ක්‍රිකට් නීති පොත අලුත් වෙයි: ICC නව නීති මෙන්න
ඡායාරූප මූලාශ්‍රය, Getty Images
- Author, බීබීසී සිංහල
- Published
- කියවීමේ කාලය: මිනිත්තු 4
ජාත්‍යන්තර ක්‍රිකට් කවුන්සිලය (ICC) ඔක්තෝබර් 01 දින සිට ක්‍රියාත්මක වන පරිදි සියලු ම තරග රටාවන් (Formats) සඳහා නව තරග කොන්දේසි මාලාවක් හඳුන්වා දී ඇත. කාලය අපතේ හැරීම පාලනය කිරීමේ නව පියවර, පන්දු පිරිවිතරයන් ප්‍රමිතිගත කිරීම සහ පන්දු රැකීමේ ඇතැම් නීති පැහැදිලි කිරීම ඊට ඇතුළත් වේ.
නව තරග කොන්දේසිත් සමග විවිධ තරග රටාවන් හරහා සිදුවන ප්‍රධාන වෙනස්කම් අතරට දහවල් ටෙස්ට් තරග සඳහා රෝස පන්දු භාවිතය සහ පිතිකරුවන් කාලය අපතේ හැරීම වෙනුවෙන් පනවන දඬුවම් ද ඇතුළත් වේ.
මෙම වෙනස්කම් ඔක්තෝබර් 1 වන දා හෝ ඉන්පසුව ආරම්භ වන සියලු ම ජාත්‍යන්තර තරගාවලි සඳහා බලපැවැත්වෙන අතර, දැනට පැවැත්වෙන තරගාවලි පෙර පැවති රෙගුලාසිවලට අනුව ම ක්‍රියාත්මක වනු ඇත.
සියලු ම තරග රටාවන් සඳහා වන පිරිමි සහ කාන්තා නවතම තරග කොන්දේසි දැන් ICC වෙබ් අඩවියේ 'Rules and Regulations' (නීති සහ රෙගුලාසි) අංශයෙන් ලබා ගත හැකි අතර, ඔක්තෝබර් 01 වන දා සිට ක්‍රියාත්මක වන MCC ක්‍රිකට් නීතිවල සංශෝධනයන් ද ඊට ඇතුළත් කර ඇත.
අයිසීසී පිරිමි ක්‍රිකට් කමිටුවේ සභාපති සෞරව් ගංගුලි ප්‍රකාශ කළේ, "ක්‍රිකට් පන්දු සම්බන්ධ විධිවිධාන, පන්දු රැකීමේ ඇතැම් අංශ පිළිබඳ වැඩි පැහැදිලි කිරීම් සහ ක්‍රීඩාවේ කාලය වැඩි දියුණු කිරීම අරමුණු කර ගත් පියවර ඇතුළුව තරග කොන්දේසිවලට වැදගත් වෙනස්කම් කිහිපයක් සිදු කර තිබෙනවා," යනුවෙනි.
මෙම වෙනස්කම් සිදු කර ඇත්තේ, ක්‍රීඩාවේ අඛණ්ඩතාව සහ ස්ථාවරත්වය රැක ගනිමින්, නවීන ක්‍රීඩාවේ අවශ්‍යතාව තරග කොන්දේසි මගින් අඛණ්ඩව නිරූපණය වන බව සහතික කිරීම සඳහා ඉතා හොඳින් සලකා බැලීමෙන් පසුව බව ද ඔහු පවසා තිබේ.
ඡායාරූප මූලාශ්‍රය, ISHARA S. KODIKARA/AFP via Getty Images
සියලු ම තරග රටාවලට පොදු වෙනස්කම්
- පිතිකරුවන් කාලය අපතේ හැරීම සඳහා දඬුවම් (Penalties for Batters wasting time): පිතිකරුවෙකු නියමිත වේලාව තුළ පන්දුවට මුහුණ දීමට සූදානම් නොවන්නේ නම්, පළමු වරට අනතුරු ඇඟවීමක් ද, දෙවන වරට අවසන් අනතුරු ඇඟවීමක් ද සිදු කෙරේ. තෙවන සහ ඉන් ඉදිරියට සිදු කරන සෑම අවස්ථාවකදී ම පන්දු රකින කණ්ඩායමට දඬුවම් ලකුණු 5 බැගින් (5 penalty runs) පිරිනැමේ.
- කාන්තා ක්‍රිකට් පන්දුවල බර සහ ප්‍රමාණය (Women's Cricket Balls): මීට පෙර කාන්තා සහ කනිෂ්ඨ ක්‍රිකට් සඳහා බොහෝ විට එක ම පන්දුවක් නිෂ්පාදනය කෙරිණි. නමුත් නව නීති යටතේ පිරිමි, කාන්තා සහ කනිෂ්ඨ ක්‍රිකට් සඳහා වඩාත් නිවැරදි ප්‍රමාණ සහ බර සීමාවන් සහිත වෙනස් පිරිවිතරයන් 3ක් හඳුන්වා දී ඇත.
