ગુજરાતમાં 12 સપ્ટેમ્બરથી ભારે વરસાદનો નવો રાઉન્ડ

ગુજરાતમાં વરસાદના લાંબા વિરામ બાદ હવે દક્ષિણ ગુજરાત અને સૌરાષ્ટ્ર-કચ્છમાં છૂટાંછવાયાં સ્થળોએ વરસાદ નોંધાયો છે.

છેલ્લા 24 કલાકમાં રાજ્યના કેટલાક વિસ્તારોમાં ખાસ કરીને સૌરાષ્ટ્રમાં સારો વરસાદ નોંધાયો છે.

જેમાં જામનગરના ધ્રોલ તાલુકામાં સૌથી વધુ 2.13 ઇંચ વરસાદ નોંધાયો છે.

જો કે ઉત્તર ગુજરાતમાં હવામાન સૂકું રહ્યું હતું. જો કે આ સ્થિતિમાં આવનારા દિવસોમાં બદલાવ આવશે અને હળવાથી મધ્યમ વરસાદ પડી શકે છે તેવી હવામાન વિભાગે આગાહી કરી છે.

તેમજ આગામી દિવસોની સ્થિતિને ધ્યાને રાખીને કેટલાક જિલ્લાઓમાં હવામાન વિભાગે ઑરેન્જ ઍલર્ટની પણ જાહેરાત કરી છે.

હવામાન વિભાગ અનુસાર, ભારતમાં બંગાળની ખાડી અને તેની આસપાસના વિસ્તારમાં લો-પ્રેશર એરિયા યથાવત્ છે સાથે તેની સાથે જોડાયેલ સાયક્લોનિક સર્ક્યુલેશન પણ યથાવત્ છે.

બીજી તરફ, મોનસૂન ટ્રફ હવે જમ્મુ, દેહરાદૂન, બરેલી, લખનૌ, અંબિકાપુર, ઝારસુગુડાથી થઈને બંગાળની ખાડી સુધી પસાર થાય છે.

હવામાન વિભાગ અનુસાર, દક્ષિણ ગુજરાત અને તેની આસપાસના વિસ્તારમાં એક અપર ઍર સાયક્લોનિક સર્ક્યુલેશન યથાવત્ છે.

બીબીસી માટે કલેક્ટિવ ન્યૂઝરૂમનું પ્રકાશન