Elon Musk abaye uwa mbere ku isi utunze tiliyari y'amadolari mu gihe agaciro ka SpaceX katumbagiye

Ku wa gatanu, Elon Musk yabaye umuntu wa mbere ku isi utunze tiliyari y'amadolari y'Amerika, nyuma yuko imigabane ye muri kompanyi ye SpaceX y'ibyogajuru yiyongereye cyane mu itangira rya mbere rinini cyane ribayeho kugeza ubu ryo ku isoko ry'imari n'imigabane.

Uyu washinze kompanyi Tesla na SpaceX yashimangiye bimworoheye cyane umwanya we nk'umugabo wa mbere ukize cyane ku isi, mu gihe umutungo we wose wageze kuri tiliyari 1.11 y'amadolari y'Amerika, nkuko bitangazwa n'ikinyamakuru Bloomberg ku rutonde rwacyo rw'abaherwe ku isi. Tiliyari imwe ingana na miliyari 1000.

Ibi bibaye nyuma yuko kompanyi ye SpaceX, inakora ibijyanye n'itumanaho n'ubwenge buhangano (AI), yiyandikishije ku isoko ry'imari n'imigabane rya Nasdaq mu mujyi wa New York, ku gaciro ka tiliyari 2.2 z'amadolari y'Amerika.

Iyo kompanyi yavuze ko imigabane yayo izagurishwa ku madolari 135 kuri buri mugabane, ariko isoko ryatangiye kurema igurishwa ku madolari 150 kuri buri mugabane ndetse, by'akanya gato, hari ubwo umugabane umwe wagiye ugurwa ku madolari 176.50, ibigaragaza amashyushyu y'abashoramari ku bucuruzi bushobora kuzabaho bufitanye isano n'ibyogajuru hamwe na kompanyi zifite aho zihuriye na Musk.

Ubwo isoko ryari ririmo kuremura ku wa gatanu, imigabane ya SpaceX yari irimo kugurishwa ku madolari 161 y'Amerika kuri buri mugabane.

Igurishwa rya mbere ry'imigabane kuri rubanda muri rusange mu ntangiriro ya SpaceX ku isoko ry'imigabane, ibizwi mu Cyongereza nka 'initial public offering' (IPO), ryakusanyije miliyari 75 z'amadolari y'Amerika avuye mu bashoramari n'abagenagaciro k'amasezerano, mbere yuko iyo kompanyi igera ku isoko ry'imari n'imigabane ku wa gatanu.

Kuba Musk afite 42% by'umutungo wose wa SpaceX, urebye bimuha ubugenzuzi bwayo wenyine kuri buri kintu cyose iyo kompanyi ikora. Ashobora gukoresha uko ashatse kose ayo mafaranga arimo kuyishorwamo.

Ikinyamakuru Bloomberg kivuga ko imigabane ye muri SpaceX yari ifite agaciro ka miliyari 767.1 z'amadolari y'Amerika ubwo isoko ryaremuraga ku wa gatanu, ndetse afite izindi miliyari 53.8 z'amadolari zivuye ku mahitamo afite y'igurisha ajyanye na SpaceX. Anafite miliyari 168 z'amadolari mu migabane ya Tesla, n'izindi miliyari 116.4 z'amadolari mu mahitamo ye muri Tesla.

Ukwiyongera kw'umutungo kwateje impaka

Umwanya wa Musk nk'umuntu wa mbere ku isi utunze tiliyari y'amadolari y'Amerika wahise uteza impaka ku busumbane mu bukire. Ubu umutungo we ungana n'ubukungu bwose bwa Pologne cyangwa Ubusuwisi.

Uwo mutungo utari warigeze ugerwaho n'umuntu uwo ari we wese ku isi, watumye Musk aba umuntu w'umunyembaraga cyane ndetse uteza amacakubiri muri politike y'isi.

Yatanze miliyoni zibarirwa mu magana z'amadolari mu bikorwa byo kongera kwiyamamaza kwa Perezida w'Amerika Donald Trump nyuma yo kunenga ubutegetsi bwari buriho icyo gihe, ndetse mu gihe cy'amezi menshi mu mwaka ushize, Musk yayoboye ikigo cya leta y'Amerika cy'inozamikorere, kizwi nka DOGE mu mpine y'Icyongereza.

Binyuze mu kugabanya cyane amafaranga leta ikoresha, Musk yatumye ikigo cy'Amerika cy'iterambere mpuzamahanga (USAID) gifungwa.

Abashakashatsi bo mu kinyamakuru cy'ubushakashatsi ku buvuzi, the Lancet, baburiye, mu nyandiko batangaje, ko igabanywa nk'iryo ry'amafaranga rishobora guteza impfu zirenga miliyoni 14 z'inyongera bitarenze mu mwaka wa 2030.

Musk yananenze ubutegetsi bwo mu Bwongereza n'ahandi ku isi, akenshi ku ngingo zijyanye n'abinjira mu gihugu ndetse no kwamamaza amacakubiri ashingiye ku moko.

Musk yagiye ashyamirana na Minisitiri w'intebe w'Ubwongereza Sir Keir Starmer, harimo no ku ngingo y'iyicwa ry'umunyeshuri w'Umwongereza Henry Nowak wari ufite imyaka 18.

Abasenateri Bernie Sanders na Elizabeth Warren bo mu ishyaka ry'abademokarate ni bamwe mu banyapolitike benshi bamaganye iyo ntambwe Musk yateye yo kugera ku mutungo wa tiliyari imwe y'amadolari y'Amerika. Warren yavuze ko bikwiye kuba ikintu "gikangura" ndetse avuga ko bishimangira ko hacyenewe ko habaho isoresha ku mutungo.

Ariko Musk atunze tiliyari y'amadolari ku rupapuro gusa, kuko uwo mutungo hafi ya wose ushingiye ku gaciro k'imigabane ye muri Tesla ndetse, ubu noneho, no muri SpaceX. Mu gihe nibura cy'umwaka umwe, ntashobora kugurisha umugabane we wo muri SpaceX.

Ukwiyandikisha kwa SpaceX ku isoko ry'imari n'imigabane rinitezweho gutuma abantu barenga 4,400 bayikoramo cyangwa bahoze bayikoramo baba abatunze miliyoni y'amadolari, binyuze mu migabane bafite muri iyo kompanyi, bahawe bijyanye n'umushahara wabo.