'பாலியல் தொழிலாளியாக இருந்தால் இப்படி செய்யலாமா?' - டெல்லியில் கூட்டுப் பாலியல் வன்கொடுமைக்கு ஆளான பெண் கேள்வி

(எச்சரிக்கை: இக்கட்டுரையின் சில பகுதிகள் சங்கடத்தை ஏற்படுத்தலாம்)

"நான் ஒரு பாலியல் தொழிலாளி. அப்படியென்றால், அவர்கள் என்னை கூட்டாகப் பாலியல் வன்கொடுமை செய்வார்களா?"

டெல்லியில், படுக்கை வசதி கொண்ட பேருந்தில் சிலர் தன்னை கூட்டாக பாலியல் வன்கொடுமை செய்ததாக ஒரு பெண் குற்றம் சாட்டியுள்ளார். அந்தச் சம்பவத்தை விவரிக்கும்போது, ​​அவர் எழுப்பும் முதல் கேள்வி இதுதான்.

டெல்லி காவல்துறையின் தகவலின்படி, மே 11 மற்றும் 12 ஆகிய தேதிகளுக்கு இடைப்பட்ட இரவில், நள்ளிரவு 12:15 மணி முதல் 2:30 மணிக்கு இடைப்பட்ட நேரத்தில் நடைபெற்ற சம்பவம் தொடர்பாக ஒரு கூட்டுப் பாலியல் வன்கொடுமை வழக்குப் பதிவு செய்யப்பட்டுள்ளது; மேலும், இவ்வழக்கில் தொடர்புடையதாக கருதப்படும் இரண்டு பேர் கைது செய்யப்பட்டுள்ளனர்.

கைது செய்யப்பட்டவர்கள் உத்தரப்பிரதேசத்தைச் சேர்ந்தவர்கள். இவர்கள் டெல்லிக்கும் பிகாருக்கும் இடையே இயங்கும் படுக்கை வசதி கொண்ட பேருந்தின் ஓட்டுநரும் க்ளீனரும் ஆவர்.

அந்தச் சம்பவம் குறித்த ஊடகச் செய்திகளால் பாதிக்கப்பட்ட அப்பெண், தனது வீட்டை மாற்றிக்கொண்டார்.

கண்ணீருடன் அந்தப் பெண் பிபிசியிடம் பேசுகையில், "ஊடகங்களின் கேமராக்கள் என் வீட்டுக்கே வந்துவிட்டன. எனக்கு என்ன நடந்தது என்பது அந்த (குடிசைப்) பகுதி முழுவதற்கும் தெரிந்துவிட்டது. நான் என் குடும்பத்துடன் வசித்து வருகிறேன். மிகக் கடுமையான நிர்ப்பந்தத்தின் காரணமாகவே, சில நாட்களுக்கு முன்பு நான் பாலியல் தொழிலைத் தொடங்கினேன். என் வீட்டில் இருப்பவர்களுக்குக்கூட இது தெரிந்திருக்கவில்லை. இப்போது மக்கள் எனக்கு நேர்ந்த கொடுமையைப் பற்றிப் பேசுவதில்லை; மாறாக, என் குடும்பத்தை ஆதரிப்பதற்காக நான் செய்த தொழிலைப் பற்றிப் பேசி, என் நற்பெயருக்குக் களங்கம் கற்பிக்கிறார்கள்" என்றார்.

தன் குடும்பத்தை நடத்துவதற்காகக் கடந்த சில நாட்களாகப் பாலியல் தொழிலில் ஈடுபட்டு வந்தபோதிலும், அந்த இரவில் அத்தொழிலுக்காகத் தான் வீட்டை விட்டு வெளியேறவில்லை என்று அவர் கூறுகிறார்.

அவர் கூறுகையில், "என் சகோதரரின் அறையை மாற்ற நான் ஏற்பாடு செய்தேன். அதன்பிறகு, நான் வீட்டுக்குத் திரும்பிக்கொண்டிருந்தேன். பேருந்து நிறுத்தத்தில் பேருந்து நின்றது; அதன் நடத்துநர் என்னை அழைத்தார். நான் பேருந்தின் கதவு அருகே நின்றுகொண்டு பேசிக்கொண்டிருந்தேன். நான் வேலை செய்ய மறுத்தேன். அப்படியிருந்தும், அவர் என்னை பேருந்துக்குள் இழுத்துவிட்டார்." என்றார்.

அவர் கூறுகையில், "பாலியல் உறவுக்காக அவர்கள் பணம் தருவதாக என்னைக் கேட்டார்கள்; ஆனால் நான் மறுத்துவிட்டேன். பேருந்தில் ஐந்து பேர் இருந்தார்கள். ஒருவர் தூங்கிக்கொண்டிருந்தார். அவர்கள் என்னை இரவு முழுவதும் தங்களுடனேயே வைத்துக்கொள்ள விரும்பினார்கள். நான் பலமுறை மறுத்தேன்; ஆனாலும், அவர்களில் இருவர் என்னை வன்கொடுமை செய்தார்கள்" என்றார்.

