Trump wuxuu ku dhawaaqay heshiiska Iran laakiin su'aalaha - iyo khataraha - ayaa weli taagan

Ku dhawaaqista heshiis lagu soo afjarayo colaadda u dhexeysa Maraykanka iyo Iiraan waxay siisay Donald Trump haddiyad dhalasho oo aad loogu riyaaqay – inkastoo ay ku duuban tahay qaddar weyn oo hubanti la'aan ah.

Qoraal uu ku daabacay baraha bulshada si uu ugu dhawaaqo heshiiska, madaxweynaha Maraykanka ayaa sheegay in Marinka Hormuz uu u furnaan doono maraakiibta ganacsiga, isla markaana Maraykanku qaadi doono xannibaaddii ciidammadiisa badda.

"Ha socdo qulqulka shidaalku!" ayuu Trump ku dhawaaqay Axaddii.

Wuxuu sidoo kale sheegay in, si ka duwan guuldarrooyinkii madaxweynayaashii hore ee Maraykanka, uu isagu gaaray "heshiis weyn" oo keeni doona "nabad iyo amni gobolka oo dhan ah."

Buunbuuninta noocaas ahi ma aha wax ku cusub Trump, dabcan. Hadalladiisii ku saabsanaa heshiiskii sannadkii hore lagu soo afjaray dagaalkii Qaza – isagoo ku tilmaamay "nabad waarta oo aan dhammaanayn" iyo "billowga xilli iimaan, rajo iyo Ilaah" – waxay ahaayeen kuwo si la mid ah loo buunbuuniyay, inkastoo xaqiiqada dhulka ka jirta ay aad uga fogaatay ballanqaadyadaas.

Heshiisyada diblomaasiyadeed ee heerkan sare ah, guusha ama fashilka badanaa waxay ku xiran yihiin faahfaahinta. Hase yeeshee, halkan faahfaahinta aad bay u yar tahay.

Wareysi uu fiidnimadii Axadda siiyay Fox News, Madaxweyne Ku-xigeenka JD Vance ayaa sheegay in heshiiskan uu si cad u dammaanad qaadayo in Iiraan aysan waligeed yeelan doonin hub nukliyeer ah, isla markaana Maraykanku awood u yeelan doono inuu xaqiijiyo in heshiiska la fulinayo.

Si kastaba ha ahaatee, su'aalo badan ayaa weli ka taagan arrimo muhiim ah, oo ay ku jiraan xaddidaadaha lagu soo rogi doono kobcinta yuraaniyamka iyo waxa laga yeeli doono kaydka yuraaniyamka aadka loo kobciyay ee ay Iiraan hadda haysato.

Qaar ka mid ah arrimahan waxaa la filayaa in lagu xalliyo wadaxaajoodyo dambe iyo wadahadallo "farsamo" oo la qaban doono inta lagu jiro muddo 60 maalmood ah oo lagu kordhiyay xabbad-joojinta hadda jirta. Laakiin haddii hal shay uu cad yahay ka dib tobannaan sano oo dadaallo lagu qancinayay ama lagu cadaadinayay Iiraan inay ka tanaasusho himilooyinkeeda nukliyeerka, waa in aysan jirin wax dammaanad ah, si kasta oo Maraykanku u aaminsan yahay inuu ku xaqiijistay "is-afgaradkan."

Si loo muujiyo arrintan, Golaha Sare ee Amniga Qaranka ee Iiraan ayaa Axaddii soo saaray bayaan uu ku sheegay in "wadaxaajoodyada kama dambaysta ah dib loo dhigi doono ilaa dhinaca kale uu hirgeliyo ballanqaadyadiisa ku xusan is-afgaradka."

Waxa ay ballanqaadyadaasi yihiin – iyo sida ay Iiraan u fasirayso – ayaa door weyn ka qaadan doona in heshiiskani sii jiro iyo in kale.

Khubarrada suuqyada tamarta ayaa ka digay in socodka shidaalka ee marinkaasi uusan si degdeg ah ugu soo laaban doonin heerarkii uu joogay ka hor dagaalka. Nadiifinta safafka dhaadheer ee maraakiibta shidaalka, ka saarista miinooyinka, iyo dib u soo celinta gaadiidka iyo wax-soo-saarka caadiga ah ee shidaalka waxay qaadan karaan toddobaadyo.

