்திரேலிய அணி ஏற்கெனவே எட்டு புள்ளிகளைப் பெற்றுள்ளதுடன், அதன் நிகர ரன்ரேட்டும் நான்குக்கு மேல் உள்ளது. அந்த வகையில், ஆஸ்திரேலியா அரையிறுதிக்கு முன்னேறுவது உறுதியாகிவிட்டது.

இந்திய அணி தனது கடைசி குரூப் சுற்றுப் போட்டியை ஞாயிற்றுக்கிழமை லார்ட்ஸில் விளையாட உள்ளது. இந்தப் போட்டியில், குரூப்-ஏ பிரிவில் முதலிடத்தில் உள்ள ஆஸ்திரேலிய அணியை இந்தியா எதிர்கொள்கிறது.

இந்தியா எவ்வாறு அரையிறுதிக்கு முன்னேற முடியும்?

அரையிறுதிக்கான போட்டியில் தற்போது நான்கு சூழல்கள் உருவாகியுள்ளன.

முதல் சூழலில், இந்திய அணி ஆஸ்திரேலியாவுக்கு எதிரான போட்டியில் வெற்றி பெற்றால், இந்தியாவின் புள்ளி எண்ணிக்கை எட்டாக உயரும். அதனுடன், கடைசி லீக் போட்டியில் வங்கதேசம், தென்னாப்பிரிக்காவைத் தோற்கடிக்க வேண்டும் என்று இந்தியா எதிர்பார்க்க வேண்டும்.

இப்படி நடந்தால், இந்தியாவின் புள்ளி எண்ணிக்கை எட்டாக உயரும், தென்னாப்பிரிக்காவின் புள்ளி எண்ணிக்கை ஆறாகவே இருக்கும். இதன் மூலம் இந்தியா நேரடியாக அரையிறுதிக்கு முன்னேறும்.

ஆனால், இந்திய அணி ஆஸ்திரேலியாவிடம் தோல்வியடைந்தால், அதன் பாதை சவாலானதாக மாறிவிடும்.

அத்தகைய சூழலில், தென்னாப்பிரிக்காவும் வங்கதேசத்திடம் தோல்வியடைய வேண்டும் என்றும், அரையிறுதிக்கான இடத்தை நிகர ரன்ரேட் மூலம் தீர்மானிக்க வேண்டும் என்றும் இந்தியா எதிர்பார்க்க வேண்டியிருக்கும்.

தற்போது இந்திய அணியின் நிகர ரன்ரேட் +2.268 ஆக உள்ளது, அதே சமயம் தென்னாப்பிரிக்க அணியின் நிகர ரன்ரேட் +0.734 ஆக உள்ளது.

இந்தச் சூழலில், இந்தியா ஆஸ்திரேலியாவிடம் பெரிய வித்தியாசத்தில் தோல்வியடையக் கூடாது என்றும், அதே சமயம் தென்னாப்பிரிக்காவை வங்கதேசம் பெரிய வித்தியாசத்தில் வீழ்த்த வேண்டும் என்றும் இந்தியா எதிர்பார்க்க வேண்டும். அப்போதுதான் அரையிறுதிப் போட்டியில் இடம் பெற்றுள்ள இந்த இரு அணிகளுக்கும் இடையிலான நிகர ரன்ரேட் இடைவெளி தொடர்ந்து நீடிக்கும். அவ்வாறான சூழலில் இந்தியா அரையிறுதிக்கு முன்னேறும்.

மூன்றாவது சூழலில், இந்தியாவும் தென்னாப்பிரிக்காவும் தங்கள் கடைசி லீக் போட்டிகளில் வெற்றி பெற்றால், அப்போதும் அரையிறுதிக்குச் செல்லும் அணி நிகர ரன்ரேட் மூலமே தீர்மானிக்கப்படும்.

இந்திய அணியின் நிகர ரன்ரேட் தற்போது தென்னாப்பிரிக்காவை விட அதிகமாக உள்ளது. அந்த இடைவெளியைத் தக்கவைக்க, தென்னாப்பிரிக்க அணி வங்கதேசத்துக்கு எதிரான போட்டியில் மிகப்பெரிய வித்தியாசத்தில் வெற்றி பெறக்கூடாது என்று இந்தியா எதிர்பார்க்க வேண்டும்.

இரு அணிகளின் நிகர ரன்ரேட்டிலும் பெரும் இடைவெளி இருப்பதால், ஆஸ்திரேலியாவுக்கு எதிராக இந்தியா மிகப்பெரிய வெற்றியைப் பெற வேண்டிய அவசியமில்லை.

