Ìomhaigh dealbhaichte de phrìosan ùr Inbhir Nis
Thàinig e am bàrr gu bheil dàil eile air prìosan ùr air a' Ghàidhealtachd is gu bheil a' phrìs air èirigh a-rithist.
Tha dùil gum bi am prìosan ùr ann an Inbhir Nis trì uidhir nas cosgaile na bhathas a' smaointinn anns a' chiad dol a-mach.
Thèid am prìosan ùr faisg air Pàirc Bhùithtean Inbhir Nis an àite Phrìosain Phorterfield sa bhaile a tha còrr is 100 bliadhna a dh'aois.
Bha còir aig an obair tòiseachadh bho thùs ann an 2018.
Chaidh dàil air gnothaichean bhon uair sin is tha Seirbheis Phrìosain na h-Alba a-nise air dearbhadh gun toir obair-togail co-dhiù sia mìosan nas fhaide na bha dùil sa chlàr-ama mu dheireadh a bh' ann.
Achd Saorsa an Fhiosrachaidh
Thuirt iad gum bi an goireas ùr deiseil faisg air deireadh 2024.
Chaidh innse cuideachd gu bheil dùil a-nise gun cosg an leasachadh mu £140m.
'S e £52m am buidseat a bh' ann nuair a chaidh am pròiseict a chur air adhart sa chiad dol a-mach.
Thàinig am fiosrachadh ùr às dèidh iarrtais a rinn am BPA Tòraidheach Èideard Mountain tro Achd Saorsa an Fhiosrachaidh.
Tha am BBC air beachd iarraidh bho Sheirbheis Phrìosain na h-Alba.