Iyadoo ay weli harsan yihiin dhowr maalmood ka hor saxiixa rasmiga ah, Iiraan iyo Maraykanku waxay haystaan waqti ay ku xalliyaan faahfaahinta muhiimka ah si loo xaqiijiyo guusha heshiiska – balse sidoo kale waxaa jirta fursad uu heshiisku ku burburi karo.

Qodob kale oo aan la saadaalin karin waa Israa'iil.

Dagaalkani mar walba wuxuu ahaa dagaal ay ku lug leeyihiin saddex dhinac, waxaana Trump uu Axaddii u sheegay Wall Street Journal inuu aad uga carooday Ra'iisul Wasaaraha Israa'iil Benjamin Netanyahu kadib markii uu amar ku bixiyay weerarro lagu qaaday Lubnaan dhammaadkii toddobaadkan, weerarro uu Trump aaminsanaa inay halis gelin karaan heshiiska Iiraan ee ku dhowaad la soo gabagabeeyay.

22 dal oo digniin wadajir ah u diray Iiraan`

Waa kuwee dalalka taageerada u muujiyay Iiraan?

Xuutiyiintu maka qeyb-qaadanayaan dagaalka ka dhanka ah Iiraan?

Heshiisku wuu sii jiray – ugu yaraan muddo ku filan in si rasmi ah loo shaaciyo. Hase yeeshee, haddii Israa'iil ay dib u billowdo hawlgallo milatari oo cusub gudaha Lubnaan, Iiraan waxay mar kale go'aansan kartaa inay xirto Marinka Hormuz, taasoo mar kale khatar gelin karta dhaqaalaha adduunka.

Hadalladiisii, JD Vance wuxuu sidoo kale qiray dhibaatada uu dagaalkani u geystay dad badan oo Maraykan ah sababo la xiriira kororka qiimaha tamarta iyo saameynta dhaqaale ee ka dhalatay.

"Farriintayda ugu weyn ee aan u dirayo shacabka Maraykanka waa mahadsanidiin," ayuu yiri, isagoo ballanqaaday in qiimaha tamartu uu bilaabi doono inuu hoos u dhaco.

Sida ugu dhaqsaha badan ee arrintaasi u dhacdo, iyo sida ugu dhakhsaha badan ee hoos u dhacaasi ugu tarjumo qiimo-dhimis guud oo ku timaadda badeecadaha iyo adeegyada ay isticmaalaan Maraykanka la tacaalaya culaysyada dhaqaale, waxay door weyn ka ciyaari doontaa go'aaminta in cadaadiska siyaasadeed ee sii kordhaya ee saaran Jamhuuriyiinta uu yaraado ka hor doorashooyinka dhexe ee Kongareeska ee bisha Nofeembar.

Sida ay muujinayaan sahannadii ugu dambeeyay, Trump iyo xisbigiisu waxay wajahayaan dadweyne badan oo aan ku qanacsanayn. Sahanka YouGov ayaa muujiyay in 63% dadka Maraykanka ahi aysan raalli ka ahayn sida uu u maamulayo dhaqaalaha, halka 57% ay aaminsan yihiin in dhaqaaluhu uu sii xumaanayo.

Ugu yaraan, heshiiska Axaddii la gaaray wuxuu gacan ka geysan karaa yareynta, haddii uusan gebi ahaanba meesha ka saarin, qaar ka mid ah culaysyada dhaqaale ee ka dhashay colaadda socota. Haddii qiimaha shidaalka iyo batroolku si dhab ah u bilaabaan inay hoos u dhacaan, tani waxay noqon kartaa calaamad muuqata oo muujinaysa in xaaladdu soo hagaagayso.

Waa tallaabo muhiim ah oo dib loogu soo dhowaanayo xaaladdii jirtay ka hor billowgii dagaalka, inkastoo yoolalkii waaweynaa ee Trump ay weli yihiin kuwo aan la xaqiijin, isla markaana uu weli wajahayo khatarro siyaasadeed oo gudaha dalka ah.