இந்தியா ஒரு சிறிய வெற்றியைப் பெற்றாலும், தனது நிகர ரன்ரேட்டைத் தக்கவைத்துக் கொள்ளும்; அந்த சூழலில் இந்தியா அரையிறுதிக்கு முன்னேறும்.

நான்காவது சூழல் இந்தியாவுக்கு மிகவும் வேதனையானது.

இந்தியா தனது கடைசி லீக் போட்டியில் ஆஸ்திரேலியாவிடம் தோல்வியடைந்து, தென்னாப்பிரிக்க அணி வங்கதேசத்தை வீழ்த்திவிட்டால், இந்தியா தொடரிலிருந்து வெளியேறும். தென்னாப்பிரிக்கா தனது அரையிறுதி இடத்தை உறுதி செய்யும்.

இந்தியாவுக்கு அரையிறுதிப் பாதை ஏன் கடினமானது?

இந்திய அணி தனது கடைசி லீக் போட்டியில் ஆஸ்திரேலியாவை எதிர்கொள்கிறது. ஆறு முறை சாம்பியன் பட்டம் வென்ற ஆஸ்திரேலியா, இந்த உலகக்கோப்பைத் தொடரில் இதுவரை ஒரு போட்டியில் கூட தோல்வியடையவில்லை.

அரையிறுதிக்கான வாய்ப்பை எளிதாக்கிக்கொள்ள, இந்தப் போட்டியில் வெற்றி பெறுவது இந்தியாவுக்கு மிகவும் அவசியமாகும்.

மிக முக்கியமாக, ஆஸ்திரேலியா குரூப் சுற்றில் இதுவரை விளையாடிய நான்கு போட்டிகளிலும் முழுமையான ஆதிக்கத்தைச் செலுத்தியுள்ளது. விளையாடிய அனைத்துப் போட்டிகளிலும் அந்த அணி பெரிய வித்தியாசத்தில் வெற்றி பெற்றுள்ளது.

முதல் போட்டியில் தென்னாப்பிரிக்காவை 65 ரன்கள் வித்தியாசத்தில் ஆஸ்திரேலியா வீழ்த்தியது. அதேபோல், இரண்டாவது போட்டியில் வங்கதேசத்துக்கு எதிராக 9 விக்கெட் வித்தியாசத்தில் மிகப்பெரிய வெற்றியைப் பதிவு செய்தது.

மூன்றாவது போட்டியில் நெதர்லாந்தை 98 ரன்கள் வித்தியாசத்திலும், நான்காவது போட்டியில் பாகிஸ்தானை 113 ரன்கள் என்ற பெரிய வித்தியாசத்திலும் ஆஸ்திரேலிய அணி தோற்கடித்தது.

இந்த நான்கு போட்டிகளிலும், ஆஸ்திரேலிய அணி பேட்டிங் மற்றும் பந்துவீச்சு என இரண்டிலும் அபாரமான ஆட்டத்தை வெளிப்படுத்தியுள்ளது.

இதுவரை இந்தியாவின் செயல்பாடு

ஆஸ்திரேலிய அணியுடன் ஒப்பிடும்போது, இந்தியா தனது நான்கு குரூப் சுற்றுப் போட்டிகளில் மூன்றில் வெற்றி பெற்றுள்ளது.

தென்னாப்பிரிக்காவுக்கு எதிரான போட்டியில் மட்டுமே இந்திய அணி தோல்வியைச் சந்தித்தது. அந்தப் போட்டியில் தென்னாப்பிரிக்கா ஆறு விக்கெட் வித்தியாசத்தில் இந்தியாவை வீழ்த்தியது.

இந்தியா தனது உலகக்கோப்பைத் தொடரை பாகிஸ்தானுக்கு எதிராகத் தொடங்கியது. இந்தப் போட்டியில் பாகிஸ்தானை 64 ரன்கள் வித்தியாசத்தில் இந்தியா வீழ்த்தியது.

அதேபோல், இரண்டாவது போட்டியில் நெதர்லாந்துக்கு எதிராக 95 ரன்கள் வித்தியாசத்தில் மிகப்பெரிய வெற்றியைப் பதிவு செய்தது. மூன்றாவது போட்டியில் தென்னாப்பிரிக்காவிடம் தோல்வியைத் தழுவியது.

இந்தியா தனது நான்காவது போட்டியில் வங்கதேசத்தை ஐந்து விக்கெட் வித்தியாசத்தில் வீழ்த்தியது.

- இது, பிபிசிக்காக கலெக்டிவ் நியூஸ்ரூம் வெளியீடு