‘Yadda muke kwana a dazuka saboda rashin tsaro’

Jama'ar Wasagu da sauran wasu garuruwa kimanin bakwai na yankin karamar hukumar Danko/Wasagu ta jihar Kebbi, na ci gaba da kokawa kan yadda matsalar hare-haren 'yan bindiga ke ta addabar su, al'amarin da ya hana su zaman lafiya, har ma wasu magidanta sun kwashe wata biyar ba sa iya kwana a gidajensu ba .

Matsalar tsaron ta kuma hana jama'ar garuruwan damar girbi da kwashe kayan amfanin gonarsu, bayan kwashe mutum fiye da ashirin a gonaki ranar Alhamis da ta gabata.

Sai dai rundunar 'yan sandan Najeriyar ta ce ana bin matakan shawo kan matsalar tare da hadin gwiwar gwamnatin jihar ta Kebbi.

Wani mazaunin yankin ya shaidawa BBC cewa matsalar tsaro ta yi wa garin Wasagu a jihar Kebbi kofar rago

''Duk hanyar da za ka fita daga Wasagu ko kuma za ka shigo, to in ka san za ka iya fita amma ba ka san za ka iya dawowa lafiya ba, saboda koina ana iya haduwa da su 'yan fashin nan''in ji shi.

Ya kuma danganta yawaitar hare haren saboda yankin nada iyaka da jihar Zamfara, inda ya ce 'yan bindigar na garkuwa da mutanen da suka je gona domin tsinkar amfanin gonarsu.

''A ranar alhamis 'yan bindiga sun kwashi mata masu tsinkar gyada su 7 sun ce kowane sai an bada miliyan 2'', in ji shi.

Wani mutumin daya daga cikin wadannan garuruwa da matsalar hare-haren ta zame wa karfen kafa a gefen garin na Wasagu, wanda ba ya so a ambaci sunansa, ya yiwa BBC bayani kan irin tasku da suke ciki:

''Mun kai akalla wata biyar a yanzu ba kowani magidanci ke kwana a cikin gidanshi ba saboda matsalolin da mu ke ciki. Bayan an hana mu kwana a cikin gidaje yanzu ana bin mutane daji , ko ranar Aljamis an kwashi mutum 20 a Kangon Wasagu'' in ji shi.

BBC ta tuntubi Kwamishinan 'yan sanda a jihar ta Kebbi, Umar Hadeja kan wannan batu kuma ya ce ba a yi kwance da sirdi ba:

''Muna da folis namu na mobil, su na da motocin silke wanda suke sintiri tsakanin Wasagu zuwa kauyukan Danko''

Ya kuma ce Tudun Bichi suna da sansanin sojoji wadanda ke sintiri a wadannan kauyuka

Sai dai Kwamishinan ya ce akwai kauyuka da yawa da suke kyautata zaton sun yi sulhu da 'yan bindiga ba tare da amincewar gwamnatin ba.

'' Kuma wannan sulhun da suke yi shi ne ya ke kawo matsala kwarai da gaske domin daya daga cikin sharuddan da suka gindaya mu su shi ne za su rika basu labari kan jamian tsaro'' in ji shi.

Don magance wannan matsala ta infomanci, kwamishinan 'yan sandan na jihar Kebbin ya yi kira ga shugabannin al'ummomin garuruwan da abin ya shafa, su taimaka wajen zakulo mutane da ke tsegunta bayanai ga 'yan bindiga.

Jihar Kebbi ta fuskanci ɓullar ƙungiyar Lakurawa, wata sabuwar ƙungiyar ƴanbindiga da ta ƙarfafa hare-hare a 2025.

Haka kuma a shekarar 2025 wasu ƴanbindiga suka kai hari makarantar sakandiren ƴanmatan Maga da ke jihar tare da sace ɗalibai 25, kodayake daga bayaan sako su.

Mene ne shirin gwamnatocin Arewa kan tsaro?

Tun a watan Yunin 2026 ne gwamnonin yankin arewa maso yammacin Najeriya suka fara yunƙurin aiwatar da wata manufar haɗin gwiwa da nufin shawo kan talauci mai fuskoki da dama ta hanyar shirye-shirye da dabarun tallafawa rayuwa a jihohin yankin bakwai.

Gwamnonin sun cimma wannan matsaya ne bayan kammala wani taron kwanaki biyu da suka gudanar a birnin Kano, inda suka yi fatan za su samar da dabarun da za su magance matsalolin yankin ciki har da batun yaran da ba sa zuwa makaranta.

Mataimakin gwamnan jihar Murtala Sule Garo, da ya wakilci gwamnan jihar ya shaida wa BBC cewa, akwai abubuwan da suka ja hankalin gwamnonin yankin da har aka shirya taron aka kuma gudanar da shi.

Ya ce,"mun ga cewa gara a hadu gaba daya domin a fito da sabbin dabaru na yakar talauci, domini dan abu ya yi yawa to dole sai an samu shawarwari daga masana da al'umma ta yadda za a fito da sabbin dabaru na magance duk wata matsala."

"Akwai abubuwa da dama da ke janyo talauci kamar yawan mutane a yankinmu na arewa maso yamma da yawan yaran da basa zuwa makaranta da tabarbarewar tsaro da na noma da ma rashin sana'oin dogaro da kai." In ji shi.

Mataimakin gwamnan Kano, ya ce," A yayin taron an cimma matsaya akan yadda za a tallafawa bangaren ilimi sosai ta yadda kowanne yaro da ke yankin zai samu damar zuwa makatanta musammamma mata."

" Baya ga batun inganta ilimi a yankin na arewa maso yamma, an kuma cimma matsaya akan yadda za a inganta fannin lafiya da noma da ma tsaro, wanda yana daga cikin abin da yad amu gwamnoni da ma al'ummar yankin baki daya." In ji shi.