मदुराईतील 11.5 किलो दागिने चोरी प्रकरणी प्रसिद्ध युट्यूबरला अटक; तपासात काय समोर आलं?

फोटो स्रोत, Instagram@Meenakshi_nachiyar/BBC
- Author, सिराज
- Role, बीबीसी
- Published
- वाचन वेळ: 3 मिनिटे
तामिळनाडूतील मदुराईतील 'तनिष्क' शोरूममधून कोट्यवधींचे सोने आणि हिऱ्यांचे दागिने लंपास केल्याच्या प्रकरणात पोलिसांनी मीनाक्षी या प्रसिद्ध युट्यूबरला अटक केली आहे.
याप्रकरणी आणखी एका व्यक्तीची चौकशी सुरू असून, प्रत्यक्ष चोरी करणारा मुख्य संशयित अद्याप फरार असल्याचं पोलिसांनी सांगितलं आहे.
पोलिसांनी काल संशयित आरोपीच्या घरावर छापा टाकून झडती घेतली. या कारवाईनंतर, यूट्यूबर मीनाक्षीने दिलेल्या माहितीच्या आधारे एका विशिष्ट ठिकाणी लपवून ठेवलेल्या लुटलेल्या दागिन्यांपैकी काही दागिने जप्त करण्यात यश आल्याची माहिती पोलिसांनी दिली आहे.
प्रत्यक्ष दरोडा टाकणाऱ्या मुख्य आरोपीला अटक करून उरलेले सर्व दागिने लवकरात लवकर हस्तगत करण्यासाठी पोलिसांकडून वेगाने पावलं उचलली जात असल्याचंही त्यांनी सांगितलं.
नेमकी कशी झाली चोरी?
मदुराईच्या पळंगानत्तम बायपासवर गेल्या 14 ऑक्टोबरला सुरू झालेल्या 'तनिष्क'च्या दुकानातून 12 नोव्हेंबरला पहाटे सोने आणि हिऱ्यांचे दागिने लंपास करण्यात आले.
सकाळी कर्मचारी दुकानात आल्यावर दागिने चोरीला गेल्याचे त्यांच्या निदर्शनास आले, त्यानंतर त्यांनी पोलिसांना कळवले.
घटनास्थळी दाखल झालेल्या पोलिसांनी दुकानात बसवलेल्या सीसीटीव्ही कॅमेऱ्यांचं फुटेज तपासलं.
चेहरा झाकलेला एक व्यक्ती दुकानात शिरून दागिने लंपास करतानाची दृश्यं या फुटेजमध्ये कैद झाल्याचं पोलिसांनी सांगितलं.
शोरूमच्या इमारतीच्या मागच्या बाजूला असलेल्या लोखंडी शिडीवर चढून लिफ्टच्या मोकळ्या जागेतून हा चोरटा दुकानात शिरला असावा, असा पोलिसांचा अंदाज आहे.
दरोड्याची पूर्वतयारी 5 नोव्हेंबरला केली का?
या दरोड्याच्या घटनेनंतर पोलिसांनी या दागिन्यांच्या दुकानातील मागील काही दिवसांचे सीसीटीव्ही कॅमेरा फुटेजही तपासले.
या सीसीटीव्ही फुटेजमध्ये 5 नोव्हेंबरलाच दुकानात घुसण्याचा प्रयत्न झाल्याचे दिसून आले आहे, अशी माहिती पोलीस आयुक्त एस. राजेंद्रन यांनी दिली.

चोरी करण्याच्या एक आठवडा आधीच दुकानात शिरण्याचे मार्ग तपासून पाहिले गेले असावेत, या दिशेने पोलीस तपास करत असल्याचं त्यांनी सांगितलं.
तसेच 5 नोव्हेंबरला दुकानात शिरण्याचा प्रयत्न करणारी व्यक्ती आणि 12 नोव्हेंबरला चोरी केल्याचा संशय असलेला आरोपी यांच्यात काही संबंध आहे का, याचाही तपास सुरू असल्याचं ते म्हणाले.
प्रसिद्ध युट्यूबरला अटक
या तपासात एक महत्त्वाचे पाऊल म्हणून मीनाक्षी नावाच्या युट्यूबरला अटक केल्याचे मदुराईचे पोलीस आयुक्त एस. राजेंद्रन यांनी 'बीबीसी तमिळ'शी बोलताना स्पष्ट केले.
"शोरूमजवळच पळंगानत्तम भागात राहणाऱ्या एका व्यक्तीने ही चोरी केली असावी, असा आमचा प्राथमिक अंदाज आहे. काल संध्याकाळी संशयिताच्या घराची अनेक तास झडती घेतली गेली. तसेच या संदर्भात आणखी एकाची चौकशी केली जात आहे. मुख्य संशयित आरोपीचा शोध सुरू असून त्याला पकडून चोरीला गेलेले सर्व दागिने परत मिळवण्यासाठी आमचे प्रयत्न सुरू आहेत," असं ते म्हणाले.

फोटो स्रोत, Meenakshi_nachiyar/Instagram
अटक झालेली मीनाक्षी ही प्रसिद्ध युट्यूबर आहे. तिने दिलेल्या माहितीवरून एका विशिष्ट ठिकाणी लपवून ठेवलेल्या दागिन्यांपैकी काही दागिने पोलिसांनी जप्त केले आहेत, अशी माहिती पोलीस सूत्रांनी दिली आहे.
किती ऐवज चोरीला गेला?
मदुराईतील 'तनिष्क' शोरूममधील या चोरीच्या घटनेत केवळ एकच व्यक्ती सामील असल्याचे शहर पोलीस आयुक्त एस. राजेंद्रन यांनी स्पष्ट केले आहे. या चोरीत 10 किलो सोने आणि 1.5 किलो हिऱ्यांचे दागिने लंपास करण्यात आल्याचे ते म्हणाले.
या प्रकरणी मीनाक्षीला अटक झाली असली, तरी तिच्याकडून नेमका किती ऐवज जप्त केला आहे, याची अधिकृत माहिती पोलिसांनी अद्याप दिलेली नाही.
जप्त केलेल्या दागिन्यांचे वजन मोजण्यासाठी लागणारे वजनकाटे 'तनिष्क ज्वेलर्स'च्या दुकानातून मदुराईच्या एस.एस. कॉलनी पोलीस ठाण्यात आणले गेले आहेत.
आतापर्यंत परत मिळवलेल्या दागिन्यांचे एकूण वजन आणि प्रत्येक दागिन्याचे स्वतंत्र वजन मोजण्याचे काम केले जाणार आहे. त्यानंतरच जप्त केलेल्या ऐवजाचे एकूण प्रमाण आणि किंमत याबद्दलची अधिकृत माहिती समोर येईल.
(बीबीसीसाठी कलेक्टिव्ह न्यूजरूमचे प्रकाशन)
























