'To start akara business no cost plenty money' - Nigerians dey divided ova First Lady Remi Tinubu comments

Nigerians don dey divided ova First Lady Remi Tinubu comments on akara, corn and kulikuli as she bin dey tok about small-scale ventures.

Mrs Tinubu say di govment dey try give hope and to start akara business no cost plenty money.

She yarn dis one wen she bin dey speak wit correspondents afta di second-quarter meeting of di Renewed Hope Initiative wit wives of state govnors for di State House for Abuja on Wednesday, 24 June.

"We dey try to give hope, and to start akara business no cost plenty money. To start roasting corn, or pesin even say kuli kuli no dey take much. We bin no give dem loan; we bin give dem as grant.

"So we don encouraged Nigerians di best wey we fit do. Wetin dey within our hands, I don give, and I dey continue to give," she tok.

One video of di First Lady wia she make di comments quickly go viral on social media on Friday and Nigerians dey divided on dia opinions.

Di First Lady also highlight interventions in healthcare, education, agriculture and social investment.

She say she don personally support several causes wit plenty donations.

"I remember say I give for TB. Wen I hear say so many TB cases dey, I bin give 2 billion naira. To breast cancer, I bin give one billion. For food malnutrition, I bin give half a billion.

"So dis na di tins wey we don dey, and make sure say whatever dis govment dey try do, e go see di light of day," she tok.

She also say dem don provide scholarships, ICT training opportunities and support for agricultural and social investment programmes.

"Di narrative don really change, don change to challenge di average man, whereas di average man suppose get hope. So I like di idea say Mr President say dis na Renewed Hope Agenda.

"We gatz renew our hope, and dat na how we renew our hope, you know, and dat na wetin I get to tell Nigerians," she tok.

Nigerians dey divided wit dia reactions

For di video wey Kayode Ogundamisi post for X, Nigerians dey divided wit dia reactions.

While some no see anytin wrong in selling kulikuli and akara, odas no gree wit di First Lady.

One X user wit di handle @smuhammadumar say, "Egbon, wetin dey wrong wit Selling Kuli kuli and Akara. Just say make pipo no do food business again. Dis elitist class mentality na exactly why foreigners use our kontri as dumping ground for industries we tink we dey 'too big' to handle."

Anoda X user wit handle, say, "Akara business na how dem hope to keep you poorer! Dem want dia children to aspire to be "successful" politicians like dem, work for NNPC, CBN etc whilst your sons & daughters dey fry Akara & hawk am on di street! Politicians no rate you enough. Weaponization of poverty!"

@Silvermirabe write: "Dis na veri good SME's o, dem dey sustain millions of pipo for China…street food market.

@ekwus76333 write: "Dem bin dey call calling obi plan container economy while dem don dey give us roadside akara economy."

@omoonifade1 write: "E get one woman wey dey sell Akara elepo for Kuto here for Abeokuta. I dey always drive to buy Akara from her. Many of us online here no get di money wey she get but den keep acting like say she say somtin out of point."

@ade_sheun write: "Nigeria politicians and wickedness... E long."