Ibirambuye ku nkuru y'uyu mugabo wajyanye umurambo wa mushiki we kuri Banki…Ubutegetsi bwavuze iki?

Byabaye ku wa mbere nimugoroba mu gace kari mu ntara ya Odisha mu burasirazuba bw'Ubuhinde aho abakozi ba banki batunguwe no kubona umugabo w'imyaka 52 yinjira muri Banki atwaye amagufa y'umuntu wapfuye ku rutugu.

Jitu Munda yinjiye muri iyo Banki iri mu mujyi muto wa Malliposhi ashaka ko bamuha amarupiya 19,300 (hafi 300,000 Frw) ari kuri konti ya mushiki we iri muri banki ya Gramin.

Uwo mushikiwe Kalra Munda wapfuye ku myaka 56, mbere yari yarapfushije umugabo we maze asubira iwabo akora nk'umukozi wa nyakabyizi.

BBC Hindi ivuga ko Karla yapfuye mu ntangiriro z'uyu mwaka amaze kugurisha ibimasa bye maze akabitsa ariya marupiya kuri konti ye.

Kuki yagiye kuri banki yitwaje amagufa?

Karla Munda yapfuye mu mezi abiri ashize nyuma musaza we Jitu ajya kuri banki gusaba amafaranga ya mushiki we.

Jitu yabwiye BBC Hindi ati: "Nagiyeyo inshuro nyinshi nsobanurira umukuru wa banki ko hashize amezi abiri mushiki wanjye apfuye.

"Uwo mukuru wa banki yanze kunyumva agatsimbarara ko tuzana nyiri konti cyangwa icyemeza ko yapfuye n'inyandiko z'uwo yasigiye irage, nagize umujinya ndagenda nzana umubiri we ngo mwereke ikimenyetso".

Uyu mugabo yagenze kilometero eshatu ajya aho bahambye mushiki we, afata umubiri we, igice cyo hejuru agishyira mu mufuka maze awushyira ku rutugu, mu bushyuhe bwinshi bwariho, yerekeza kuri banki.

Abakozi n'abakiriya ba banki baratunguwe bikomeye bamubonye yinjiye, nk'uko BBC Hindi ibivuga.

Banki yahise ihamagara polisi.

Abapolisi bumvishije uyu mugabo ko ubusabe bwe buri bwumvwe ariko agomba gusubiza mushiki we mu buruhukiro aho yari ashyinguye.

Jitu yaremeye arongera ashyira umurambo ku rutugu asubira ku irimbi.

Icyo ubutegetsi buvuga

Sushant Kumar Sethi ukuriye banki ya Gramin i Odisha yavuze ko ubwo Jitu yazaga kubikuza amafaranga "namubwiye ko nyirayo agomba kuba ari hano".

Ati: "Yabanje kuvuga ko mushiki we yagize ikibazo cya 'paralysis' adashobora kuza. Mubwiye ko umukozi wa banki yajya kumureba iwe, avuga ko ahubwo yapfuye."

Uwo mukuru wa banki avuga ko mu mezi abiri ashize Jitu Munda atigeze ajya kuri iyo banki kubikuza ayo mafaranga.

Yongeraho ko Kalra afite abandi bantu babiri bemewe n'amategeko na bo baje kubikuza ayo mafaranga, ko ari yo mpamvu banki yasabye Jitu inyandiko z'amategeko zibimwemerera.

Nyuma y'iperereza ryakozwe ku wa kabiri tariki 28 Mata(4), amarupiya 19,410 (300,000Frw) yahawe Jitu n'abandi bavandimwe babiri ba Kalra.

Polisi ivuga ko yasabye abo bavandimwe batatu kugabana ayo marupiya mu buryo bungana.

Minisitiri Suresh Pujari wo mu ntara ya Odisha avuga ko ibintu nk'ibi ari ubwa kabiri bibaye muri iyi ntara. Yongeraho ko harimo gukorwa iperereza kandi hazafatwa ingamba zikomeye ku myifatire y'umukuru wa banki.

Ubutegetsi bw'akarere ka Keonjhar bwasohoye itangazo kuri iyi nkuru yakwiriye henshi ku isi.

Bwavuze ko ari inshingano zabwo z'ibanze "Kurengera uburenganzira n'agaciro k'abantu" batuye ako karere.

Ubutegetsi bw'ako karere buvuga ko bwahaye Jitu Munda inkunga y'amarupiya 30,000 (hafi 500,000Frw).

Ubwo butegetsi buvuga kandi ko bwanahaye Jitu Munda icyemezo cy'uko mushiki we yapfuye n'inyandiko y'abazungura be bemewe.

Buvuga kandi ko butazemera ko hari undi muntu urenganywa bigeze aho mu gihe kizaza.