ਯੇਰੋਸ਼ਲਮ ਮਾਮਲਾ: ਹਮਾਸ ਵੱਲੋਂ ਇੰਤੀਫਾਦਾ ਦਾ ਐਲਾਨ
ਤਸਵੀਰ ਸਰੋਤ, SAID KHATIB/AFP/Getty Images
ਅਮਰੀਕਾ ਵੱਲੋਂ ਯੇਰੋਸ਼ਲਮ ਨੂੰ ਇਜ਼ਰਾਈਲ ਦੀ ਰਾਜਧਾਨੀ ਐਲਾਨੇ ਜਾਣ ਤੋਂ ਬਾਅਦ ਫਿਲਿਸਤੀਨ ਦੇ ਕੱਟੜਪੰਥੀ ਸੰਗਠਨ ਹਮਾਸ ਨੇ ਨਵੇਂ ਇੰਤੀਫਾਦਾ ਜਾਂ ਬਗਾਵਤ ਦਾ ਐਲਾਨ ਕੀਤਾ ਹੈ।
ਗਾਜ਼ਾ 'ਚ ਸੰਗਠਨ ਦੇ ਮੁਖੀ ਇਸਮਾਈਲ ਹਨੀਏਹ ਨੇ ਵੀਰਵਾਰ ਨੂੰ ਪ੍ਰੈੱਸ ਕਾਨਫਰੰਸ ਕੀਤੀ। ਵੈਸਟ ਬੈਂਕ ਅਤੇ ਗਾਜ਼ਾ ਪੱਟੀ 'ਚ ਇੱਕ ਦਿਨ ਦਾ ਰੋਸ ਪ੍ਰਦਰਸ਼ਨ ਕੀਤਾ ਗਿਆ।
ਕੀ ਹੈ ਇੰਤੀਫਾਦਾ?
ਇੰਤੀਫਾਦਾ ਸ਼ਬਦ ਅਰਬੀ ਭਾਸ਼ਾ ਤੋਂ ਲਿਆ ਗਿਆ ਹੈ। ਇਸਦਾ ਸ਼ਬਦੀ ਅਰਥ ਹੈ ਕਾਂਬਾ ਜਾਂ ਝਟਕਾ। ਹਾਲਾਂਕਿ ਹਮਾਸ ਵੱਲੋਂ ਇੰਤੀਫਾਦਾ ਦੇ ਐਲਾਨ ਦਾ ਮਤਲਬ ਬਗਾਵਤ ਹੈ। ਇਜ਼ਰਾਈਲ ਦੇ ਕਬਜ਼ੇ ਤੋਂ ਬਾਅਦ ਪਹਿਲਾ ਇੰਤੀਫਾਦਾ ਸਾਲ 1987 ਤੋਂ 1993 ਤੱਕ ਚੱਲਿਆ ਅਤੇ ਦੂਜਾ ਇੰਤੀਫਾਦਾ ਸਾਲ 2000 ਵਿੱਚ ਸ਼ੁਰੂ ਹੋਇਆ।
ਤਸਵੀਰ ਸਰੋਤ, JAAFAR ASHTIYEH/AFP/Getty Images
ਇਸ ਦੇ ਉਲਟ ਇਲਜ਼ਾਰਾਈਲ ਦੇ ਪ੍ਰਧਾਨਮੰਤਰੀ ਬਿਨਿਆਮਿਨ ਨੇਤਨਯਾਹੂ ਨੇ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਐਲਾਨ ਨੂੰ ਇਤਿਹਾਸਕ ਦਿਨ ਕਿਹਾ ਹੈ।
ਹਾਲਾਂਕਿ ਅਮਰੀਕੀ ਰਾਸ਼ਟਰਪਤੀ ਦੇ ਐਲਾਨ ਦੀ ਵੱਡੇ ਪੱਧਰ 'ਤੇ ਨਿੰਖੇਧੀ ਹੋ ਰਹੀ ਹੈ। ਅਮਰੀਕਾ ਦੇ ਰਵਾਇਤੀ ਸਾਥੀ ਬ੍ਰਿਟੇਨ, ਫਰਾਂਸ ਅਤੇ ਸਾਊਦੀ ਅਰਬ ਨੇ ਵੀ ਟਰੰਪ ਦੇ ਕਦਮ ਦੀ ਨਿਖੇਧੀ ਕੀਤੀ ਹੈ।
ਸ਼ਨੀਵਾਰ ਨੂੰ ਅਰਬ ਲੀਗ ਨੇ ਐਮਰਜੰਸੀ ਮੀਟਿੰਗ ਸੱਦੀ ਹੈ। ਦੂਜੇ ਪਾਸੇ ਸ਼ੁੱਕਰਵਾਰ ਨੂੰ ਸੰਯੁਕਤ ਰਾਸ਼ਟਰ ਸੁਰੱਖਿਆ ਕੌਂਸਲ ਇੱਕ ਬੈਠਕ ਸੱਦੇਗੀ।