இச்சம்பவம் தொடர்பாக, பாலியல் வன்கொடுமை, கூட்டுப் பாலியல் வன்கொடுமை மற்றும் பொது நோக்கம் ஆகிய பிரிவுகளின் கீழ் டெல்லி காவல்துறை வழக்குப் பதிவு செய்துள்ளது.

டெல்லி புறநகர் (Outer Delhi) காவல் துணை ஆணையர் விக்ரம் சிங், இச்சம்பவம் குறித்து வெளியிட்ட அறிக்கையில், "இரண்டு நபர்கள் தன்னிடம் அத்துமீறி நடந்துகொண்டதாக ஒரு நபர் தொலைபேசி வாயிலாகத் தகவல் அளித்தார். இச்செய்தி காவல்துறையின் கவனத்துக்கு வந்த உடனேயே, அவர்கள் இச்சம்பவத்தை மிகவும் தீவிரமாக எடுத்துக்கொண்டு, பாதிக்கப்பட்டவருக்கு உதவியதுடன், குற்றம் சாட்டப்பட்ட அந்த இருவரையும் கைது செய்தனர். இவ்விஷயத்தில் காவல்துறை கடுமையான நடவடிக்கைகளை மேற்கொண்டு வருகிறது," என்று தெரிவித்தார்.

'போலீஸார் உதவினர்'

அந்தப் பெண்ணின் கூற்றுப்படி, அவர் பேருந்திலிருந்து இறங்கிய உடனேயே காவல் உதவி எண்ணை அழைத்தார்; ஐந்து நிமிடங்களுக்குள் காவல்துறையினர் சம்பவ இடத்துக்கு வந்து சேர்ந்தனர்.

அவர் கூறுகையில், "காவல்துறையினர் சம்பவ இடத்துக்கு வந்து, உடனடியாக நான் கூறியதைக் கேட்டனர். நான் காவல் நிலையத்துக்கு அழைத்துச் செல்லப்பட்டேன்; எனது புகாரின் அடிப்படையில் உடனடியாக ஒரு வழக்குப் பதிவு செய்யப்பட்டது. என்னால் இயன்ற அனைத்து வழிகளிலும் அவர்கள் எனக்கு உதவ முயன்றனர். எனக்கு மருத்துவப் பரிசோதனை செய்யப்பட்டது; எனது உணவு குறித்தும் அவர்கள் விசாரித்தனர்" என்றார்.

டெல்லி காவல்துறையின் கூற்றுப்படி, சம்பவம் குறித்துத் தெரிவிக்கப்பட்ட சில மணிநேரங்களிலேயே குற்றம் சாட்டப்பட்ட இருவரும் கைது செய்யப்பட்டனர்.

அப்பெண் கூறுகையில், "கடந்த சில ஆண்டுகளாக என் கணவர் கடுமையாக உடல்நலம் பாதிக்கப்பட்டிருக்கிறார். எனக்கு மூன்று சிறுவயது மகள்கள் உள்ளனர். என் குடும்பத்தில் வருமானம் ஈட்டும் நபர் வேறு யாரும் இல்லை. நான் வேறு சில வேலைகளை செய்ய முயன்றேன்; ஆனால், என் குடும்பத்தை ஆதரிப்பதற்குப் போதுமான அளவு சம்பாதிக்கக்கூடிய எந்த வேலையும் எனக்குக் கிடைக்கவில்லை. சில நாட்களுக்கு முன்புதான் நான் இந்த வேலையைத் தொடங்கினேன்" என்றார்.

கண்ணீருடன் அவர் கூறுகையில், "மூன்று பெண் குழந்தைகளின் தாயான ஒருத்தி வீட்டை விட்டு வெளியேறி, பாலியல் தொழிலில் ஈடுபட்டிருக்கிறார் என்றால், அவள் மிகவும் நிர்கதியற்ற நிலையில் இருக்க வேண்டும். அவளது அந்த நிர்கதியற்ற நிலையை யாரும் சாதகமாகப் பயன்படுத்திக்கொள்ளக் கூடாது" என அவர் தெரிவித்தார்.

ஒரு கேள்விக்குப் பதிலளிக்கையில், குற்றம் சாட்டப்பட்டவர்களுடன் தனக்கு முன்னறிமுகம் ஏதும் இல்லை என்றும் அவர் கூறுகிறார்.

ஊடகங்கள் குறித்து கேள்விகள்

அந்தப் பெண்ணின் கணவர் பிபிசி நியூஸ் இந்திக்கு அளித்த பேட்டியில், "வீட்டை நடத்துவதற்காக என் மனைவி என்ன செய்து கொண்டிருந்தார் என்பது என் வீட்டில் யாருக்குமே தெரியாது. அவர் என்னிடம் கூடச் சொல்லவில்லை. வீட்டை நடத்துவதற்காகவே அவர் இவை அனைத்தையும் செய்தார்," என்று கூறினார்.