- ඕවර්ත්‍රෝ නීතිය පැහැදිලි කිරීම (Overthrows): ලකුණු රැස් කිරීම වැළැක්වීමට හෝ රන්-අවුට් කිරීමක් සඳහා පන්දුව කඩුල්ල දෙසට එල්ල කරන අවස්ථාවකදී පමණක් එය 'ඕවර්ත්‍රෝ' එකක් ලෙස සැලකේ. වෙනත් පන්දු රකින්නෙකු වෙත පන්දුව යොමු කිරීමේදී සිදුවන මගහැරීමක් (Misfield) මින් ඉදිරියට ඕවර්ත්‍රෝ එකක් ලෙස නොසැලකේ.
- පන්දුව නිෂ්ක්‍රීය වීම (Ball 'Finally Settled'): අවසන් තීරණයක් ගැනීමේදී පන්දුව සම්පූර්ණයෙන් ම පාලනයට ගෙන තිබේ ද යන්න තීරණය කිරීම සඳහා විනිසුරුවරයාට දැන් වැඩි නිදහසක් හිමි වේ. මෙය විශේෂයෙන් ම තියුණු තරගයක අවසන් පන්දුවේදී ඉතා වැදගත් විය හැකි ය. පන්දුව "අවසන් ලෙස පාලනයට ගෙන ඇත" යැයි සැලකීමට එය අනිවාර්යයෙන් ම පන්දු යවන්නාගේ හෝ කඩුලු රකින්නාගේ අතේ තිබිය යුතු නැත.
- පන්දුව මත සම්පූර්ණ පාලනය (Complete Control over the ball): රන්-අවුට් හෝ ස්ටම්ප් කිරීමකදී, පන්දු රකින්නා පන්දුව සියතට ගෙන ඒ මත සම්පූර්ණ පාලනය තබා ගත යුතු ය. පන්දුව කඩුල්ලේ වදින විට පන්දුව අතින් ස්පර්ශ කිරීම පමණක් මින් ඉදිරියට ප්‍රමාණවත් නොවේ.
ටෙස්ට් ක්‍රිකට් සඳහා පමණක් අදාළ වෙනස්කම්
- දවල් කාලයේදී රෝස පන්දු භාවිතය (Pink Balls): අයහපත් ආලෝක තත්ත්වය (Bad light) හේතුවෙන් තරග කාලය අපතේ යාම වැළැක්වීම සඳහා, කණ්ඩායම් දෙකේ ම එකඟතාව මත දහවල් ටෙස්ට් තරග සඳහා ද රෝස පන්දු අත්හදා බැලීමක් ලෙස භාවිත කළ හැක. මෙම තීරණය තරගය ආරම්භ වීමට පෙර ගත යුතු අතර, තරගය අතරතුර නැවත රතු පන්දුවට මාරු විය නොහැක.
- දවසේ අවසන් පන්දු වාරයේ කඩුල්ලක් බිඳ වැටීම: (Final wicket of day to not necessarily determine the end of Play): දවසේ අවසන් පන්දු වාරය ක්‍රියාත්මක වන විට කඩුල්ලක් බිඳ වැටුණ ද, එම පන්දු වාරය අවසන් වන තෙක් එදින තරගය ස්වයංක්‍රීයව නතර නොවේ (කාලගුණය යහපත් නම්). ඉතිරි පන්දු කිහිපය එදින ම යැවිය යුතු ය.
එක්දින සහ T20 සඳහා වෙනස්කම්
- ඉනිම අතර විවේකය (Innings Interval - T20Is): විස්සයි20 තරගවල ඉනිම දෙක අතර විවේක කාලය මිනිත්තු 15ක් ලෙස ස්ථාවර කර ඇත. වැඩිපුර කාලය ගතවී ඇති අවස්ථාවකදී එය අවම මිනිත්තු 10ක් දක්වා අඩු කළ හැක.
- බීම විවේකය (Drinks Break): එක්දින සහ T20 තරගවල බීම විවේකයේදී ප්‍රධාන පුහුණුකරුට හෝ ඔහු විසින් නම් කරනු ලබන අයෙකුට ක්‍රීඩා පිටියට ඇතුළු වීමට අවසර ලැබේ.
- ලෙග් සයිඩ් වයිඩ් නීතිය (Leg-side Wide): මීට පෙර අත්හදා බැලීමක් ලෙස ක්‍රියාත්මක වූ ලෙග් සයිඩ් වයිඩ් නීතිය (පිතිකරුවා පන්දුව එවීමට පෙර හෝ එවන අතරතුර සීමාවෙන් ඉවතට ගමන් කරන විට, ඔහුගේ පාද පිහිටි ස්ථානය අනුව වයිඩ් පන්දුව තීරණය කිරීම) දැන් ස්ථිර නීතියක් ලෙස එක්දින සහ T20 සඳහා එකතු කර ඇත.