அவர் கூறுகையில், "பல பத்திரிகையாளர்கள் எங்கள் வீட்டுக்கு வந்தனர். அவர்கள் பெரிய கேமராக்களுடன் வெளியே நின்று வீடியோ எடுக்கத் தொடங்கினர். அவர்கள் என் பெயரையும், என் மனைவியின் பெயரையும் கேட்டுக்கொண்டிருந்தனர். இப்போது இங்குள்ள அனைவரும் எங்களைச் சந்தேகத்துடன் பார்க்கிறார்கள். இந்தச் சூழலில் எங்களால் இங்கு தொடர்ந்து வாழ முடியுமா?" என்றார்.

தனக்கு நீதி கிடைக்கும் வரை தனது வழக்கை எதிர்த்துப் போராடுவேன் என்று அப்பெண் வலியுறுத்துகிறார்.

அவர் கூறுகையில், "இது என் பாதுகாப்பைப் பற்றியது மட்டுமல்ல. என்னைப் போன்ற ஆயிரக்கணக்கான பெண்களின் பாதுகாப்பைப் பற்றியது. தெருவில் நிற்கும் ஒரு பெண்ணுக்கும், வேறெந்தப் பெண்ணுக்கும் உள்ளதைப் போலவே, பாதுகாப்புக்கான முழு உரிமையும் உண்டு" என்றார்.

மேலும் அவர் கூறுகையில், "எனக்கு மூன்று மகள்கள் உள்ளனர். அவர்களுக்கு நல்ல கல்வியை அளிக்க நான் விரும்புகிறேன். நான் அனுபவித்த துன்பங்களை என் மகள்கள் ஒருபோதும் அனுபவிக்கக் கூடாது. நான் எத்தனை முறை காவல் நிலையத்துக்கோ அல்லது நீதிமன்றத்துக்கோ செல்ல நேர்ந்தாலும் சரி, என் வழக்கில் கடுமையான தண்டனை கிடைக்கும் வரை நான் பின்வாங்க மாட்டேன்" என்றார்.

உச்ச நீதிமன்ற உத்தரவுகள்

பாலியல் தொழிலாளர்களும் மற்ற எந்தவொரு குடிமகனையும் போலவே அதே அரசியலமைப்பு சார்ந்த கண்ணியம், பாதுகாப்பு மற்றும் நீதிக்கு உரிமையுடையவர்கள் என்பதை இந்தியாவின் நீதிமன்றங்கள் மீண்டும் மீண்டும் தெளிவுபடுத்தியுள்ளன.

2022-ஆம் ஆண்டில் வழங்கிய ஒரு வரலாற்றுச் சிறப்புமிக்க உத்தரவில், பாலியல் தொழிலானது ஒரு 'தொழில்' என்றும், ஒரு பெண் பாலியல் தொழிலாளியாக இருக்கிறார் என்ற ஒரே காரணத்துக்காகவே காவல்துறை அல்லது சமூகம் அவருக்குரிய உரிமைகளை மறுக்க இயலாது என்றும் இந்திய உச்ச நீதிமன்றம் தீர்ப்பளித்தது.

ஒரு பாலியல் தொழிலாளியின் புகாரானது சமமான கூர்உணர்வுடன் பதிவு செய்யப்பட வேண்டும் என்றும், அவரது அடையாளம் மற்றும் தனிப்பட்ட ரகசியங்கள் பாதுகாக்கப்பட வேண்டும் என்றும் நீதிமன்றம் கூறியிருந்தது.

"ஒவ்வொரு பெண்ணுக்கும், அவரது தொழில் எதுவாக இருப்பினும், பாலியல் வன்முறை மற்றும் சுரண்டலிலிருந்து பாதுகாப்புப் பெறும் உரிமை உண்டு," என்றும் நீதிமன்றம் தெளிவாகக் கூறியது.

இந்தியச் சட்டத்தின் கீழ், சம்மதமின்றி நடைபெறும் எந்தவொரு பாலியல் உறவும் பாலியல் வன்புணர்வாகவே கருதப்படும்; மேலும், ஒரு பெண் பாலியல் தொழிலாளியாக இருப்பது, அவர் அதற்குச் சம்மதம் அளித்துள்ளார் என்று அனுமானிப்பதற்கான அடிப்படையாக அமையாது.

பாலியல் வன்கொடுமை வழக்குகளில், ஒரு பெண்ணின் 'ஒழுக்கத்தை' கேள்விக்குள்ளாக்குவதன் மூலமோ அல்லது அவரது தொழிலை அடிப்படையாகக் கொள்வதன் மூலமோ அக்குற்றத்தின் தீவிரத்தைக் குறைத்து மதிப்பிட இயலாது என்று உச்ச நீதிமன்றமும் பல்வேறு உயர் நீதிமன்றங்களும் தங்கள் தீர்ப்புகளில் குறிப்பிட்டுள்ளன.

- இது, பிபிசிக்காக கலெக்டிவ் நியூஸ்ரூம் வெளியீடு